Аҟәа. Ԥхынгәымза 8, 2024 шықәса. Аԥсныпресс. Аҭаацәареи, абзиабареи, агәрагареи рымш аҽны Аҟәа, Урыстәыла Ацҳаражәҳәарҭаҿы Аԥснытәи аҭаацәарақәа быжьба амедалқәеи аҳаҭыртә шәҟәқәеи рырҭеит.
2024 шықәсазы иалкаахеит аҭаацәарақәа быжьба. Витали Қьиаазым-иԥеи Хаҭуна Владимир-иԥҳаи Смыраа 2023 шықәсазы аҳамҭақәа ранашьара иазкыз аныҳәатә церемониа рхы рзалмырхәӡеит, убри аҟнытә урҭ амедали аҳаҭыртә шәҟи иахьа иранаршьеит.
Аԥсны иҟоу Урыстәыла ацҳаражәҳәаҩ Михаил Шургалин аҭаацәарақәа Аҭаацәареи, абзиабареи, агәрагареи Рымш рыдиныҳәалеит.
«Ҳара гәахәарыла иҳадаҳкылоит акыр шықәса, 40, 50 шықәса иреиҵамкәа абзиабареи агәреибагареи аарԥшуа еицынхо ауаа рыбжьара ари аныҳәа шьахә азгәаҭара азы алшара ахьҳауз», - ҳәа иҳәеит Михаил Шургалин.
Витали Қьиаазым-иԥеи Хаҭуна Владимир-иԥҳаи Смыраа 33 шықәса ҵуеит еимоуижьҭеи.
Шьалуа Ҷыҭанааи уи иԥшәма Аллеи — аҭаацәа аԥырҵеижьҭеи иҵуеит 51 шықәса.
Алеқсеи Папасқьыри уи иԥшәма Валентинеи аҭаацәара иалалеижьҭеи иҵуеит — 52 шықәса.
Хачик Дикран-иԥеи Нвард Мигран-иԥҳа Минасианаа еимоуижьҭеи иҵуеит — 52 шықәса.
Иурии Иван-иԥеи Зинаида Николаи-иԥҳа Иакушкинаа рҭаацәара иахыҵуеит — 54 шықәса.
Иван Самсон-иԥеи Валентина Пиотр-иԥҳаи Багаевваа рразҟы еиларҵеижьҭеи – 56 шықәса ҵуеит.
Алексеии Валентинеи Вартикианаа, рҭаацәара 61 шықәса ахыҵуеит.
Аҳамҭақәа занашьахаз Иакәышкинаа хаҵеи ԥҳәыси Аԥсныпресс акорреспондент иҿцәажәо рҭаацәаратә насыԥ маӡас иамоу атәы еиҭарҳәеит. Урҭ ражәақәа рыла, аҭаацәараҿы аҳәоуеиқәшәареи анасыԥи ҟаларц азы зегьы ирыцку аҳаҭырқәҵареи аилибакаареи роуп: «Зегьы раԥхьаӡа иргыланы хаҵеи ԥҳәыси агәреибагара рыбжьазароуп, бзиа еибабозароуп, ҳаҭырқәҵарала еизныҟәазароуп».
«Ҳара хҩык ахшаареи хәҩык амаҭацәеи ҳамоуп», - ҳәа еиҭалҳәеит Зинаида Иакушкина.
Аԥсны иҟоу Урыстәыла аус ацуразы Ахаҭарнакра ахада Дмитри Федотов 2009 шықәса раахыс Аԥсны «Абзиабареи агәрагареи рзы» амедалқәа ранаршьахьеит 50 ҭаацәара инареиҳаны ҳәа иазгәеиҭеит.
«Аԥсны ҳара ианакәызаалак иаҳцәыуадаҩуп аҭаацәарақәа ралкаара, избан акәзар абзиабареи агәреибагареи аҳәоуеиқәшәареи аарԥшуа араҟа инхоит Аԥсны ауааԥсыра реиҳарак», - ҳәа инаҵшьны иазгәеиҭеит Дмитри Федотов.
Аԥсны аҵарадырра аминистр Инал Габлиа убасҵәҟьа акыр шықәса еицынхо аҭаацәарақәа ари аныҳәамш рыдиныҳәалеит, уи аҭаацәа –зегьы ирыцкуп, аҭаацәа иарбанызаалак аҳәынҭқарра злашьаҭарку ауп ҳәа иазгәеиҭеит. Инал Габлиа иара убас сынтәа Ареспублика Ҭаҭарсҭан имҩаԥысуаз аҵара аминистрцәа рфорум аҿы Аԥсны аҵарадырра Аминистрреи Ахәыҷреи аҭаацәареи ааӡареи Ринститути аусеицуразы Аиқәшаҳаҭра рыбжьарҵеит ҳәа адырра ҟаиҵеит.
«Дара аҭаацәара аинститут арӷәӷәараҿы ацхыраара ҳаҭара иазхиоуп. Ҳара хыдҵаны иҳамоуп ианраамҭоу аҭаацәа бзиа аԥызҵо ахәыҷқәа рааӡара. Ҳара иарбоу ахырхарҭала активла аус аауеит», - ҳәа иҳәеит Инал Габлиа.
Иара убас аҭаацәа ирыдныҳәалеит Аԥсны аҵарадырра аминистр ихаҭыԥуаҩ Ада Кәарҷелиа, Аԥснытәи Аиашахаҵаратә уахәама ахада Аиереи Виссарион (Аԥлиаа), Аԥсны абыргцәа Рхеилак ахантәаҩы Аполлон Думаа, Аԥсны ажурналистцәа Реидгыла ахантәаҩы, Ауаажәларратә Палата алахәыла Руслан Ҳашыг.
Аҭаацәареи, абзиабареи, агәрагареи рымш шьаҭаркын Владимир Путин идҵала 2022 шықәсазы. Аҳамҭақәа рырҭоит зҭаацәара 25 шықәса еиҵамкәа иахыҵхьоу хаҵеи ԥҳәыси – зыхшара ауаажәларра иаԥсаны ирылазыргылаз, аҭаацәаратә традициақәа ирықәныҟәо.
