Аҟәа. Нанҳәамза 26, 2024 шықәса. Аԥсныпресс. Аԥсны адәныҟатәи аусқәа рминистр Сергеи Шамба Аахыҵ Уаԥстәылатәи Ареспублика адәныҟатәи аусқәа рминистр Ахсар Џьиоев напхгара зиҭо, Аԥсны ахьыԥшымра жәларбжьаратәи азхаҵара Амш 16-шықәса ахыҵра азгәаҭара азы Аԥсныҟа иааз Ааахыҵ Уаԥстәыла аделегациа идикылеит.
Аиԥылара аҿы Аԥсни Аахыҵ Уаԥстәылеи рыдәныҟатәи аусқәа Рминистррақәа 2024-2025 шықәсқәа рзы аконсультациақәа рыплан рнапы аҵарҩит. Аусшәҟәы рнапы аҵарҩит адәныҟатәи аусқәа рминистрцәа Сергеи Шамбеи Ахсар Џьиоеви.
«Ари аусшәҟәы адипломатиатә усхкы аҿы ҳусеицуреи ҳаизыҟазаашьақәеи рыҿиара иацхраауеит, - ҳәа инаҵшьны иазгәеиҭеит Сергеи Шамба.
Ахсар Џьиоев, ахәҭакахьала, Сергеи Шамба Аахыҵ Уаԥстәыла аус ацуреи аимабзиаратә еизыҟазаашьақәа рыҿиареи дахьадгыо азы иҭабуп ҳәа еиҳәеит. Иара убасгьы аринахысгьы ахырхарҭақәа зегьы рыла аусеицура дшазхиоу азгәеиҭеит.
Ахсар Џьиоев иажәақәа рыла, аусеицура аплан ҳтәылақәа рыбжьара аизыҟазаашьақәа хра злоу аҿиара акыр иацхраауеит.
Сергеи Шамба Ахсар Џьиоев иҭабуп ҳәа иеиҳәеит Ахьыԥшымра азхаҵара Амш азы дахьааз.
«Ари амш ааигәахарц аџьабаа рбахьан аԥсуа абиԥарақәа жәпакы, урҭ ахақәиҭра, ахьыԥшымра, ҳзинқәа ирзықәԥон. Аԥсадгьыл аҵеицәеи аԥҳацәеи аӡәырҩы рхы ақәырҵеит ҳмилаҭқәа рҭынч ԥсҭазааразы. Раԥхьа ари ҟалеит Аахыҵ Уаԥстәыла, нас Аԥсны», – ҳәа иазгәеиҭеит аминистр.
