Аҟәа. Жьҭаарамза 13, 2023 шықәса. Аԥсныпресс. Аԥшьаша, жьҭаарамза 12, Чечентәылатәи Ареспублика аҳҭнықалақь аҿы Аԥсны аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагбеи Чечентәыла абҩарҵәыреи аспорти рминистр Иса Ибрагимови реиԥылара мҩаԥысит.
Ааигәа шәара иазгәашәҭон Аџьынџьтәылатәи еибашьра аҿы Аиааира агара Амш 30-шықәса ахыҵра. Ишәыдаҳныҳәалоит ари аныҳәа ду! Чечентәылатәи Ареспублика аделегациагьы Аԥсныҟа ицеит ари аныҳәа иадҳәалоу аусмҩаԥгатәқәа рылахәхаразы. Аха сара сзымцаӡеит. Ҳара раԥхьа иргыланы аҿартә политикеи аспорти русхкы аҿы аизыҟазаашьа бзиақәа рырҿиара ҳазхиазароуп. Ҳара ҳахәҭаала иҳамоу аԥышәала аимадара, шәара шәыспортсменцәа рыдкылара ҳалшоит. Уи акыр зхыҵуа ҳаиҩызаратә еизыҟазаашьақәа еиҳагьы иарӷәӷәоит. Иҭабуп шәахьаҳҭааз», - ҳәа иҳәеит Иса Ибрагимов.
Ҭарашь Ҳагба Чечентәылатәи Ареспублика аспорт аминистр иҟаиҵаз адкылара азы иҭабуп ҳәа еиҳәеит.
«Ҳара аусеицура ҳазхиоуп, аиҩазара ҳабжьазар ҳҭахуп. Ҳҿар азы иҳалшо зегьы ҟаҳҵалароуп. Шәара иазгәашәҭеит ааигәа ҳара Аԥсны жәлар Рџьынџьтәылатәи еибашьраҿы Аиааира агара Амш 30-шықәса ахыҵреи Аԥсны Аҳәынҭқарра ахьыԥшымра жәларбжьаратәи азхаҵара ҟалеижьҭеи 15-шықәса аҵреи шаҳгәаҳҭоз. Ари аиааира агара аҿы рлагала дууп Чечентәылатәи Ареспублика аҟынтәи хатәгәаԥхарала еибашьуазгьы», - ҳәа иҳәеит иара.
Аганқәа доусы рреспубликақәа рҿы абҩарҵәыреи аспорти аҿартә политикеи рыҿиара рзы имҩаԥгахо ауснагӡатәқәа рзы аинформациа ҟарҵеит.
Аиԥылара ахыркәшамҭаз Ҭарашь Ҳагбеи Иса Магомед Ибрагимови агәаларшәагатә ҳамҭақәа еимырдеит.
Аусмҩаԥгатә рхы аладырхәит Аԥсны аҿари апорти русқәа рзы аҳәынҭқарратә Еилакы ахантәаҩы ихаҭыԥуаҩ Роман Ҵкәуа, Аилак аҿартә ҟәша анапхгаҩы Идрис Кара-Осман-оглы, Чечентәылатәи Ареспублика абҩарҵәыреи аспорти аҿартә политикеи рминистр актәи ихаҭыԥуаҩ Хусеин Абдулкаримови аминистр ихаҭыԥуаҩцәа Магомед Узаеви Шеих-Ахмед Ибрагимови.
