Аҟәа. Ԥхынгәымза 8, 2024 шықәса. Аԥсныпресс. Аԥсны Аҳәынҭавтоинспекциа аҟны атәыла амҩадуқәа рҿы ишьақәгылаз аҭагылазаашьа иазкны аусуратә еилатәара мҩаԥысит, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Уи рхы аладырхәит аҩныҵҟатәи аусқәа рминистр, амилициа аинрал-маиор Роберт Киути уи ихаҭыԥуаҩ, Аҳәынҭавтоинспекциа аусура ахылаԥшра азҭо, амилициа аполковник Беслан Ҷкадуеи.
Аҩныҵҟатәи аусқәа Рминистрра анапхгараҭара амҩа-транспорттә машәыртә хҭысқәа ирыдҳәаланы ишьақәгылаз аҭагылазаашьа уадаҩуп, уимоу, даараӡа ашәарҭара аныԥшуеит ҳәа ахәшьара арҭеит. Астатистика инақәыршәаны иҟало авариақәа аиҳарак изыхҟьо амашьынарныҟәцаҩцәа рхымҩаԥгашьа ауп.
«Ииасыз амчыбжь иалагӡаны хәҩак ауаа ҭахеит амҩатә машәырқәа рҿы. Урҭ хадаратәла ҿарацәоуп, амашәырқәа реиҳарак мзызс ирымаз арыжәтә ыжәны амашьына аԥсҟы акроуп. Амашьынарныҟәцаҩцәа рменталитет аганахьала аидеологиатә усура мҩаԥысуеит, аха уи ирласны алҵшәақәа аанарԥшӡом. Аҷыдалкаатә усмҩаԥгатәқәа мҩаԥгатәуп!», - ҳәа иҳәеит Аԥсны Аҳәынҭавтоинспекциа аҟны имҩаԥысуаз аилацәажәараҿы аҩныҵҟатәи аусқәа рминистр Роберт Киут. Уи иажәақәа рыла, еиуеиԥшым ахырхарҭақәа рыла активла ауснагӡатәқәа мҩаԥгатәуп, аиҳарак аинспекторцәа уахынла русура рӷәӷәатәуп.
Аҳәынҭавтоинспекциа асистема аҿы аус зуа аусзуҩцәа доусы хаҭа-хаҭала амҩа-транспорттә машәырқәа рганахьала ишьақәгылаз аҭагылазаашьа уадаҩ азы аҭакԥхықәра рыдуп ҳәа иазгеиҭеит аминистр ихаҭыԥуаҩ Беслан Ҷкадуа. Уи инапхгара аҵаҟа иҟоу аусзуҩцәа зегьы русура анагӡара еиҳа ҭакԥхықәрала профессионалла иазнеиларц азы адҵа риҭеит. Иара убас амилициа аполковник Беслан Ҷкадуа аҩныҵҟатәи аусқәа русбарҭақәа араионтә ҟәшақәа реимадареи русеицуреи еиҳагьы арӷәӷәара хымԥадатәиуп ҳәа инаҵшьны иазгәеиҭеит.
Атәыла аҩныҵҟатәи аусқәа Рминистрра аҿы амҩақәа рҿы аҭагылазаашьа узыцәшәашоуп ҳәа иазгәарҭоит, ахылаԥшра акәзар, иԥсыҽны ирыԥхьаӡоит. Аминистр ихаҭыԥуаҩ Беслан Ҷкадуа иажәақәа рыла, аусура рӷәӷәахоит абри аганахьала, араионқәа зегьы рыҟны апатрульқәа аус рулоит арыжәтә ыжәны амашьына иақәтәоу раанкыларазы.
Аилатәара аихшьаалақәа рыла, Аҳәынҭавтоинспекциа аусзуҩцәа араионтәи ақалақьтәи аҟәшеиҵақәа зегьы русура арӷәӷәареи амашьынарныҟәцаҩцәа аԥҟарақәа ишрықәныҟәо ахылаԥшреи, ҷыдала ижәны амашьына аԥсҟы зку раанкылареи рахьырхәреи азы азԥхьанҵа рыҭоуп.
