Ари амҩа ареконструциа арегион ашҟа атранспорт ала анаӡара акы иармариоит. Уаанӡа Ҭҟәарчалынтәи Аҟарамаранӡа амҩаданыҟәагақәа рыла сааҭки бжаки раҟара амҩа уқәхозҭгьы уажәы, аусурақәа зегьы шынагӡамгьы, амҩа ақәзаара  аамҭа 30 минуҭ рҟынӡа икьаҿхеит. Уимоу, шьҭа атуристтә обиектқәа рҟынӡа иласу автомашьына, мамзаргьы атуристтә микроавтобус ала унаӡар алшоит.

Иҟалаз хра злоу аиҭакрақәа азгәарҭахьеит Ҭҟәарчал араион ауааԥсыреи атуристтә обиектқәа русзуҩцәеи.

«Уаанӡа ҳара аусурахь амҩа ҳақәхон сааҭк еиҳаны, уажәы акәзар ари амҩа 20 минуҭ рыла ҳанысуеит. Ари акыр иармариеит есыҽнытәи ҳаԥсҭазаара», - ҳәа лгәаанагара лҳәеит  ақьафурҭа «Иԥшьоу аӡхыҽҽа аҿаԥхьа» («У святого водопада») аҿы ахәыҭаҩыс аус зуа Оксана Ҭарба.

«Ҳара есымша иҳаҳауан арахь аара акырӡа иуадаҩуп ҳәа, аха уажәы ҳара арахь ҳааит зынӡа џьара уадаҩрак ҳмоуӡакәа ҳхатәы иласу автомашьына ала.  Араҟа убла хызхуа аҭыԥқәа рацәаны иҟоуп, даараӡа ибзиоуп шьҭарнахыс урҭ рбара азы ирацәаҩны алшара ахьроуа», - ҳәа игәаанагара иҳәеит Екатеринбург ақалақь аҟынтәи иааз атурист.

Аҭыԥантәи ауааԥсыра рзы амҩа ҿыц ҳамҭа дуны иҟалеит. Аҟармара аҳабла ааигәара инхо Анастасиа Тамашева, уаанӡа аҩнынтәи Ҭҟәарчалынӡа анаӡара акырӡа иуадаҩын ҳәа еиҭалҳәеит.

«Уажәы, амҩа аиҭашьақәыгылареи акаҭран ашьҭаҵареи рышьҭахь, иааиԥмырҟьаӡакәа ареистә автобус аныҟәара иалагеит», - ҳәа илҳәеит лара.

Ҭҟәарчали Аҟармареи еимаздо амҩа аиҭашьақәыргылара арегион атранспорттә еиқәыршәара аиӷьтәра адагьы, Мрагыларатәи Аԥсны аҿы атуризм аҿиаразы иҿыцу аперспективақәа аанартуеит.

Ҭемыр Ҵәыџьба иҟаиҵаз адыррақәа рыла, апроект ахарџьынҵа - 219 миллион мааҭ рҟынӡа инаӡоит. Афинансыркра Урыстәылатәи Афедерациа Аинвестициатә программа инақәыршәаны имҩаԥысуеит.