«Аҵарашықәс ҿыц алагара аламҭалазы Аԥсны аҵара Аминистрра анаҩс ашколхәыҷқәа рызшара азы аҵара аҟәшақәа рахь идәықәнаҵоит, – ҳәа еиҭеиҳәеит Аслан Кәыҭелиа. – Иахьа араионқәа рышколқәа рахь идәықәҵоуп 15 нызықь рҟынӡа инаӡо 20-хьӡы змоу, Аԥсны иҭыжьу арҵагашәҟәқәа.  Ҳара раԥхьаӡа акәны ашколқәа ирзаҳшеит арҵагатә комплектқәа «Аҟәыбҷа», уи иалоуп «Анбан», алакәқәа, альбом, уҳәа убас ирацәаны. Иара убас ҳара алагарҭатә классқәа рырҵаҩцәа рзы арҵагатә цхыраагӡақәа дәықәаҳҵеит.

Ҷыдала аинтерес аҵоуп аиҳабыратәи аклассқәа рҿы аҵара зҵо аҵаҩцәа рзы афинанстә ҵарадырра иазку арҵагашәҟәы. Уи аԥарақәа рдунеи аҿы ахымҩаԥгашьеи уахьцо-уахьаауа ақәшәара арҵара адагьы анапхыцәгьақәа урымжьартә еиԥш ихымԥадатәиу аинформациа унаҭоит. Ашәҟәы авторцәа аҭаацәаратә биуџьет иашаны аиҿкааразы амҩа уқәырҵоит, ахатә бизнес аартразы абжьгарақәа ҟарҵоит. Иарбоу арҵагатә цхыраагӡа ашколхәыҷқәа афинансқәа рганахьала азанааҭқәа рацәаны иднардыруеит, анаҩстәи рыԥсҭазаараҿы азанааҭ алхраҿы ирыцхраауеит.  Ашәҟәы аҿы афинанстә усхкы – ацифратә ԥарақәа, акриптовалиута, иԥсабаратәым аинтеллект инанагӡо ароль, уҳәа ирыдҳәалоу  актуалра злоу азҵаарақәа рҭак арбоуп. Арҵагашәҟәы, ҳәарада, ахәыҷқәа рыдагьы  аиҳабацәагьы аинтерес рызцәырнагоит. Иазгәаҭатәуп, иара аԥснытәи ареалиақәа рыла ишьаҭаркны ишаԥҵоу, аиллиустрациа ҳтәылауаа ирзааигәоу, дара рзы зеилкаара мариоу аҿырԥштәқәа рыла иҟаҵоуп. 

«Ишыжәдыруа еиԥш, аҵарашықәс ҿыц алагара аламҭалазы ҳара лассы-лассы ашәҟәқәа разымхара апроблема ҳазцәырҵуеит. Ҳара Урыстәылатәи Афедерациа аҵара Аминистрра аҿы аиҿцәажәарақәа мҩаԥаагоит, агәыӷрагьы ҳамоуп хара имгакәа ари апроблема ӡбахап ҳәа», - иҳәеит Аслан Кәыҭелиа.  

Иара инаҵшьны иазгәеиҭеит ашколхәыҷқәа зегьы арҵагашәҟәқәа рыла реиқәыршәара аҵак ду шаҵоу. Аиашазы, ашколқәа рбиблиотекақәа русзуҩцәа классқәак рҿы арҵагашәҟәқәа ркомплектқәа разымхара шыҟоу азы лассы-лассы адырра ҟарҵоит. Ари апроблема аӡбаразы аҵара асистема зегьы акоординациа зызу аусура хымԥадатәиуп.