Аҟәа. Цәыббрамза 9, 2022 шықәса. Аԥсныпресс.  Урыстәылатәи Анаукақәа Ракадемиа Сибратәи аҟәша Анаука-ҭҵааратә центр «Аекологиа» аусзуҩцәеи агеофизикеи анефтегазтә геологиеи Ринститут (Новосибирск)  аусзуҩцәеи Аԥсны иҟоу анџьныртә шьақәгылагақәа (ахыбрақәа) рыҭҵаара мҩаԥыргеит. Урҭ рхыԥхьаӡараҿы иҟоуп XIX ашәышықәсазы иргылаз Афонҿыцтәи аберҭыԥ, ҳәа  Урыстәылатәи Анаукақәа Ракадемиа Сибратәи аҟәша аҭыжьымҭа «Наука в Сибири» ахь азхьарԥш ҟаҵо адырра ҟанаҵеит ИНТЕРФАКС. 

Аберҭыԥ гылоуп ашьха ашьапаҿы, уи иакымкәа-иҩбамкәа ахыбрақәа аҵанакуеит. Агеофизикатә усурақәа рымҩаԥгара иалҵшәаны урҭ  инхаз рресурс ашьақәыргылара алыршахеит.  

Акомплекс аҟазаара аҭыԥ адгьылҳәазара ашәарҭара ацуп, уи ахьгылоу адгьыл аҵан иҟоуп иахыкәыршоу аҭарбаратә тоннельқәа – араҟа аӡы амазаара афундамент ҵнаӡәӡәаалар уи аҟацара иаԥырхагахар алшоит.

Аҵарауаа асеисмикатә методи аелектромографиа ҳәа изышьҭоу аметоди рхы иадырхәон.  

Аҟәа. Цәыббрамза 9, 2022 шықәса. Аԥсныпресс.  Аԥсны аԥыза-министр Алеқсандр Анқәаб аҳәынҭқарратә еилазаара «Аԥсныргылара» адиректор Руслан Тәанбеи Очамчыратәи ашәаҳәареи акәашареи рансамбль «Ерцыхә» асахьаркыратә напхгаҩы Вианор Логәуеи дырԥылеит.

Аԥсны аминистрцәа Реилазаара аофициалтә саит иҟанаҵо адыррақәа рыла, аиԥылара аҿы Очамчыра ақалақь аобиектқәа руак аҿы аиҭашьақәыргыларатә усурақәа рымҩаԥгара ахымԥадатәра азҵаара ықәгылан. Иарбоу аобиект аҿы 400 кв. метр рҟынӡа инаӡо ансамбль азы  арепетициатә зал аиҿкаара иақәнаго ауада ыҟоуп.

Уи азы аҳәара зныз ашәҟәы Аҳәынҭқарра Ахада Аслан Бжьаниа ихьӡала идәықәиҵахьан Очамчыра араион ахада Беслан Бигәаа.

Аҟәа. Цәыббрамза 9, 2022 шықәса. Аԥсныпресс. Цәыббрамза 9 рзы, Ҟабарда-Балкариа административтә ҳәааҿы Аслан Бжьаниа хадара ззиуа аԥснытәи аделегациа даԥылеит Ҟабарда-Балкариатәи Ареспублика Аиҳабыра ахантәаҩы ихаҭыԥуаҩ Муаед Кәнижев.

Асасцәа ачеиџьыка рнапы иқәҵаны, амилаҭтә кәашарақәеи ашәақәеи рыла ирԥылеит.

Анаҩс, Аслан Бжьаниеи аԥсуа делегациа алахәцәеи Баксан ақалақь аҟны ар рԥыза Сулҭан Сосналиев инышәынҭра иаҭааит, ара ашәҭшьыҵәрақәа шьҭарҵеит. «Сулҭан Сосналиев аҟабарда жәлар мацара дырҵеиӡам, Кавказ зегьы даҵеи лашоуп. Ҳҳәынҭқарра ашьақәгылараҿы уи иааникыло аҭыԥ ахә ашьара уадаҩуп, уи ҳара ҳмилаҭтә фырхаҵа иоуп. Даара ҳизгәыдууп. Уи ихьӡ ҳазгәдуны ҳхәыҷқәеи, еизҳауа абиԥарақәеи ирызнаҳгалоит», - ҳәа иҳәеит Аԥсны Аҳәынҭқарра Ахада Аслан Бжьаниа.

Аҟәа. Цәыббрамза 9, 2022 шықәса. Аԥсныпресс. Гәдоуҭа ақалақь аҿы аиҭашьақәыргыларатә усурақәа рынагӡараан машәырла дҭахеит Абжьаратәи Азиантәи аусуразы иааз агастарбаитер.

Иҟоу адыррақәа рыла, ахаҵа звольҳараку афымцацәаҳәа аҽаԥшьра иҽшазишәоз аток исын аӡыргатә ԥырак дахаҳаит, ҳәа иаанацҳауеит Иҷыдоу аҭагылазаашьақәа рзы Аминистрра апресс-маҵзура.

Амашәыртә хҭыс ахьыҟалаз аҭыԥ ахь инеиз Иҷыдоу аҭагылазаашьақәа рзы Аминистра аусзуҩцәа иҭахаз иԥсыбаҩ автоҳар ала ибааганы Гәдоуҭатәи ахәышәтәырҭа ахь инаргеит. 

Аҟәа. Цәыббрамза 9, 2022 шықәса. Аԥсныпресс. Аԥсны Аҳәынҭқарра Ахада Аиааира амш аламҭалаз Ҟарачы-Черқьесиатәи Ареспублика  хатәгәаԥхаралатәи аибашьцәа дырԥылеит.

Цәыббрамза 9 рзы Аԥсны Аҳәынҭқарра Ахада Ҟарачы-Черқьесиатәи Ареспубликахь иусуратә ныҟәара аҳәаақәа ирҭагӡаны ауаажәларра, Аԥсны Аџьынџьтәылатә еибашьраҿы хатәгәаԥхарала еибашьуаз, аветеранцәа, иҭахаз рҭаацәа дырԥылеит.

«Сара акрааҵуан аара сгәы иҭеижьҭеи, аха аҿкычымазара иахҟьаны апланқәа зегьы рҽырыԥсахыр акәхеит. Иахьа, ара сыҟоуп, зегьы хаҭа-хаҭала шәгәеисыбжьы саҳауеит. Шәзыӡырҩра, шәгәы иҵхо азҵаарақәа рҭак аҟаҵара сазхиоуп», - ҳәа  иҳәеит Аԥсны Аҳәынҭқарра Ахада.

Аҳәынҭқарра Ахада иара убас иазгәеиҭеит арахь иаара ҳазҭоу амзазы Аԥсны иазгәарҭо Аиааиреи Ахьыԥшымреи рымш ишадҳәалоу. Аҳәынҭқарра Ахада иқәгылараҿы ҷыдала дахцәажәеит хатәгәаԥхарала еибашьуаз Аиааира агараҿы рлагала.

«Аԥсны жәлар иргәалашәоит, ахәгьы ҳаракны иршьоит Нхыҵ Кавказ ҳаиашьаратә республикақәа рхаҭарнакцәа рфырхаҵара.  Хатәгәԥхаралатәи аиҿкаарақәа Аиааира агараҿы рлагаламҭа ахә ашьара уадаҩуп», - ҳәа инаҵшьны иазгәеиҭеит Аԥсны Аҳәынҭқарра Ахада.

Аҟәа. Цәыббрамза 9, 2022 шықәса. Аԥсныпресс.  Аԥсны Аҳәынҭқарра Ахада Аслан Бжьаниеи аԥсуа делегациа алахәцәеи Ҟарачы-Черқесиа, аул Хабез аҟны Леон Иорден акавалер  Мусса Дауров инышәынҭра иаҭааит, ҳәа иаанацҳауеит Аԥсны Аҳәынҭқарра Ахада ипресс-маҵзура.

Аҟәа. Цәыббрамза 9, 2022 шықәса. Аԥсныпресс.  Цәыббрамза 25 рзы Аҟәа ақалақь аҿы раԥхьаӡатәи аԥсуа романист Иван Гьаргь-иԥа Папасқьыр диижьҭеи 120-шықәса аҵра инамаданы имҩаԥысуеит IX Жәларбжьаратәи аҿартә  арт-фестиваль «Аԥшаҳәаҿы анеиааира».

«Афестиваль ахықәкы хада – еиҳарак аҿар рыбжьара аԥхьара, ашәҟәқәа, алитературатә ҟазара апропагандеи апопулиаризациеи ауп; аинтеллектуалтә ҿиара азы зегьы реиҳа иманшәалоу, иазку аҭыԥ аҳасабала абиблиотекақәа рпопулиаризациа», - ҳәа Аԥсныпресс акорреспондент диҿцәажәо иҳәеит И. Гь. Папасқьыр ихьӡ зху Амилаҭтә библиотека анапхгаҩы  Борис Ҷолариа.

Уи иажәақәа рыла, иарбоу ахықәкы анагӡаразы, Аԥсны ауааԥсыреи уи иаҭаауа асасцәеи афестиваль алахәхаразы радыԥхьалара азы еиуеиԥшым аформақәеи аметодқәеи рхархәара алыршоуп, акульура, аҟазара, ажәлар рҟазара еиуеиԥшым ажанрқәа зныԥшуа афестиваль атерриториақәа еиҿкаахоит.

Афестиваль апринцип хадақәа иреуоуп – аҳәаақәа раартра, алахәылацәа реиԥш ахәаԥшцәагьы рзы афестиваль ахь анаӡара армариара.

Афестиваль рхы аладырхәыр алшоит уи азы агәаҳәара змоу, аоргкомитет ахь азыҳәамҭа алазҵаз зегьы.

Аҟәа. Цәыббрамза 9, 2022 шықәса. Аԥсныпресс. Иахьа Урыстәылатәи Афедерациеи Аԥсны Аҳәынҭқарреи ацҳаражәҳәарҭақәа рыҩаӡараҿы адипломатиатә еизыҟазаашьақәа рыбжьарҵеижьҭеи 14 шықәса ҵуеит. Жьҭаарамза 24,2008 шықәса рзы Аԥсны иҟоу Урыстәыла раԥхьатәи ацҳаражәҳәаҩыс дҟалеит урыстәылатәи адипломат Семион Григориев.  Ԥхынҷкәынмза 16 рзы Семион Григорие усҟан Аԥсны Ахадас иҟаз Сергеи Багаԥшь агәрагагатә шәҟәқәа инапы иаиркит.  

Аҟәа. Цәыббрамза 8, 2022 шықәса. Аԥсныпресс. Иацы ахәылбыҽха шәагаала имаҷу аӷбақәа рзы Аҳәынҭқарратә Инспекциа аусзуҩцәа аҟәатәи абаӷәаза аҿы, аӡҭаларҭа «Синоп» иахьаҵанакуа аӡы иагоз аҭыԥҳацәа реиқәырхара рылдыршеит, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.  Аӡы иагоз аҭыԥҳацәа рхаҭара шьақәыргылоуп, урҭ 1994; 2003 шш. рзы ииз аҭыԥан инхо роуп.  

Асиорфинг-ӷәқәа рыла урҭ амшын агәаҿынӡа инаӡеит, аҟәара аҟынтәи 700 метра инарзынаԥшуа инаскьеит. Аха шьҭахьҟа ахынҳәра рымч ақәымхо иалагеит. Рҭелқәа иамаз арлашагақәа рыла урҭ аҟәараҿы иҟаз ауаа рылаԥш рықәшәартә иҟарҵеит, урҭ анаҩс аиқәырхаҩцәа адырра рырҭеит.

Аҟәа. Цәыббрамза 8, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа Нхыҵ Кавказҟа иусуратә ҭаара иациҵоит. Цәыббрамза 8 рзы Аҳәынҭқарра Ахадеи аԥснытәи аделегациа ахаҭарнакцәеи Ҟарачы-Черқьесиантәи иааны  хатәгәаԥхарала еибашьуаз, Аԥсны Аҳәынҭқарра ахақәиҭреи ахьыԥшымреи зхы ақәызҵаз аибашьцәа  рбаҟа амҵан ашәҭ шьыҵәрақәа шьҭарҵеит. Аслан Бжьаниа хатәгәаԥхарала Аԥсны еибашьуаз, иҭахаз ранацәа дырԥылеит.   120-ҩык Ҟарачы-Черкесиантәи Аԥсныҟа иааны хатәгәаԥхарала еибашьуан, урҭ рахьынтә  13-ҩык ҭахеит.  

Иахьа Аслан Бжьаниа иара убас Жәларбжьаратәи Ачерқесстә Ассоциациа напхгара азҭоз, иара убас ҟабарда жәлар Рконгресс ахантәаҩыс иҟаз,   Урыстәылатәи Афедерациа иналукааша, еицырдыруа аҳәынҭқарратәи аполитикатәи аусзуҩ Иури Калмыков ибаҟа амҵан ашәҭ шьыҵәрақәа шьҭеиҵеит.

Ҟарачы-Черкестәи Ареспублика Абазатәи араион аул Кара-Паго аҿы Аслан Бжьаниа Аԥсны Аҳәынҭқарра  Актәи Ахада Владислав Арӡынба ихьӡ зху ашкол даҭааит.