Аҟәа. Жьҭаарамза 13, 2023 шықәса. Аԥсныпресс. Сынтәа Афонҿыцтәи аберҭыԥ аҿы ари аԥшьаҭыԥ ахылаԥшыҩ аб Давид (Сарсаниа) инапхгарала ареставрациатә усурақәа мҩаԥгахеит, ҳәа адырра ҟалеит Аԥсны Иԥшьоу Амитрополиа иатәу Telegram-канал «Анхәа Скит» аҿы.
Афонҿыцтәи аберҭыԥ уахьыныҩнало иҟоу аихагылаеиҩкаагақәа рыҟны аҭӡынҵақәа аартхеит. Аусурақәа нарыгӡон Санкт-Петербургынтәи иааз ареставраторцәа. Иара уааҵәҟьа ишьақәыргылахеит Анцәадзыхшаз Ацқьа Мариа дызну амозаикатә ныхачаԥа «Вратарница» («Портаи́тисса», иара убас уи «Иверскаиа» ҳәа иашьҭоуп).
Ауахәаматә маҭәахәқәа рышьҭаҵарҭа (ауада), иара убас Афонҿыцтәи аныхабаа аҿаԥшьы, ацқьа Николаи Мирликитәи иныҳәарҭа аҿы адашьма аӷәы ареставрациа мҩаԥган.
Арестарациа мҩаԥган Афонҿыцтәи аберҭыԥ акрыфарҭа аҩналарҭа (аныхабаа асаркьалсырҭа актәи акаҭ аҿы иҟоуп). Ирыцқьоуп аныхабаа асаркьалсырҭа актәи акаҭ хаҳәла ичаԥоу ашьаҭа, ареставрациа рызуп амҿы иалху аҩналарҭатә ашә дуқәа, еиҭашьақәыргылоуп авитражтә саркьақәа.
