Аҟәа. Хәажәкырамза 16, 2023 шықәса. Аԥсныпресс. Аԥсны атуризм аминистр Ҭеимураз Хишбеи Ареспублика Ҟрым акурортқәеи атуризми рминистр Вадим Волченкои хәажәкырамза   16 рзы, XXIX  Москватәи Жәларбжьаратәи атуристтә цәыргақәҵа аҳәаақәа ирҭагӡаны Аԥсны атуризм Аминистрреи Ареспублика Ҟрым атуризми акурортқәеи Рминистрреи акурортқәеи атуризми русхкы аҿы агәҭакқәа рзы аԥкаанҵа рнапы аҵарҩит, ҳәа адырра ҟанаҵоит Аԥсны атуризм Аминистрра апресс-маҵзура.

Аганқәа рзинмчы аҳәаақәа ирҭагӡаны Аԥсны Аҳәынҭқарреи Урыстәылатәи Афедерациеи рзакәанԥҵареи инарықәыршәаны акыраамҭатәии аҩганк ирзыфеидоу аусуратә еимадара абжьаҵара азы агәҭакқәа шрымоу азгәаҭоит.

Аҟәа. Хәажәкырамза 16, 2023 шықәса. Аԥсныпресс.  Аԥсны аҳҭнықалақь Аҟәа ахақәиҭтәразы имҩаԥгаз Марттәи ажәылара 30-шықәса ахыҵра амш аҽны аҿари аспорти русқәа рзы аҳәынҭқарратә Еилакы агәалашәаратә акциа мҩаԥнагеит.

Аҿари Марттәи ажәылара иалахәыз аибашьра аветеранцәеи Аҟәатәи абаталион аибашьцәа рбаҟа амҵан ашәҭ шьыҵәрақәа шьҭарҵеит.  

Анаҩс акциа иалахәыз Аԥсны Актәи Ахада Владислав Григори-иԥа Арӡынба Имемориал аҟынӡа шьапыла амҩа иқәлеит. Уаҟа урҭ Ахада иҳаҭгәын аҿы ашәҭ шьыҵәрақәа шьҭарҵеит.

Аҟәатәи абаталион аибашьцәа рбаҟа аҿаԥхьа игәалашәарақәа еизаз ирзеиҭеиҳәеит Аԥсны Афырхаҵа, Аҟәатәи абаталион акомандаҟаҵаҩ Сергеи Матосиан.

«Иахьа  – хәажәкырамза 16 ауп. Ари амш аҽны, В  этот день, 30 шықәса раԥхьа иахьа ҳахьгылоу атерриториа аамҭала аӷа инапаҿы иҟан, ҳара уи аҭарцәра азы аӡиас ҳарны ажәылара мҩаԥаагеит.

Сара исҳәарц исҭаху, ҳара аибашьышьа ҳҵон усҟан, избан акәзар ус еиԥш аԥышәа ҳамамызт, рыцҳарас иҟалаз аибашьышьа рҵоит, аха убри аан аӡәырҩы ҭахоит. Даара ирацәаҩны рыԥсҭазаара ақәырҵеит ҳҳәынҭқарра ахьыԥшымреи ахақәиҭреи. Сара исҭахуп ишәхашәмышҭырц шәара ишәықәлаз рфырхаҵара»,  –  ҳәа агәалашәаратә акциа иалахәыз аҿар рахь ихы рханы иҳәеит Сергеи Матосиан.  –  Аиааира иаразнак ала иҟалаз усӡам. Хәажәкырамзазы иҳақәмҿиазаргьы, ҳара зегьы есааира ҳарратә ԥышәа азҳауан,  убас цәыббрамза 30 рзы аӷа инагӡаны ииааирагьы ҳалшеит».

Аҟәа. Хәажәкырамза 16, 2023 шықәса. Аԥсныпресс. Аслан Бжьаниа аҽыԥхьакрахь диасырц иӡбеит аҩаша, хәажәкырамза 14 рзы, игәамбзиара иахҟьаны. COVID-19 антиген азы Аҳәынҭқарра Ахада имҩаԥигаз експресс-тест иҵоуроу алҵшәа аанарԥшит.

Иара убас аҿкы аҟазаара ашьақәырӷәӷәаразы имҩаԥган акороновирустә ҿкы чымазара аҟазааразы алабораториатә ПЦР-тест. Ҳазҭагылоу аамҭазы алҵшәақәа рааира иазыԥшуп.

Аҟәа. Хәажәкырамза 16, 2023 шықәса. Аԥсныпресс.  Аԥсны атуризм аминистр Ҭеимураз Хишба напхгара зиҭо аԥснытәи аделегациа атуризми асасдкылара аинидустриеи  рзы XXIX Жәларбжьаратәи ацәыгақәҵа MITT – 2023 иалахуп.  Уи мҩаԥыслоит хәажәкырамза 16 инаркны 18 - нӡа Москва ақалақь, Жәларбжьаратәи ацәыргақәҵатә центр «Крокус Экспо» аҿы.    

Аԥснытәи аделегациа аилазаара аҿы иҟоуп еиуеиԥшым атуристтә еилазаарақәа, атуристтә операторцәа, Аԥсны атрансферқәеи аекскурсиамҩаԥгаҩцәеи рзанааҭеидгылақәа рхаҭарнакцәа.  

Аԥсны еицырдыруа аҭыԥԥшӡарақәа иреиуоу Гагратәи аколоннада асахьа зманы иҟаҵоу аԥснытәи астенд аҿы ахатәы аалыҵ адгалара мҩаԥнагеит.

«Иахьа аусура иалагеит адунеи аҿы зегь иреиҳау ацәыргақәҵақәа хәба рхыԥхьаӡараҿы иҟоу XXIX Жәларбжьаратәи атуристтә цәыргақәҵа MITT – 2023. Аԥсны араҟа ицәыргақәҵоуп астенд ду ала. Уи хыԥхьаӡара рацәала аҭааҩцәа адҵаалоит.   Атуроператорцәа аус руеит, ҳреспублика  иазҿлымҳау зегьы аинтерес зҵоу адыррақәа рырҭоит. Ҳара ацәыргақәҵа амҩаԥгара аҳәаақәа ирҭагӡаны аусеицуразы аиқәшаҳаҭрақәак рнапаҵыҩра азԥхьагәаҭаны иҳамоуп. Ареспублика Ҟрым аус ацура азы аиқәшаҳаҭрагьы уахь иаҵанакуеит.   Ацәыргақәҵа хымш аус аулоит. Ҳара ҳастенд аусура иалагалоит ашьыжь, асааҭ  10 инаркны. Ҳара  2023 шықәсатәи асезон азы хыԥхьаӡара рацәала асасцәа рҭаарала иалкаахап ҳәа агәыӷра ҳамоуп», - ҳәа ҭелла Аԥсныпресс акореспондент диҿцәажо иҳәеит атуризм аминистр Ҭеимураз Хишба. 

Аҟәа. Хәажәкырамза 16, 2023 шықәса. Аԥсныпресс. Аҟәа 1992-1993 шш. Аԥсны жәлар рџьынџьтәылатәи еибашьра Марттәи ажәылараан иҭахаз ҳаҭырла иргәаладыршәеит.

Ашьыжь, хәажәкырамза 16 рзы, Аԥсны Аџьынџьтәылатә еибашьраан (1992-93шш), Аҟәа ахақәиҭтәразы имҩаԥысыз марттәи ажәылараҟны иҭахаз рбаҟа амҵан ашәҭшьҭаҵара иазкыз ацеремониа мҩаԥысит.

Уи иалахәын Аҳәынҭқарра Ахада ихаҭыԥуаҩ Бадра Гәынба, аԥыза-министр Алеқсандр Анқәаб, Ахада Иусбарҭа анапхгаҩы Џьансыхә Нанба, аԥыза-министр ихаҭыԥуаҩ, афинансқәа рминистр Владимир Делба, Аԥсны иҟоу Урыстәыла Ацҳаражәҳәаҩ Михаил Шургалин, аибашьра аветеранцәа, хатәгәаԥхарала еибашьуаз, Апарламент адепутатцәа, аиҳабыра, аӡбаратә уаажәларра рхаҭарнакцәа, ауаажәларра.

Аҟәа. Хәажәкырамза 16, 2023 шықәса.  Аԥсныпресс.  Хәажәкырамза 21 азы лусуратә  зинмчы аҽҳәара нҵәоит Аԥсны ауаҩы изинқәа рыхьчаразы Азинмчы змоу Асида Шьаҟрыл.

Жәлар Реизара-Апарламент хәы-шықәса аусуратә ҽҳәара иманы ауаҩы изинқәа рыхьчаразы Азинмчы змоу ҿыц иалхра мҩаԥнагароуп.

Ауаҩы изинқәа рыхьчаразы Азинмчы змоу имаҵурахьы  акандидатура адепутатцәа рзеиԥш хыԥхьаӡара аҟынтәи 1/3  иреиҵамкәа рыла иқәыргылазар ҟалоит, мамзагьы апарламенттә комитет ала.

Ауаҩы изинқәа рыхьчаразы Азинмчы змоу имаҵураҭыԥ дахагылар алшоит 35-шықәса иреиҵам, убри аан 65-шықәса иреиҳамкәа зхыҵуа,  Аԥсны атәылауаҩ, иааиԥмырҟьаӡакәа Аԥсны инхо, иреиҳаӡоу аҵарадырра змоу, иара убас ауаҩы, атәылауаҩы рзинқәеи рхақәиҭреи  рыхьчара рганахьла аԥышәа змоу.  

Аҟәа. Хәажәкырамза 15, 2023 шықәса. Аԥсныпресс /Алеқсеи Шамба/.  Аԥсны Аҳәынҭқарра Ахада иҟны иҟоу астратегиатә ҭҵаарақәа Рцентр ахаша, хәажәкырмза 15 рзы  И. Папасқьыр ихьӡ зху  Амилаҭтә библиотека аҿы, ареспублика аҿы ишьақәгылаз адемографиатә ҭагылазаашьа иазкны астол гьежь мҩаԥнагеит.

Астратегиатә ҭҵаарақәа Рцентр адиректор, афилологиатә наукақәа рдоктор Виачеслав Чыркба инапхгара имҩаԥысуаз аилацәажәара иалахәын атәыла агәабзиарахьчара аминистр ахаҭарнак  Беслан Кациа, Ареспубликатә хәышәтәырҭа ахшараиуратә ҟәша аиҳабы Белла Ԥлиа, арепатриациа азы аҳәынҭқарратә Еилакы ахантәаҩы Вадим Ҳаразиа, Аҳәынҭқарратә миграциатә Маҵзура анапхгаҩы ихаҭыԥуаҩ заместитель Едуард Гамсаниа, ААУ абиологиа-географиатә факультет адекан ихаҭыԥуаҩ, агеогрфиатә наукақәа ркандидат Нури Багаԥшь, аполитолог Наҭелла Акаба, астратегиатә ҭҵаарақәа Рцентр абызшәатә политика аҟәша аусзуҩ Асҭанда Ҳашба.

Алагалатә ажәахә аҟаҵо Виачеслав Чыркба, Қырҭтәыла аганахьала потенциалла арратә шәарҭара ашьҭахь зегьы иреиҳау проблеманы иҟоуп ҳәа иуҳәаратәы иҟоуп адемографиатә проблема ҳәа инаҵшьны иазгәеиҭеит.

«Аибашьра ахҟьаԥҟьақәа инарымаданы ишьақәгылаз хра злам атенденциақәеи, иара убас акоронавирустә ҿкы чымазара апандемиаеи ирыхҟьаны, ҳтәыла аҿы акыр иуадаҩу адемографиатә период шьақәгылеит.   Зыԥсҭазаара иалҵыз ауааԥсыра рхыԥхьаӡара ииаз  рхыԥхьаӡара аасҭа акыр аиҳахара иадҳәалахаз аҭагылазаашьа арҽеира азы ихымԥадатәиуп аира азҳареи аҳәаанырцә иҟоу ҳџьынџьуаа рҭоурыхтә ԥсадгьыл ахь рырхынҳәреи алыршара. Уи ишиашоу иадҳәалоуп аԥсуа милаҭтә етноси иааизакны иара аҳәынҭқарреи реиқәырхара», - ҳәа инаҵшьны иазгәеиҭеит иара.  

Аҟәа. Хәажәкырамза 10, 2023 шықәса. Аԥсныпресс.  Хәажәкырамза  14 инаркны 17 аҟынӡа Санкт –Петербург иҟоу А.А.Брианцев ихьӡ зху Ахәаԥшыҩ Қәыԥш Итеатр аҟны имҩаԥысраны иҟоуп ахәыҷтәы тетаралтә коллективқәа еидызкыло XXIV Жәларбжьаратәи «Брианцевтәи афестиваль».

Сынтәа апроект азкуп атеатр ашьаҭаркҩы – Асовет Еидгыла Жәлар рартист Александр Брианцев диижьҭеи 140-шықәса аҵра. Афестиваль рхы аладырхәраны иҟоуп Санкт-Петербург, Набережные Челны, Ленинградтәи аобласт, Иарославль, Пермтәи атәылаҿацә, Самаратәи аобласт, уҳәа рҟынтәи арҿиаратә коллективқәа. Жәларбжьаратәи апрограмма ала иқәгылараны иҟоуп Аԥсны, Белорус, Ермантәыла рҟынтәи ахәыҷтәы театрқәа.

Афестиваль афиша аҟны  иарбоуп - Ф. Достоевски, С. Есенин, А. Вертински, Р. Бах, Г.-Х. Андерсен, уҳәа егьырҭ еицырдыруа ашәҟәыҩҩцәа рырҿиамҭақәа рыла иқәыргылоу аспектакльқәа.  Иара убас иазԥхьагәаҭоуп арҿиаратә лабораториа, амастер-классқәа, апрофессионалтә театрдырҩцәа алархәны ақәыргыламҭақәа рыхцәажәарақәа, реилыргара, агәаанагарақәа реибыҳәара.

Аҟәа. Хәажәкырамза 10, 2023 шықәса. Аԥсныпресс.  Аԥсны аекономика Аминистрреи Аԥсны иҟоу Урыстәыла аус ацура азы Ахаҭарнакреи Урыстәылатәи Афедерациеи Аԥсны Аҳәынҭқарреи рыбжьара аҳаиртә еимадара аиҭашьақәыргылара азы апроект анагӡара аҳәаақәа ирҭагӡаны,  Аԥсны ауаажәларратә авиациа аганахьала Урыстәылатәи Афедерациа Иреиҳаӡоу аҵараиурҭақәа рҿы 2023/24 шш. аҵаразы 32 квота азоужьхоит ҳәа адырра ҟарҵоит.  

Азыҳәамҭақәа рыдкылара – хәажәкырамза 20-нӡа иҩаԥыслоит. 

Аҟәа. Хәажәкырамза 10, 2023 шықәса. Аԥсныпресс. Иахьа, хәажәкырамза 10, 2023 шықәса рзы, «Аԥсны Ауаажәларратә Палата азы»  Азакәан ахәҭаҷ 8, апункт  5 инақәыршәаны, Аҳәынҭқарра Ахада Аслан Бжьаниа ила ишьақәырӷәӷәаз Ауаажәларратә Палата алахәылацәа, аконкурстә лыԥшаара апроцедура ала Ауаажәларратә Палата аилазаара ҿыц ахь иалырхит  аҭыԥантәи ахаланапхгаратә усбарҭақәа рыла зыдгалара мҩаԥгаз 11-ҩык араионқәеи ақалақьқәеи рхаҭарнакцәа.  Убас Ауаажәларратә Палата аилазаара ахь иалхуп:

Алхас Гәыргәылиа (Аҟәа ақалақьтә Еизара);

Лана Цаа (Аҟәа ақалақьтә Еизара);

Дауҭ Агрба  (Гагра араионтә Еизара);

Дона Малиа (Пицунда ақалақьтә Еизара);

Ахра Агрба (Гәдоуҭа араионтә Еизара);

Витали Смыр (Афон Ҿыц ақалақьтә Еизара);

Леуан Чхьеиӡе (Аҟәа араионтә Еизара);

Кочу Маҳмеҭ Хакан (Гәылрыԥшь араионтә Еизара);

Беслан Перцхьелиа (Очамчыра араионтә Еизара);

Омар Џьынџьал (Ҭҟәарчал араионтә Еизара);

Ҭенгиз  Инал-иԥа  (Гал  араионтә Еизара)..

Ауаажәларратә Палата шьақәгылоит Аҳәынҭқарра Ахада ишьақәирӷәӷәаз 13-ҩык Аԥсны атәылауааи 11-ҩык араионқәеи ақалақьқәеи рхаҭарнакцәеи рыла; 11-ҩык Аԥсны Аҳәынҭқарра аиустициа Аминистрра аҿы ашәҟәы иҭагалоу аполитикатә партиақәа, ауаажәларра-политикатә еиҿкаарақәеи ауаажәларратә еидгыларақәеи рхаҭарнакцәа.

Аҳәынҭқарра Ахада ила ишьақәырӷәӷәоу Ауаажәларратә Палата алахәылацәа рышьақәырӷәӷәара амш инаркны 10-мыш ирылагӡаны аконкурстә лыԥшаара апроцедура ала аҭыԥантәи ахаланапхгаратә усбарҭақәа рыла зыдгалара мҩаԥгаз 11-ҩык араионқәеи ақалақьқәеи рхаҭарнакцәа Ауаажәларратә Палата аилазаара ҿыц ахь рыдкылара азы аӡбамҭа рыдыркылоит.