Аҟәа. Нанҳәамза 29, 2024 шықәса. Аԥсныпресс. Хьыбла Мықәба С. Иа. Ҷанба ихьӡ зху Аԥснытәи аҳәынҭқарратә драматә театр адиректор Хада аамҭала инапынҵақәа рынагӡаҩыс дҟаҵоуп. Уи азы Адҵа лнапы аҵалҩит акультура аминистр аамҭала инапынҵақәа назыгӡо Динара Смыр.
Мықәба Хьыбла Леонид-иԥҳа – ашәаҳәаҩ, С. Иа. Ҷанба ихьӡ зху Аԥснытәи аҳәынҭқарратә драматә театр актриса, Аԥсны Аҳәынҭқарреи Аахыҵ Уаԥстәылатәи Ареспубликеи Зҽаԥсазтәыз артистка.
Лара диит рашәарамза 12, 1981 шықәса рзы Гәдоуҭа араион Лыхны ақыҭан. Ибзиаӡаны П. Шьаҟрыл ихьӡ зху Лыхнытәи ашкол далгеит. Хьыбла Мықәба Аԥснытәи Аҳәынҭқарратә Университет «Атәылауаҩратә зин» азанааҭҵарала азиндырратә факультет, иара убас «актиор-режжиссиортә ҟазара» азанааҭҵарала ААУ арҵаҩратә факультет далгеит. Лара иара убас «академиатә вокал» азанааҭҵара ала Аҟәатәи амузыкатә ҵараиурҭагьы далгеит.
