Аҟәа. Жьҭаарамза 25, 2023 шықәса. Аԥсныпресс. Афедерациа Ахеилак апленартә еилатәара аҿы Урыстәылатәи Афедерациа аҟынтәи аҳазылхратә баџь ахшәаарада Аԥсны Аҳәынҭқарра аҳазылхратә ҵакыра ахь ииагахо атауарқәа рсиа апропан ҳәа изышьҭоу агаз алагалара азы Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра аиҭакрақәа ралагалара азы Апкаанҵа аратификациа азы азакәан адкылара иақәшаҳаҭхеит, ҳәа адырра ҟанаҵоит  Аинформациатә Агентра «ТАСС».

«Лаҵарамза 28,  2012 рзы «Атауарқәа рыла ахәаахәҭра арежим азы Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра» аиҭакрақәа ралагалара азы Апкаанҵа анапаҵыҩра мҩаԥысит лаҵарамза  16, 2023 шықәса рзы Москва ақалақь аҿы. Уи Урыстәылатәи Афедерациа аҟынтәи аҳазылхратә баџь ахшәаарада Аԥсны Аҳәынҭқарра аҳазылхратә ҵакыра ахь иалагалахо атауарқәа рсиа  апропан ҳәа изышьҭоу агаз ацҵара  азԥхьагәанаҭоит.

Аҟәа. Жьҭаарамза 25,  2023 шықәса. Аԥсныпресс.  Аԥсны Жәлар Реизара-Апарламент жәларбжьаратәи, апарламентбжьаратәи аимадарақәеи аидгьылуаа рымадареи рзы апарламенттә Еилакы аилатәараҿы «Лаҵарамза 28,  2012 рзы «Атауарқәа рыла ахәаахәҭра арежим азы Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра» аиҭакрақәа ралагалара азы Апкаанҵа» аратификациа азы» Аԥсны Аҳәынҭқарра азакәан апроект  иахәаԥшит.

Ари азакәан апроект аҿы Урыстәылатәи Афедерациа аҟынтәи аҳазылхратә баџь ахшәаарада Аԥсны Аҳәынҭқарра аҳазылхратә ҵакыра ахь иалагалахо атауарқәа рсиа ацҵара азы аԥшьгара ҟаҵоуп. Араҟа, ахәҭакахьала излацәажәо агаз пропан ауп. 

Аҟәа. Жьҭаарамза 25, 2023 шықәса. Аԥсныпресс.  Апрокурор Хада Адгәыр Агрба аӡбаҩцәа Рыквалификациатә коллегиа ахь Ҭҟәарчалтәи аӡбарҭа аӡбаҩ – Ҭҟәарчалтәи араионтә ӡбарҭа ахантәаҩы инапынҵақәа назыгӡо аӡбаҩ Ажьиба Викториа Рудольф-иԥҳа лганахьала ашшԥхьыӡ дәықәиҵеит.

Апрокуратура Хада аофициалтә саит аҿы иҟоу адыррақәа рыла, ашшԥхьыӡ дәықәҵоуп Ажьиба В.Р. лхантәаҩрала ақәҵарақәеи азыӡбақәеи рыдкылараан ашьустә закәанеидкылеи ашьаусҩаԥгаратә закәанеидкылеи реилагара аарԥшра инамаданы.

Аҟәа. Жьҭаарамза 25, 2023 шықәса. Аԥсныпресс. Жьҭаарамза  23 рзы Очамчыра ақалақь аҿы апроект «Агәабзиара иазеиӷьу аԥсҭазаашьа» аҳәаақәа ирҭагӡаны ақалақь ашколқәа хԥа аиҳабыратәи аклассқәа рзы атренинг актәи амодуль хыркәшахеит.  Агәабзиара иазеиӷьу аԥсҭазаашьа азы атренингқәа ашколқәа рҿы имҩаԥыргоит уи азы адырра змоу ашкол арҵаҩцәа. Убри аан урҭ рхы аладырхәуеит аҿартә еиҿкаара «IQan» аусзуҩцәагьы. Апроект ихадоу ахықәкы – аҿар рыҩныҵҟа ашьцылара бааԥсқәа мап рыцәкра алыршара ауп, ҳәа адырра ҟаҵоуп Феисбук аҿы  «IQan» адаҟьа аҿы.  

Атренинг аҿы ашколхәыҷқәа ирзеиҭарҳәеит агәабзиара заку, аԥсҭазаашьа, иааҳакәыршаны иҟоу аԥсабара, ашьҭрамҭа, агәабзиарахьчара, уҳәа агәабзиара ахьчараҿы инанагӡо ароль атәы, иара убас ирацәаны аинтерес зҵоу аинформациа рыларҵәан.

Аҟәа. Жьҭаарамза 25, 2023 шықәса. Аԥсныпресс.  Аҳәынҭқарратә шәарҭадара Амаҵзура акоманда – Аԥсны аминистрррақәеи ахылаԥшырҭақәеи ркомандақәа рыбжьара ашьапылампыл-маҷ азы аспорт абзиабаратә турнир аҿы ҩынттәны аиааира агеит, ҳәа адырра ҟанаҵоит Аԥны аҿари аспорти русқәа рзы Аҳәынҭқарратә Еилакы.

Жьҭаарамза 24 рзы Аҟәа ақалақь аҿы ихыркәшахеит аминистрррақәеи ахылаԥшырҭақәеи ркомандақәа рыбжьара ашьапылампыл-маҷ азы аспорт абзиабаратә турнир.  Атурнир рхы аладырхәит 18 командак, урҭ «илашәу» аҵәҭаԥсарала агәыԥқәа рыла еихшахеит.

Мчыбжьык иалагӡаны ашьапылампыласыҩцәа есыҽны аицлаблара иаҿын, акәаталақәа еизыргон, еиҳа-еиҳа афинал иазааигәахон.

Аҟәа. Жьҭаарамза 25, 2023 шықәса. Аԥсныпресс. Атәыла аԥыза-министр Алеқсандр Анқәаб шьаҭанкылатәи аргыларазы Аусбарҭа анапхгаҩы Ҭемыр Агрба далархәны 2023-2025 шш. Аинвестпрограмма ала иазԥхьагәаҭоу аусмҩаԥгатәқәа рынагӡара аетапқәа, аминистрцәа Реилазаара аҿы 2023 шықәсазы ишьақәырӷәӷәоу асиа инақәыршәаны, еиуеиԥшым аобиектқәа рҿы аргылара-еиҭашьақәыргыларатә усурақәа рынагӡара, иара убас Аҳәынҭқарра Ахада Ирезервтә фонди аминистрцәа Реилазаара Арезервтә фонди рҟынтәи иазоужьыз аԥаратә хархәагақәа рыла  аиҭашьақәыргыларатә усурақәа рынагӡара шымҩаԥысуа далацәажәеит. 2023-2025 шш. Аинвестициатә программа ала 2023 шықәсазы рынагӡара азԥхьагәаҭоуп 24 усмҩаԥгатә. Урҭ рхарџь азеиԥш еицҵалыҵ 1 млрд. 215 млн. мааҭ рҟынӡа инаӡоит. Зфинанстәра мҩаԥгоу, зеиҭашьақәыргыларагьы ахыркәшарахь инеихьоу аобиектқәа ирықәхарџьу аԥаратә хархәагақәа рзеиԥш еицҵалыҵ 900 млн. мааҭ рҟынӡа инаӡоит, егьырҭ иаанхаз аусурақәа рфинанстәра ҳазҭоу ашықәс нҵәаанӡа  имҩаԥгахоит.  

Ԥсоуи Аҟәеи еимаздо амҩаду авариатә хәҭақәа рҿы аҵаргәатә ҭыӡқәа шьаҭанкыла реиҭашьақәыргылара хыркәшахоит, хара имгакәа аҵыхәтәантәи иаанхаз ахԥатәи атрасса ахәҭа ахархәарахь ирыҭахоит. Астанцеиҵа «Алаҳаӡы» ҳазҭоу ашықәс нҵәаанӡа ареконструкциа анхыркәшахалак ашьҭахь етап-етапла амчхара 20 инаркны 80 МВт аҟынӡа ишьҭыххоит, астанцеиҵа «Бзыԥ» амчхара – 125 инаркны 250 МВт. рҟынӡа.

Гәдоуҭа ақалақь аҿы х-мҩадук рҿы аиҭашьақәыргыларатә усурақәа нагӡоуп, иарбоу аобиектқәа ахархәарахь ирыҭоуп. Ԥсоуи Аҟәеи еимаздо автомҩа арлашаратә усурақәа мҩаԥысуеит, урҭ ҳазҭоу ашықәс нҵәаанӡа ихыркәшахароуп.

Аҟәа. Жьҭаарамза 25, 2023 шықәса. Аԥсныпресс. Гагра ақалақь, Абазгаа рымҩа аҿы ахәыҷбаҳча ажәытә хыбра шьаҭанкылатәи аиҭашьақәыргылара хыркәшахоит. Ари ахҭыс ақалақь аҿы иазыԥшыижьҭеи акрааҵуеит. Ахәыҷбаҳча ахыбра ҿыц аҿы ирыдыркылар алшоит шә-ҩык рҟынӡа ахәыҷқәа, ҳәа адырра ҟанаҵоит Гагра–ТВ.

Ари ахыбраҿы иахьазы аусурақәа рӷьырак ҟаҵоуп, уажәы иаанхаз аҩычаратә усурақәа роуп. Иарбоу аиҭашьақәыргалыратә усурақәа рынагӡаразы иазоужьын 42 млн. 760 нызықь мааҭ.  Ашықәс  нҵәаанӡа иазԥхьагәаҭаз аусурақәа зегьы хыркәшахоит.

Аҟәа. Жьҭаарамза 24, 2023 шықәса. Аԥсныпресс. Очамчыратәи абжьаратәи ашкол №2 аҿы STEM ашьаҭала иаԥҵоу аҵарадырратә Центр аадыртит.  Араҟа имҩаԥслоит STEM ашьаҭала зыдгалара мҩаԥгахо аҵарадырратә программа ала аҵара, ҳәа адырра ҟанаҵоит Еиду Амилаҭқәа Реиҿкаара Ахәыҷтәы Фонд (ЮНИСЕФ) Аҟәатәи аофис.

STEM – ари аҵара апроцесс аинтеграциатә знеишьа азԥхьагәазҭо, анаукатә, атехникатә, иара убас анџьныртә хырхарҭақәа еидызкыло иаку аҵаратә процесс ауп.  STEM-лабораториақәа ашколқәа рҿы раартра хықәкы хадас иамоуп ашколхәыҷқәа ироуз атеориатә дыррақәа рхархәаразы аԥышәатә зыҟаҵарақәа рымҩаԥгара алыршара.  

Аҵарадырратә центр аиҭашьақәыргылареи иахәҭоу аиқәыршәагақәа рыла реиқәыршәареи Европатәи атәылақәа Реидгыла афинанстә цхыраарала Еиду Амилаҭқәа Реиҿкаара Ахәыҷтәы Фонд (ЮНИСЕФ) Аҟәатәи аофис ала  имҩаԥган.

Аҟәа. Жьҭаарамза 24, 2023 шықәса. Аԥсныпресс.  Аҩныҵҟатәи аусқәа Рминистрреи Аҳәынҭқарратә шәарҭадара Амаҵзуреи ркомандақәа Аԥсны аминистррақәеи ахылаԥшырҭақәеи ркомандақәа рыбжьара ашьапылампыл-маҷ азы аспорт абзиабаратә турнир афинал аҿы еиԥылоит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.

Актәи афиналбжа аҿы атәыла аҩныҵҟатәи аусқәа ркоманда акыр аибарххара зцыз аиндаҭлара аҿы асчиот – 1:2 ҳәа аҿари аспорти русқәа рзы аҳәынҭқарратә Еилакы акоманда иаиааит.

Аҟәа. Жьҭаарамза 24, 2023 шықәса. Аԥсныпресс. Колумбииа, Барранкилиа ақалақь аҿы ихыркәшахеит адомино азы IV адунеи ачемпионат. Уи ахы аланырхәит Аԥсны акоманда.  

Атурнир мҩаԥысуан жьҭаарамза 15 – 22, 2023 шықәа рзы. Ари Колумбиа раԥхьаӡа имҩаԥысуа адунеи ачемпионат ауп, «Femundo» аверсиа аҭоурых аҿы акәзар уи аԥшьбатәи ачемпионат ауп. Адунеи зегьы аҟынтәи  400-ҩык инареиҳаны алахәылацәа аиндивидуалтәи ҩыџьа-ҩыџьалатәи аразриад аҿы еиндаҭларц азы Барранкилие ақалақь аҿы аотель El Prado еизеит.

Аԥснытәи акоманда аилазаара нагӡаны ачемпионат ахь  изымааӡеит, избан акәзар, акоманда ахәмарыҩ хада уи аамҭазы Лас-Вегас имҩаԥсуаз домино азы адунеи ачемпионат далахәын. Ус ишыҟазгьы, аԥснытәи акоманда ибзиоу алҵшәақәа аанарԥшит, уи колумбиатәи ателехәаԥшра ажурналистцәеи арепортиорцәеи рылаԥш иҵамшәакәа иаанымхеит. Аԥсны еизгоу акоманда иазкны ҷыдала арепортаж ҟарҵеит. Акоманда ақаԥдани азыҟаҵаҩи Саид Ашәба El HERALDO акорреспондент диҿцәажәо иазгәеиҭеит: «Атурнир даара иҳараку аҩаӡараҿы еиҿкаауп. Сара даара сеигәырӷьоит ҳкоманда уи ахьҽаланархәуа. «Ла Арносу» ахь схы рханы иҭабуп ҳәа сҳәар сҭахуп адкылара бзиаӡа азы, аҭак аҳасабала сыԥсадгьыл ахь ааԥхьарагьы ҟасҵоит», – ҳәа иҳәеит иара.