«Аҳәынҭқарра Ахада усҟан ари аусшәҟәы  аҩраан дыҟаӡамызт, убри аҟнытә уи ашьақәырӷәӷәарагьы илымшаӡеит. Акы заҵәык, иҟаиҵаз, - иара Апарламент адепутатцәеи аоппозициа аԥхьагылаҩцәеи  анаҩс урыстәылатәи атәылауаҩра рымхра азы ирызкны изеиԥшразаалак адыррақәа дарбанызаалак  иҭара азы аҭакԥхықәра ихахьы имгаӡеит ҳәа аҳәамҭа ҟаиҵеит», – ҳәа иҳәеит Сергеи Шамба.

Сергеи Шамба ауаажәларра рыхәҭаки аоппозициатә мчрақәа рхаҭарнакцәеи урыстәылатәи атәылауаҩра амхра азҵаара агәҭынчымра рызцәырнагеит ҳәа иҳәеит. Убри аан дара аусура иалагахьоу асанкциақәа иахәҭоу ахшыҩзышьҭра арҭаӡом ҳәа наҵшьны иазгәеиҭеит.

«Убри ауп ҳара иахьа ҳазлацәажәаша, убри ауп иахьа зегьы реиҳа агәҭынчымра узцәырызгаша. Ҳабакылнагои ҳара ас еиԥш ашьақәгылара иаҿу аҭагылазаашьа, Аԥсны ишьақәгылоу аҭагылазаашьа зеиԥшрахозеи, уи алҵшьас иҳамоузеи, ас еиԥш иҟоу аконфронтациа анаҩсгьы иҟалар? Сара сгәаанагарала, ҳауаажәларра раԥхьа иргыланы изызхәыцша абарҭ азҵаарақәа роуп», –  ҳәа иҳәеит атәыла адәныҟатәи аусқәа рминистр.

Сергеи Шамба иажәақәа рыла, атәылауаҩра амхра – ахархәара зылшо санкциоуп.

«Шәара ижәдыруеит, уи зехьынџьара инарҭбааны ахархәара шамоу. Хара ҳазцои, иаҳгәалаҳаршәап Аахыҵ Уаԥстәыла Апарламент адепутатцәа урыстәылатәи атәылауаҩра шрымырхыз атәы. Уи урыстәылатәи аган аусдырра ахь иаҵанакуеит. Ари азҵаара ҳара џьара акала анырра ҳзаҭаӡом. Дара џьоукы Урыстәыла аганахьала хра злам азыҟазаашьа рымоуп ҳәа ирыԥхьаӡар, уи иаанаго, урҭ дара рганахьала асанкциақәа рхархәара иалагар рылшоит ҳәа ауп», – ҳәа иҳәеит аминистр.  

Сергеи Шамба Аслан Бжьаниа уажәы Москва дыҟоуп, уи ишьақәгылаз аҭагылазаашьа алҵра иадҳәалоу азҵаарақәа рылацәажәаразы аиԥыларақәак рымҩаԥгара игәы иҭоуп ҳәа ажурналистцәа адырра риҭеит.

«Ҳазҭоу ашықәс нҵәаанӡа асанкциақәа  аанымкылахар, уи аӡәырҩы ирԥырхагахар алшоит.  Ҳазхәыцлоит ари аҭагылазаашьа алҵшьас иамоу», – ҳәа иҳәеит  Сергеи Шамба.

Урыстәылеи Қырҭтәылеи аҵыхәтәантәи аамҭазы реизыҟазаашьақәа рылацәажәара азы иҟаҵаз аҳәара аҭак аҳасабала аминистр иҳәеит:

«Сара сгәаанагарала ҳара иаҳзеиӷьуп урҭ иҭышәынтәаланы аҿиара роур. Сара агәра сызгом Урыстәыла Аԥсны ахьыԥшымра азхаҵара шьҭахьҟа архынҳәара азы ашьаҿа ҟанаҵап ҳәа», – иҳәеит Сергеи Шамба.

Иара игәаанагарала, Аԥсны аҩныҵҟа ауаа рхала ахныҟәгара рцәыхьанҭахо, рыԥсҭазаашьа акыр изыруадаҩуа  аҭагылазаашьа ашьақәгылара ауп раԥхьа иргыланы изыцәшәатәу.

«Убри ауп раԥхьа иргыланы изыцәшәатәу Урыстәылеи Қырҭтәылеи мышкы зны иҭышәынтәалоу аизыҟазаашьақәа ахьрыбжьарҵо, сара сгәаанагарала, ацәшәара аҭахӡам, избан акәзар, аигәылацәа рыбжьара аизыҟазаашьа бзиақәа еснагьгьы иабанызаалак аҳәынҭқарра азы акыр аҵанакуазароуп. Қырҭтәыла хара имгакәа имҩаԥысраны иҟоу алхрақәа рҿы аконфронтациатә гәҭакқәа змоу аоппозициа аиааира агар, сара сгәаанагарала, уи зынӡа ҳара ҳинтересқәа ирықәшәаӡом», – ҳәа иҳәеит Сергеи Шамба. 

Ажурналистцәа нанҳәамза  26 рзы Аҟәа ақалақь аҿы имҩаԥысраны иҟаз аԥсны-урыстәылатәи анапхгарабжьаратәи акомиссиа изаамҭанытәиу аилатәара зымҩаԥымсыз иазҵааит.

«Урыстәыла Анапхгара ахаҭарнакцәа аӡәырҩы нанҳәамза 26 рзы аԥсны-урыстәылатәи анапхгарабжьаратәи акомиссиа изаамҭанытәиу аилатәара амҩаԥгаразы иаараны иҟан, аха аилатәара амҩаԥгара ахыргеит. Сара иахьынӡеилыскаауа, Аԥсны ахьыԥшымра жәларбжьаратәи азхаҵара Амш аҽны урҭ ирҭахымхаӡеит афинансыркра шаанкылахо атәы аҳәара», – ҳәа иазгәеиҭеит Сергеи Шамба.

Аминистр иара убас аоппозициатә мчрақәа Лыхнашҭа жәлар реизара амҩаԥгара азы ирымоу агәҭакы дахцәажәеит.

«Ажәлар еизугозар, уи зыҟаҵатәу џьоукы урыстәылатәи атәылауаҩра рымырхыр ахьалшо азы акәӡам, уимоу, иахьа макьаназы уи иҟало иҟамло еилкааӡам, ауаа еизугозар Урыстәылеи ҳареи ҳаизыҟазаашьақәа аԥхасҭахара ианалаго аҭагылазаашьа аҿы наҟ-наҟ иҳаԥсҭазаашьахо ауп излацәажәатәу. Ҳара иахьа иаабаратәы иҟоуп Урыстәылеи Аԥсни реизыҟазаашьақәа хра злам аҿиара шаиуз, уи аганахьала раԥхьатәи ашьаҿақәа шыҟаҵоу, уажәы ишьақәгылаз аҭагылазаашьа уаанӡа иҟаз иаҿырԥшны уахәаԥуазар акыр аҽшеиҭанакыз, уимоу, уи еиҳагьы еицәахар шалшо. Убри аҟнытә, ауаа анизуга уразҵаар ауеит иазхиоума дара ас еиԥш ахҭысқәа рыҿиара  иадҳәаланы ишьақәгылар зылшо аҭагылазаашьа аҿы анхара ҳәа.  Иазхиоума дара рҭаххрақәа рырмаҷра, иазхиоума ԥыхьа еиԥш, Аԥсны аекономикатә аблокада ианҭакыз аамҭазы ишынхоз анхара, мамзаргьы иазхиаму?" –  ҳәа иҳәеит Сергеи Шамба.

Сергеи Шамба иажәақәа рыла, Урыстәыла, адгылаҩ иаҳасабала Аԥсны аганахьала агәынамӡара шьақәгылеит.

«Ари уаанӡа иҟаз акәӡам иҟоу. Сара ибзианы исгәалашәоит Аԥсны ахьыԥшымра азхаҵара ашьҭахь урыстәылатәи ауаажәларратә еилазаара ишаҳзыҟаз. Уи аҩыза иахьа иҟаӡам. Ҳара зегьы ҳахәҭаа алоуп ас еиԥш аҭагылазаашьа ашьақәгылара аҿы. Шәааи, ҳаицхырааны, ҳамчи ҳахшыҩи еилаҵаны ҳҽазаҳшәап ишьақәгылаз аҭагылазаашьа арҽеира. Асоциалтә ҳақәа рҿы Аԥсни Урыстәылеи реизыҟазаашьақәа рганахьала ирацәаны  анегатив аҭыԥ амоуп. Убри аҟнытә шәааи ҳаицхырааны иҳалшо зегьы ҟаҳҵап ҳастратегиатә аидгыларатә ҳәынҭқарреи ҳареи ҳаизыҟазаашьақәа еиӷьхарц азы. Уи ҳара зегьы иаҳзеиԥшу аинтересқәа ирықәшәоит. Ҳара иахьа ҳанхоит иуадаҩу, ессааира зҽеиҭазкуа адунеи аҿы. Ашәарҭарақәа рацәоуп иахьа Аԥсны азы мацара акәымкәа ауаатәыҩсара зегьы рзы. Адунеизегьтәи асистема аиҭеиҿкаара есымша аглобалтә проблемақәа ацын, ҳаргьы иахьа аҿҟьарсҭа аҿы ҳааины ҳаҟоуп», – ҳәа иазгәеиҭеит атәыла адәныҟатәи аусқәа рминистр.