Аҟәа. Жьҭаарамза 19, 2023 шықәса. Аԥсныпресс. Урыстәыла атранспорт Аминистрра аҿы Урыстәыла атранспорт аминистр Игорь Чалики Аԥсны аԥыза-министр ихаҭыԥуаҩ, аеконоика аминистр Кристина Озгани реиԥылара  мҩаԥысит, ҳәа адырра ҟанаҵоит Аԥсны аекономика Аминистрра аофициалтә саит.

Аганқәа ирылацәажәеит Аԥсни Урыстәылеи атранспорти атранспорттә инфраструктура аҿиареи русхкы аҿы русеицура азҵаарақәа. Ахәҭакахьала, ирыхәаԥшит амшынтә, автомашьынатә,  аихамҩатә еимадара аганахьала аусеицура азҵаарақәа.

Аҟәа. Жьҭаарамза 19, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа жьҭаарамза  3 – 4 рзы имҩаԥысыз Урыстәылатәи Афедерациа Ахада Владимир Путини адәныҟатәи аусқәа рминистр Сергеи Лаврови  иареи реиԥылара ахәшьара ҳаракы аиҭеит.

«Аиԥыларақәа бзианы имҩаԥысит. Владимир Путини сареи ҳаиԥылара алҵшәақәа ртәы ҳаԥхьаҟа иаабараны ҳаҟоуп. Сара бжь-зҵаарак шьҭыхит, урҭ зегьы рыла аибибакаара ҳауит», -ҳәа иҳәеит Аслан Бжьаниа.

Ҩ-ҳәынҭқаррак рхадацәа реиԥылара аҿы ишьҭыхыз азҵаарақәа рхыԥхьаӡараҿы иҟан аенергетика, газла аиқәыршәара, агазтә фымцастанциақәа ҩба рыргылара, Гәымсҭа аӡиас ала ацҳа ҿыц аргылареи ажәытә цҳа аиҭашьақәыргылареи Кәыдрытәи аҩхаа аҿы амҩеи атоннельқәеи реиҭашьақәыргылара, иара убас Аԥсны арбџьармчқәа ацхыраара рыҭара, уҳәа убас егьырҭгьы.  

Аҟәа. Жьҭаарамза 19, 2023 шықәса. Аԥсныпресс.  Аԥсны Аҳәынҭқарра Ахада Аслан Бжьаниа, Қырҭтәыла иахьа Аԥсни Аахыҵ Уаԥстәылеи  аибашьра ахацыркра иазыфеиданы иҟаӡам, аофициалтә Қырҭ иарбоу азҵаараҿы апрагматизми аҽаанкылареи аанарԥшуеит ҳәа иазгәеиҭеит.  

Украина Ахада Владимир Зеленски Аԥсни Аахыҵ Уаԥстәылеи реибашьра алагара азы Қырҭтәыла ахь  ааигәа иҟаиҵаз ааԥхьара дахцәажәарц азы Аҟәа ақалақь аҿы имҩаԥгаз апресс-конференциа аҿы иоуз аҳәара аҭак ҟаҵо иҳәеит: «Еилкаау усуп, Зеленскии уи ивагылоу амчрақәеи Алада Кавказ аҭагылазаашьа аруадаҩра ишашьҭоу, ҳригион аҿы ҿыц ишьаарҵәыроу аибашьра ахацыркразы аҽазышәарақәа шыҟарҵо. Украинатәи амчрақәа аконфликт иалаху ргеографиатә мҽхакы арҭбаара, иара убри ала Урыстәылатәи Афедерациа акәша-мыкәша аҭышәынтәалара аиԥҟьара иашьҭоуп. Убри аан урҭ  ари аибашьра  аҿы даара хыԥхьаӡара рацәала аҭынч уааԥсыра, аҳәса, ахәыҷқәа, абыргцәа ҭахар шалшо митәык рхахьы иааргаӡом».

Имҩаԥысит Апарламенти Аԥсны Аҳәынҭқарра Аконтрольтә  Палата анапхгараҭара ахаҭарнакцәеи реиԥылара.

Аҟәа. Жьҭаарамза 18, 2023 шықәса. Аԥсныпресс. Иахьа Аԥсны Жәлар Реизара Апарламент Аиҳабы Лаша Ашәба Аԥсны Аҳәынҭқарра Аконтрольтә палата ахантәаҩы далархәны аиԥылара мҩаԥигеит. Аиԥылара иалахәын Апарламент Аиҳабы ихаҭыԥуаҩ Фазлыбеи Аҩӡба, Асҭамыр Аршба, Ашот Миносиан, Аконтрольтә Палата ахантәаҩы ихаҭыԥуаҩ Зураб Оҭырба.

Аконтрольтә Палата анапхгара аԥсшәа раҳәо, Лаша Ашәба иазгәеиҭеит Каха Пертаиа ахантәаҩы иаҳасабала данышьақәырӷәӷәаха инаркны фымз шыбжьысыз: «Абри аиԥылара мҩаԥгатәуп ҳәа иҳаԥхьаӡеит шәусураҟны иҟоу алҵшәақәа реилкааразы, ҳара, иара убас адепутатцәа ркорпус зҿлымҳара заҳҭо азҵаарақәа рзы иҟашәҵо аҭакқәа ҳаҳарц азы».

Аҟәа. Жьҭаарамза 20, 2023 шықәса. Аԥсныпресс.  Еиду Амилаҭқәа Реиҿкаара ахалыԥшрала аус зуа ахәыҷқәа рзинқәа рыхьчаразы Жәларбжьаратәи аиҿкаара Ахәыҷтәы фонд (UNICEF) Аҟәатәи аофис Ареспубликатә хәышәтәырҭа екстерла амедицинатә цхыраареи аинтенсивтә терапиеи зҭаху ҿыц ииз ахәыҷқәеи апациентцәеи ирызку  иҷыдоу амедицинатә еиқәыршәага ҳамҭас ианаҭеит. 

Ахәышәтәырҭа азы иаахәан ҿыц ииз рзы атранспорттә инкубатор-аҳауарыцқьага, агазқәеи ашьа ахимиатә еилазаареи апортативтә анализатор, акалибратор, акартриџьқәа, уҳәа убас иҵегьы.

Аиқәыршәагақәа аахәоуп жәларбжьаратәи аҿиара азы Еиду Америкатәи Аштатқәа Рагентра афинанстә цхыраара иабзоураны.

Аҟәа. Жьҭаарамза 20, 2023 шықәса. Аԥсныпресс. Жьҭаарамза 21 рзы Аԥсны Аҳәынҭқарратә миграциатә Маҵзура 14 шықәса ахыҵуеит.   

Аҳәынҭқарратә миграциатә Маҵзура аԥҵара Амш аламҭалазы Амаҵзура аҿы хаҭалатәи аилазаара аныҳәатә цәаҳәақәгылара мҩаԥысит.   

Аҳәынҭқарра Ахада Аслан Бжьаниа Иусԥҟала Аҳәынҭқарратә миграциатә Маҵзура аиҳабы ихаҭыԥуаҩ Едуард Гамсаниа  «аполковник» ҳәа  изаамҭанытәиим арратә хьӡы ианашьахеит.  

Аԥсны Аҳәынҭқарратә миграциатә Маҵзура аиҳабы, аинрал-маиор Рамин Габлаиа идҵа инақәыршәаны, «Амаҵзура ибзиаӡаны иназыгӡо» ҳәа аџьшьаратә гәышԥытә дырга  ала иалкаахеит  13-ҩык Аҳәынҭқарратә миграциатә Маҵзура аусзуҩцәа.

«Ԥырашәа змам амаҵзуразы» III аҩаӡара амедал ранашьахеит 11-ҩык ауаа.  

1992 – 1993 шш. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра иазкны имҩаԥгаз апарад иалахәыз 47 –ҩык  Аҳәынҭқарратә миграциатә Маҵзура аруаа аџьшьара рыҭоуп.

Аҟәа. Жьҭаарамза 20, 2023 шықәса. Аԥсныпресс. Жьҭаарамза   20 рзы Гагра ақалақь аҿы Аԥсни Урыстәылеи рыҩныҵҟатәи аусқәа Рминистррақәа аҳәаа иаԥну арегионқәа рыҩныҵҟатәи аусқәа русбарҭақәа ркомитетқәа реилатәара мҩаԥысит.  

Аиԥылара аихшьаалақәа рыла, аганқәа аҳәаа иаԥну арегионқәа рыҩныҵҟатәи аусқәа русбарҭақәа ркомитетқәа аилатәара апкаанҵа  рнапы аҵарҩит. Уи инақәыршәаны, анаҩстәи анапхгарабжьаратәи аусура рконсолидациа алнаршоит, ҳәа адырра ҟанаҵоит аҩныҵҟатәи аусқәа Рминистрра апресс-маҵзура.

Аҟәа. Жьҭаарамза 20, 2023 шықәса. Аԥсныпресс.  2024 шықәсазы, уажәы Шәчеи Гагреи ирыбжьоу афымцадәыӷба «Ласточка» Аҟәанӡагьы иныҟәалоит. Абри азы жьҭаарамза   19 рзы Аҟәа ақалақь аҿы имҩаԥысыз апресс-конференциа аҿы адырра ҟаиҵеит Аҳәынҭқарра Ахада Аслан Бжьаниа.  

Уи азы Аԥсны аҳәынҭқарратә биуџьет ахарџьи Аҳәынҭқарратә Еилакы «Аԥснытәи Аихамҩа» ахархәагақәеи рҟынтәи афинансқәа Гәдоуҭатәи авокзал,  аплатформа «Ԥсырцха», Аҟәатәи авокзал азганк реиҭашьақәыргыларазы иазоужьхоит.

Аслан Бжьаниа иажәақәа рыла, 2026 шықәса аламҭалазы афымцадәыӷба «Ласточка» Очамчыранӡа аныҟәара алыршара азԥхьагәаҭоуп.  

«Урыстәылатәи Афедерациа Ахада Владимир Путин  Китаи имҩаԥысуаз «Жәларбжьаратәи афорум «Один пояс, один путь» аҿы дызлацәажәоз, Мурманск инаркны Иран аҟынӡа «еиԥшьырҭадоу» аихамҩатә еимадаразы «иаку атраспорттә логистикатә каркас» ҳәа изышьҭоу аинфраструктуратә проект   Аԥсны залахәхома ҳәа ажурналист иҟаиҵаз изҵаара аҭак ҟаҵо, Аслан Бжьаниа, макьаназы уи азы иарбанызаалак аӡбамҭақәа ыҟаӡам, аха уи жәаҳәарада ареспублика аинтересқәа ирықәшәо иҟаларын ҳәа иазгәеиҭеит.  

Аҟәа. Жьҭаарамза 20, 2023 шықәса. Аԥсныпресс. Аԥсны жәлар Рџьынџьтәылатәи еибашьра аҿы Аиааира агара Амш  30-шықәса ахыҵреи Урыстәылатәи Афедерациа ала Аԥсны Аҳәынҭқарра ахьыԥшымра азхаҵара ҟалеижьҭеи 15-шықәса аҵреи разгәаҭара иазку еиуеиԥшым аныҳәатә усмҩаԥгатәқәа рымҩаԥгаразы 250 млн. мааҭ инареиҳаны иазоужьхеит. Абри азы жьҭаарамза 19 рзы Аҟәа ақалақь аҿы имҩаԥысыз апресс-конференциа аҿы адырра ҟаиҵеит Аҳәынҭқарра Ахада Аслан Бжьаниа.

«Иҳаҩсыз ашықәс азы ҳара Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра азгәаҭаразы акомиссиа аԥаҳҵеит. Ари акомиссиа ҩажәи быжьба еилатәара мҩаԥнагеит, уи аусура алҵшәа шәара ижәбарц шәылшеит аусмҩаԥгатәқәа шымҩаԥысыз ала. Иазгәаҭатәуп, иазԥхьагәаҭаз аусмҩаԥгатәқәа рыхәҭак ҳазҭоу ашықәс иалагӡаны анагӡара алыршахоит. Иааизакны аусмҩаԥгатәқәа рбиуџьет 250 млн. мааҭ иреиҳахеит», – ҳәа иҳәеит иара.

Аиубилеитә рыцхәқәа раламҭалазы аобиектқәа жәпакы рҿы аиҭашьақәыргыларатә усурақәа мҩаԥган. Урҭ рхыԥхьаӡараҿы иҟоуп Аԥсны Аҳәынҭқарра Актәи Ахада Владислав Арӡынба Имемориал, ақыҭақәа Анхәа, Приморское рҿы Аџьынџьтәылатәи еибашьра аҿы иҭахаз рбаҟақәа рреконструкциа, Ҷлоу, Аӡҩыбжьа, Маркәыла, Кындыӷ ақыҭақәа рҿы  аибашьцәа рбаҟақәа реиҭашьақәыргылара, Ешыра ақыҭан аибашьцәа рбаҟа аргылара. Ақыҭақәа Хәаԥ, Жәандәрыԥшь иҟоу абаҟақәа реиҭашьақәыргылара макьаназы ихыркәшаӡам.

Аҟәа. Жьҭаарамза 20, 2023 шықәса. Аԥсныпресс. «Атуристтә бизнес ду абинес маҷ иаԥырхагоуп ҳәа иҟоу агәаанагара акала ишьаҭаркым. Хыԥхьаӡара рацәала ауаа идуум асасааирҭа ҩнқәа гәахәарыла ирҭаалоит. Иарбан тауарзаалакгьы ахатәы аахәаҩ дамоуп». Абри азы жьҭаарамза 19 рзы Аҟәа ақалақь аҿы имҩаԥысыз апресс-конференциа аҿы аҳәамҭа ҟаиҵеит Аҳәынҭақарра Ахада Аслан Бжьаниа.  

Аҵыхәтәантәи аамҭазы активла зыргылареи зеиҭашьақәыргылареи мҩаԥганы аусура иаладырго атуристтә обиект дуқәа абизнес маҷ иаԥырхагаӡами ҳәа ажурналист изҵаара аҭак ҟаҵо, Аҳәынҭқарра Ахада иҳәеит:  

«Шәара ижәдыруама иахьа Шәача ақалақь иаднакыло атуристцәа рхыԥхьаӡара ахьынӡанаӡо атәы? Араҟа иҟоу атуристтә обиект дуӡӡақәа рнаҩсгьы ихәыҷу асасааирҭатә ҩнқәагьы ыҟоуп, ауадақәагьы қьырала ирырҭоит. Иаагозар, Шәача иҳаҩсыз ашықәс азы иаднакылаз атуристцәа рхыԥхьаӡара 7,2 милион-ҩык рҟынӡа инаӡоит. Ижәдыруама ҳара шаҟаҩы атуристцәа ҳадаҳкыло? Ҳазҭоу ашықәс атуристтә аамҭахәҭа аихшьаалақәа рыла, иҳадаҳкылар ҟалап  600 нызықьҩык, арахь иаҵанакӡом мышкыҳәа ҳтәыла иаҭааз.  Ҳара иҳамоуп ҳхы зқәаҳкыша. Ҳотель хәыҷқәа зегьы аԥхынразы иҭәын. Ҳара иҳамаӡам зыхәԥса ҳараку аелитатә отельқәа рсегмент, убри ауп аиҳарак аус злоу», –  ҳәа иҳәеит Аслан Бжьаниа.