«Ҳара иахьатәи амш азы ҳхықәкы хаданы иҟоуп «афилармониа ахәаԥшцәа рыршанхара», ҳәа алаф иҳәеит апианинорҳәаҩы.

Апресс-конференциа аҿы иара убас рхы аладырхәит аконцерт аспонсорцәеи аиҿкааҩцәеи: апроект «АҟәаJazz» акуратор Лаура Тарнааи афирма «Eva Luk» анапхгаҩы Баҭал Ҳалуашьи.

Лаура Тарнаа ишазгәалҭаз ала, аконцерт алагара маҷк шыбжьоу, асааҭ 19.00 рзы, аџьаз абзиабаҩцәа рзы афилармониа аҿаԥхьа иҟоу апарк аҿы еиҿкаахоит афуршет, иара убас  иқәгылоит агәыԥ «Акапелла – Экспресс», уи асолистцәа  еиуеиԥшым амузакатә инструментқәа рыбжьы аимитациа аҟаҵара рылшоит. Иара убас иқәгылараны иҟоуп аколлектив «New dixie jazz band».

Иара убас лара иҟалҵаз адыррақәа рыла, Аԥсны имҩаԥгахоит есышықәсатәи аџьаз аффестиваль.

Баҭал Ҳалуашь, абар шьҭа 50 шықәса ҵуеит амузыканти иареи аиҩызара бзиа рыбжьоижьҭеи, урҭ Москватәи аконсерваториа аҟны иҟоу амузыкатә школ Хада аҿы аҵара еицырҵон.  

«Сергеи Жилин Аԥсны аҩызцәа рацәаны имоуп, уи есымша гәахәарыла ареспубликаҟа даауеит. Сара саныхәыҷыз аахыижьҭеи исгәалашәоит Аԥсны ауааԥсыра, амузыкатәгьы уахь иналаҵаны,  агьама бзиа шрымоу.  Сара ахәаԥшцәа ари аконцерт агәхәара ду шырнаҭо ала  агәра ганы сыҟоуп», - ҳәа иҳәеит иара.

Аконцерт аиҿкаара рхахьы иргеит: Иарку Акционартә Еилазаара  «Аҟәафон-GSM», афирма «Eva Luk», Аԥсны аӡахәааӡаҩцәеи аҩыҭаҭәаҩцәеи Рассоциациа.