Очамчыра араион ахада Беслан Бигәаа зыԥсҭазаара зегьы иалагӡаны араион аҿы инхо абыргцәеи, аҭыԥантәи ауааԥсыреи  ақалақь иаҭааз асасцәеи бзиала шәаабеит ҳәа реиҳәеит.

«Иахьатәи аныҳәа рыдысныҳәаларц сҭахуп араион ауааԥсыра, асасцәа! Ҳара абар шьҭа ҩышықәсоуп ари амшныҳәа азгәаҳҭоижьҭеи. Уи традициала ишьақәгылеит, аринахысгьы хымԥада иацҵахоит. Ишыжәбо еиԥш, зегьы ргәалаҟазаара бзиоуп, илахҿыхуп. Ҳара иахьа егьырҭ араионқәа рҟынтәи ирацәаҩны асасцәа ҳарзыԥшуп. Зегьы аманшәалареи аизҳазыӷьареи рзеиӷьасшьоит!!».

Ахәаахәҭратә цәыргақәҵа (аиармарка) аҿы аҭыԥантәи ауааԥсыреи араион иаҭааз асасцәеи еиуеиԥшым афатә, хкы-хкыла ашәқәа, аџьанџьыхәа, ацха, аҩы, ҿыц еиҵарԥхьоу ачаи, иара убас аҵәы иахаҵаны иӡу ацәжьы  ргьама абара рылшоит.

Иара убас, ахәыҷқәа рзы амульфильмқәа рфырхацәа злоу ақәгыларақәа, аквестқәа, ашәахтә хәылԥеизара, уҳәа рыла ишьақәгылоу инарҭбаау арлахҽыхратә программа  еиҿкаауп.

Ахәылбыҽха аныҳәатә концерт аҿы имҩаԥысуеит сынтәа ашкол  иалгаз аҿар рыдныҳәалара, ақалақь аҿы инхо ҳаҭыр зқәу атәылауаа аҳамҭақәа  ранашьара, иара убас аԥсуа естрадеи Кавказтәи артистцәеи рықәгылара.

Аныҳәатә программа афеиерверк ала ихыркәшахоит.