Аҟәа. Ԥхынгәымза 15, 2023 шықәса. Аԥсныпресс. Ԥхынгәымза 3 – 13 рзы атәылахьчара Аминистрра ахысырҭақәа рҿы аштаттә хысыҩцәа алархәны имҩаԥгаз аҽазыҟаҵарақәа хыркәшахеит. Иарбоу аусмҩаԥгатә аҿы ихадоу ахшыҩзышьҭра аиуит аибашьратә дәы аҿы лассы-лассы зҽеиҭазкуа аҭагылазаашьақәа раан икылкааны ахысыҩцәа русура иҿыцу аформақәеи аҟаҵашьақәеи рԥышәара, ҳәа адырра ҟанаҵоит Аԥсны атәылахьчара Аминистрра.
Ахысыҩцәа иҷыдоу атехникеи абџьари ртактика-техникатә ҟазшьарбақәеи еиуеиԥшым аҭагылазаашьақәа рҿы ахысра аԥҟарақәеи ҭырҵаауан.
Аҽазыҟаҵарақәа раан аруаа рыҽцәырымгакәа аиҭаҵреи иумбартә аҽыҟаҵареи (амаскировка) аԥшыхәреи, иуадаҩу атактикатә ҭагылазаашьаҿы аҭыԥ аҿы уахьцо-уахьаауа аҽақәшәареи ацәҟьа ақәшәареи, уҳәа рзы еиуеиԥшым аҟаҵашьақәа ԥыршәеит.
