Аҟәа. Жьҭаарамза 13, 2023 шықәса. Аԥсныпресс. Атәыла аԥыза-министр Алеқсандр Анқәаб абызшәатә политиказы аҳәынҭқарратә Усбарҭа анапхгаҩы Гәында Кәыҵниеи Аусбарҭа аспециалист хада Гәында Сақаниаԥҳаи идикылеит.
Абызшәатә политиказы аҳәынҭқарратә Усбарҭа ахаҭарнакцәа Алеқсандр Анқәаб иарбоу ахылаԥшырҭа ихаамҭанытәиу аусура атәы изеиҭарҳәеит.
Гәында Кәыҵниа лажәақәа рыла, мышқәак раԥхьа иааргеит 3 шықәса инаркны 10 шықәса рҟынӡа зхыҵуа ахәыҷқәа рзы 3000 екземплиар рҟынӡа иҿыцу ԥшь-ҭыжьымҭак. Уи асериа «Сара раԥхьатәи сышәҟәы» аҟынтәи асахьақәа рыла ишьақәгылоу ажәар, ахәыҷқәа рзы алакә-апиеса «Ажьа агәымшәа», ԥшшәы еилаԥсала ашәыгақәа зцу ажәеинраалақәа реизга «Ашәҭқәа рашәа», иара убас ажәеинраалақәа реизга «Ааамҭеи асааҭи». Иара убас иааргеит 3500 екземплиар рҟынӡа инаӡо аԥсуа бызшәазы алабҿабатә цхыраагӡатәқәа.
Гәында Кәыҵниа, ашәҟәқәа реиҳарак Аԥсны араионқәа зегьы рышколқәеи рхәыҷбаҳчақәеи ирызшахоит ҳәа иазгәалҭеит.
Аԥсуа бызшәа аекспертцәа, аметодистцәа, ааԥхьара зауз асахьаҭыхыҩцәа Аҳәынҭусбарҭа аспециалистцәа рнапхгарала 6 мыз инарзынаԥшуа иарбоу ашәҟәқәа аус рыдырулон.
Иара убас, аԥсуа бызшәахь здублиаж ҟаҵоу 11 мультфильм ҳазҭоу ашықәс нҵәаанӡа ахәаԥшыҩцәа идырбахоит.
Абызшәатә политиказы аҳәынҭқарратә Усбарҭа аҿы иара убас аҭыжьразы еиқәдыршәоит аԥсышәала иҭыжьхо «Аусеилыргара азы анапхгараҭара».
Аиԥылараҿы аԥсуа бызшәахьы еиҭагоу ипопулиару ахәыҷтәы сахьаркыратә литература, иоригиналу аԥсуа литература, 2024 шықәсазы Аҳәынҭусбарҭа имҩаԥнаго аусмҩаԥгатәқәа рыплан рҭыжьара алыршара иалацәажәеит.
