Аҟәа. Цәыббрамза 19, 2022 шықәса. Аԥсныпресс. Атәыла Анапхгара Аҳәынҭқарратә Дума ахь аратификациа азура азы инарышьҭит Урыстәылатәи Афедерациеи Аԥсны Аҳәынҭқарреи рыбжьара Аԥсны аекспорттә кредит азоужьра азы аиқәшаҳаҭра аиҭакрақәа ралагалара азы аԥкаанҵа, ҳәа адырра ҟанаҵоит аинфомациатә Маҵзура ТАСС. Аусшәҟәы апарламент аладатәи апалата адыррақәа релектронтә база аҿы икьыԥхьхеит.

Аҟәа. Цәыббрамза 17, 2022 шықәса. Аԥсныпресс. Цәыббрамза 16 рзы Аԥсны Иҷыдоу аҭагылазаашьақәа рзы Аминистрра Гагра ақалақьтәи аҟәша аԥыԥшырҭа-еиқәырхаратә Отриад аԥсеиқәырхаҩцәа ироуз адырра ала  Гагра араион Аибӷа ақыҭахь амҩа иқәлеит. Аԥсны Иҷыдоу аҭагылазаашьақәа рзы Аминистрра апресс-маҵзура иҟанаҵо адыррақәа рыла, Луганск ақалақь аҿы инхо, аха уажәы Аибӷа ақыҭаҿы иҟаз 1978 шықәса рзы ииз Вухрева Татиана Иури-иԥҳа  илымаз агәаҵәачымазара ахҟьаԥҟьа лызцәырҵра иахҟьаны иаарласны ахәышәтәырҭахь днагатәхеит.

Аҟәа. Цәыббрамза 17, 2022 шықәса. Аԥсныпресс.  Аԥсны Аиааиреи Ахьыԥшымреи Рымшныҳәа 29 - шықәса ахыҵра аламҭалазы, Очамчыра араион Мықә ақыҭан «Мықәашҭа» адәы аҿы ажәлар рныҳәа, аҽырыҩра, итрадициатәу аицлабрақәа, уҳәа рымҩаԥгара иазкны аҽазыҟаҵарақәа ирылагеит, ҳәа иаанацҳауеит Очамчыра араион Ахадара.

Аҟәа. Цәыббрамза 17, 2022 шықәса.  Аԥсныпресс. Аҟәа ақалақь аделегациа Брианск ақалақь Амш азгәаҭара иазку аусмҩаԥгатәқәа ахы аланархәуеит. Аҟәа ақалақь ахада Беслан Ешба напхгара зиҭо аделегациа алахәылацәа агәалашәаратә ҭыԥқәа - амемориалтә комплекс «Хацунь», «Апартизанцәа рыдәҳәыԥш» ирҭааит. Урҭ 1941 – 1945 шш. Аџьынџьтәылатәи еибашьра Дуӡӡа аҿы иҭахаз ҳаҭырла иргәаладыршәеит, амемориалқәа рымҵан ашәҭ шьыҵәрақәа шьҭарҵеит, ҳәа иаанацҳауеит Аҟәа ақалақь Ахадара асаит.  

Акомплекс «Хацунь» Брианшьина иҟаз афашисттә режим иалаӡыз ргәалашәара анаунагӡара иазкуп. Амемориал аҿы анышә иамадоуп иҭахаз аҭынч уааԥсыреи асолдатцәа-аиқәырхаҩцәеи.  Араҟа иара убас иҟоуп амузеи. Уаҟа ицәыргақәҵоуп афашистцәа Брианск аҭынч уааԥсыреи апартизанцәеи цәгьаԥсышьа шрырҭоз зырҵабыргуа аршаҳаҭгақәа.  

Аҟәа. Цәыббрамза 16, 2022 шықәса. Аԥсныпресс.  Аԥсны атуризм аминистр Ҭеимураз Хьышба Урыстәылатәи Афедерациа Аиҳабыра Ахантәаҩы ихаҭыԥуаҩ Дмитри Чернышиов диԥылеит, ҳәа адырра ҟанаҵоит атуризм Аминистрра апресс-маҵзура.

Аиԥылара мҩаԥысуан Гагра ақалақь аҿы. Аиԥылара рхы аладырхәит Акционертә Еилазаара «Корпорация Туризма РФ» адиректор хада Сергеи Суханов, Акционертә Еилазаара «Корпорация Туризма РФ» адиректор хада актәи ихаҭыԥуаҩ  Денис Секачев.

Ҭеимураз Хьышбеи Дмитри Чернышенкои Аԥсны атуристтә усхкы аҿиара иадҳәалоу азҵаарақәа жәпакы ирнылацәажәеит, уи аперспективақәас иамоу азгәарҭеит.

Аҟәа. Цәыббрамза 16, 2022 шықәса. Аԥсныпресс. Имҩаԥысит Аԥсны Аҳәынҭқарра Ахадеи Урыстәылатәи Афедерациа Аиҳабыра Ахантәаҩы Ихаҭыԥуаҩ Дмитри Чернышенкои реиԥылара.

Дмитри Чернышенко бзиала уаабеит ҳәа иаҳәо, Аҳәынҭқарра Ахада иазгәеиҭеит хаҭала реибадырра агәахәара шинаҭо.

«Ҳаҭыр зқәу Дмитри Николаи-иԥа, бзиала шәаабеит Аԥсныҟа, ҳара ҳтәылаҟны Шәача имҩаԥысуаз Аолимпиатә хәмаррақәа еиҿызкааз шәшыруаӡәку рдыруеит. Адунеи зымҽхазкыз ари апроцесс ашәарҭадара алыршара аганахьала ари саргьы салахәын», - ҳәа иазгәеиҭеит Аслан Бжьаниа.

Дмитри Чернышенко Аҳәынҭқарра Ахада иҭабуп ҳәа еиҳәеит аиԥыларазы.  «Аԥсуа дгьыл аҟны, шәара аԥсуаа ишышәҳәо еиԥш, «аԥсы атәылаҟны» сыҟазаара сара сзы гәахәароуп, гәахәароуп ҳтәылақәа реизыҟазаашьақәа гәацԥыҳәарала аҿиара иахьаҿу», - иаҵшьны иҳәеит Дмитри Чернышенко.

Аҟәа. Цәыббрамза 16, 2022 шықәса. Аԥсныпресс.  Аԥсны агәабзиарахьчара аминистр Едуард Быҭәба Урыстәылатәи ахәыҷтәы клиникатә хәышәтәырҭа анапхгаҩы Елена Петриаикина дылԥылеит, ҳәа иаанацҳауеит Аԥсны агәабзиарахьчара Аминистрра апресс-маҵзура.

Аиԥылара аҿы ирылацәажәеит ауааԥсыра ателемедицинатә цхыраара рыҭара еиԥш, ахәыҷқәа  Урыстәылатәи ахәыҷтәы клиникатә хәышәтәырҭа аҿы рыхәышәтәрагьы уахь иналаҵаны иадҳәалоу азҵаарақәа.  

Аиԥылара ашьҭахь аминистр идырбеит ателемедицина акабинет, араҟа уи аспециалистцәа дрыҿцәажәеит.

Аҟәа. Цәыббрамза 16, 2022 шықәса. Аԥсныпресс. Ашьуасԥшааратә усбарҭа аусзуҩцәа дааныркылеит уажәраанӡа жәларбжьаратәи ашьаусԥшаараҿы иҟаз Ареспублика Ҭаџьикьысҭан  атәылауаҩ. 

2002 шықәса рзы ииз Ҭаџьыкьысҭан атәылауаҩ Касиров Махамадиусуф Абдурахмон-иԥа, Ҭаџьыкьысҭан Ашьаустә Закәанеидкыла ахәҭаҷ 307.3, 2-тәи ахәҭа иазԥхьагәанаҭо ацәгьоура (аекстремисттә еиҿкаара аусура аиҿкаара) азы ашьаусԥшаара даҵанакуеит.

Аҟәа. Цәыббрамза 16, 2022 шықәса. Аԥсныпресс. Аԥсны Иҷыдоу аҭагылазаашьақәа рзы Аминистрра аҿы аминистр, аинрал-леитенант Лев Кәыҵниеи ареспубликаҿы здипломатиатә миссиа хзыркәшо, Аԥсны иҟоу Аҷыдалкаатә зинмчы змоу Урыстәылатәи Афедерациа Ацҳаражәҳәаҩ иабжьгаҩцәа Владислав Нечипоренкои ҿыц змаҵуратә уалԥшьа анагӡара иалаго Ацҳаражәҳәаҩ иабжьгаҩ Роман Татаркои дырԥылеит, ҳәа адырра ҟанаҵоит Аԥсны Аҳәынҭқарра Иҷыдоу аҭагылазаашьақәа рзы Аминистрра апресс-маҵзура.  

Аҟәа. Цәыббрамза 16, 2022 шықәса. Аԥсныпресс. Нестор Цужба цәыббрамза 10 - 15 рзы Москва ақалақь аҿы имҩаԥысуаз атурнир «Аԥкьаҭмпыл азы Москватәи академиа Ахраҿа- 3» аҿы аиааира игеит. Абри азы адырра ҟанаҵоит Аԥсны аҿари аспорти рзы аҳәынҭқарратә Еилакы асаит.

Нестор Цужба  9-10 шықәса зхыҵуа рықәратә категориа иаҵанакуа рыбжьара дықәгылон.