Аҟәа. Нанҳәамза 3, 2023 шықәса. Аԥсныпресс. Аҳәаанырцәтәи атәылауааи атәылауаҩра змам ахаҿқәеи Аԥсны Аҳәынҭақарра иахьаҵанакуа рыҟазаара арежим анагӡара аганахьала административтә зинеилагарақәа раарԥшра иазкны имҩаԥгаз ареидтә усмҩаԥгатәқәа раан атәыла аҩныҵҟатәи аусқәа Рминистрра ауаажәларратә шәарҭадара Аусбарҭа, Аҟәа ақалақь аҩныҵҟатәи аусқәа Русбарҭа ауаажәларратә шәарҭадара амилициа аусзуҩцәа 18 инарзынаԥшуа азинеилагарақәа шьақәдыргылеит.

Аҟәа. Нанҳәамза 3, 2023 шықәса. Аԥсныпресс. Аԥсны атуризм аминистр Ҭеимураз Хьышба ҳаҭыр зқәу асас иаҳасабала Ихьыԥшым Аҳәынҭқаррақәа Реиҩызара атәылақәа Рыхәмарақәа раартра ацеремониа алахәхаразы Минск ақалақь ахь дцеит, ҳәа адырра ҟанаҵоит Аԥсны атуризм Аминистрра апресс-маҵзура.   

Ареспублика Беларусь атуризми аспорти русхы аҿы аусеицура аҿиара, иара убас аҩ-ҳәынҭқаррак рыжәларқәа рыбжьара аилибакаареи традициала ишьақәгылахьоу аиҩызареи рырӷәӷәара  ахшыҩзышьра ду анаҭоит.

Аимабзиаратә спорттә еимадара ашьақәгылареи арӷәӷәареи, аҿар рымаха-шьахатәи рдоуҳатәи, иара убас рлеишәатә хра злоу аҟазшьақәа рыҿиареи рыгәҭакқәа рынагӡаразы ргәазҭазаара арӷәӷәареи хықәкыс иҟаҵаны, Ихьыԥшым Аҳәынҭқаррақәа Реиҩызара иахьаҵанакуа абар шьҭа ҩынтәны имҩаԥгахоит Ихьыԥшым Аҳәынҭқаррақәа Реиҩызара иалоу атәылақәа Рыхәмаррақәа.

Аҟәа. Нанҳәамза 3, 2023 шықәса. Аԥсныпресс. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра  азгәаҭара аҳәаақәа ирҭагӡаны, Аԥсны Аҳәынҭқарра Ахада Ихаҭыԥуаҩ  Бадра Гәынба Аԥсны Раԥхьатәи Ахада Владислав Арӡынба  Имемориал аҭеиҭыԥш арҽеира азҵаара иазкны аусуратә еилатәара мҩаԥигеит. Абри азы адырра ҟанаҵоит Аҳәынҭқарра Ахада иофициалтә саит. 

Аҟәа. Нанҳәамза 3, 2023 шықәса. Аԥсныпресс. Аҟәа ақалақь аҿы зегьы реиҳа акьатеи ҿкы чымазара зыхьыз ауаа рхыԥхьаӡара шьақәыргылахеит. Уи – 1426 –ҩык рҟынӡа инаӡоит, урҭ рахьынтә –1119-ҩык ахәыҷқәа роуп.  Абри азы Аԥсныпресс акорреспондент диҿцәажәо адырра ҟалҵеит атәыла асанитартә ҳақьым Хада Алла Белиаева.  

Уи ишазгәалҭаз ала, ари ахыԥхьаӡара иалоуп егьырҭ араионқәа рҟынтәи апациентцәагьы, избан акәзар, аҟәатәи аинфекциатә хәышәтәырҭа ареспубликатә хәышәтәырҭа аҳасабала аус ауеит.

«Аҩбатәи аҭыԥ ааннакылоит Гагра ақалақь, уаҟа ари ачымазара зыхьыз рзеиԥш хыԥхьаӡара – 823-ҩык рҟынӡа инаӡоит, урҭ рахьынтә 669-ҩык ахәыҷқәа роуп», – ҳәа адырра ҟалҵеит Алла Белиаева.

Уи ишазгәалҭаз ала,  иааизакны акьатеи ҿкы чымазара алаҽра иадҳәаланы ишьақәгылаз аҭагылазаашьа иҳаҩсыз ашықәс азы иҟаз аҭагылазаашьа еиԥшны иҟоуп, иҟалап уажәы уи 10 – 20 хҭыс рыла еиҳазаргьы.  

«Аиҳарак ари ачымазара зыхьуа ахәыҷқәа роуп. Уи зыхҟьо – ахатәы гигиена аԥҟарақәа рынамыгӡара ауп. Акьатеи ҿкы чымазарақәа, фатәи-жәтәи рыла аиасра адагьы абзазара-еимадаратә мҩалагьы алаҽра мҩаԥысуеит», – ҳәа илҳәеит атәыла асанитартә ҳақьым Хада Алла Белиаева.

Аҟәа. Нанҳәамза 3, 2023 шықәса. Аԥсныпресс.   Нанҳәамза 2 рзы Гал араион апрокуратура  1995 шықәса рзы ииз Бахтаӡе Наҭииа Гәырам-иԥҳа лышьра инамаданы ашьаусеилыргара хацнаркит. Абри азы адырра ҟанаҵоит апрокуратура Хада апресс-маҵзура.

Мышқәак раԥхьа азинхьчаратә усбарҭақәа дрыдҵаалеит Гал ақалақь аҿы инхо Иамзе Агәмаа. Уи лыԥҳа хабарда дшыбжьаӡыз азы адырра ҟалҵеит, лыԥшаараҿы ацхыраарагьы даҳәеит.

Гал араион апрокуратура, атәыла аҩныҵҟатәи аусқәа Рминистрра аоперативтә маҵзурақәа алархәны  имҩаԥнагаз аусеилыргара-оперативтә усмҩаԥгатәқәа ирылҵшәаны, ԥхынгәымза  28, 2023 шықәсазы Очамчыра ақалақь аҿы инхо,  1998 шықәсазы ииз Ҵәыџьба Аинар Ҭамаз-иԥа Гал ақалақь аҿы, автомашьына«Lexus» GX 470 (ашәҟәҭагаларатә дырга К605КК АВН) аҩныҵҟа гәҭакыла Наҭииа Бахтаӡе дшишьыз атәы еилкаахеит.

Аҟәа. Нанҳәамза 3, 2023 шықәса. Аԥсныпресс. Аԥсны аимҳәаршә зыхьуа рхыԥхьаӡара аизҳара ишаҿу умбар залшом. Абри азы Аԥсныпресс ахь адырра ҟалҵеит атәыла асанитартә ҳақьым Хада Алла Белиаева.

Алла Белиаева иҟалҵаз адыррақәа рыла, 7-мыз рыла аимҳәаршә рыдбалан 61-ҩык, урҭ рахьынтә  56-ҩык ахәыҷқәа роуп,  5-ҩык адуцәа роуп.   Ари ачымазара рылаҽуеит ахәыҷқәа реиԥш алаҵа змам аиҳабацәагьы.

«Иҟоуп аҭаацәа рҿы аиҳабацәа алаҵа аҟаҵара ақәранӡа имнаӡац ахәыҷқәа иандырхьуагьы», –  ҳәа илҳәеит Алла Белиаева.

Аҟәа. Нанҳәамза 3, 2023 шықәса. Аԥсныпресс. А. Палыга иҩымҭа ала  Антон Корнилов иқәиргылаз, Ф.А. Искандер ихьӡ зху Аурыс драматә  театр инанагӡо аспектакль «В лучах» ала  иаатуеит  XV Жәларбжьаратәи амоноспектакльқәа рфестиваль SOLO. Афестиваль Москва ақалақь, Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном»  аҿы жьҭаарамза,  2023  шықәсазы имҩаԥысуеит.  Абри азы адырра ҟаҵоуп Ф.А. Искандер ихьӡ зху Аурыс драматә театр асаит аҟны.   

XX ашәышықәсазы инхоз аԥҳәыс-аҵарауаҩ дуӡӡа Марииа Киури лыԥсҭазаареи ллахьынҵеи ирызку аспектакль «В лучах» Москва ақалақь, Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном» асцена ду аҿы ахәаԥшцәа ирызнагахоит.

Марииа Киури лроль назыгӡо Ирина Делба лажәақәа рыла, «Москва, даара зыхьӡ нагоу афестиваль аҿы амоноспектакль ахәмарра –лара лыԥсҭазаара зегьы иалганы иаалгоз гәазыҳәараны иҟоуп».

Атеатр адиректор хада Иракли Хьынҭәба, Аурыс драматә таатр шықәсык ала еиуеиԥшым жәларбжьаратәи афестивальқәа рахь ҩажәа рҟынӡа ааԥхьарақәа аиуоит, уи Аԥсны атеатралтә ҟазара Урыстәылатәи Афедерациаҿы ахәшьара ҳарак шарҭо арҵабыргуеит  ҳәа инаҵшьны иазгәеиҭеит.

Фазиль Искандер ихьӡ зху атеатр афестиваль SOLO алахәхара иадҳәалоу ахарџьқәа зегьы адкылара мҩаԥызго аган ахахьы иагоит.

Жәларбжьаратәи амоноспектакльқәа  рфестиваль SOLO 2008 шықәса инаркны есышықәса Москва ақалақь, Урыстәылатәи Афедерациа Атеатралтә усзуҩцәа Реидгыла Атеатралтә Центр «На Страстном»  аҿы имҩаԥысуеит. 

Ари аамҭа иалагӡаны афестиваль москватәи апублика ирнардырит Константин Раикин, Полина Агуреева, Алексеи Девотченко, Роза Хаируллина, Роберт Уилсон, Ромео Кастеллуччи, Даниеле Финци Паска, Иан Фабр, Теодорос Терзопулос, Важди Муавад, Сониа Бергамаско, Фабрицио Џьифуни, Софиа Хилл, Дени Лаван, Пиппо Дельбоно, Анхелика Лидделл, Данио Манфредини, уҳәа реиԥш иҟоу амоножанр авиртуозқәа аӡәырҩы.

Аҟәа. Нанҳәамза 3, 2023 шықәса. Аԥсныпресс. Аԥсны агәбзиарахьчара аминистр Едуард Быҭәба Ареспубликатә санитар-епидемиологиатә маҵзура  аҳақьым хада Алла Белиаева далархәны аилацәажәара мҩаԥигеит, ҳәа иаанацҳауеит Аԥсны агәабзиарахьчара апресс-маҵзура. 

Алла Белиаева аминистр асанитартә маҵзура аусура азы адырра илҭеит. Аминистр иҟаиҵаз адҵа ала Асанитар-епидемиологиатә Маҵзура Аҟәа ақалақь, азеиԥшкрыфара аобиектқәа рҿы асанитартә нормақәа рықәныҟәара аганахьала ареидтә усмҩаԥгатәқәа мҩаԥнагоит.  «Ақалақь Асанитар-епидемиологиатә Станциа ари азҵаара аганахьала аусура мҩаԥнагоит, иахьатәи амш азы асанитартә еилагарақәа рзы 8 ԥкаанҵа  еиқәыршәоуп, азеиԥшкрыфарҭақәа рыԥшәмацәа ахараԥсақәа ршәар акәхоит», - ҳәа адырра ҟалҵеит аҳақьым хада.

Едуард Быҭәба азеиԥшкрыфара аобиектқәа зегьы асанитартә нормақәа хымԥада ирықәныҟәар шахәҭоу азы ргәырҽаниҵеит.

Аҟәа. Нанҳәамза 3, 2023 шықәса. Аԥсныпресс. Очамчыра араион ахада Беслан Бигәаа аҟәшақәа, аусбарҭақәа, уҳәа егьырҭ ахылаԥшырҭақәа рнапхгаҩцәа алархәны, араион Ахадара аусзуҩцәа рыла аџьатә леишәа анагӡара азҵаарақәа рзы аилатәара мҩаԥигеит. Абри атәы аанацҳауеит  Ochamchira_inform.

Изаамҭанытәиим  аилатәара мҩаԥган асааҭ 17:00 рзы. Анапхгаҩцәа реиҳараҩык русураҿы ишыҟазгьы, араион ахада зегьы аџьатә дисциплина шеиларымгаша азы ргәырҽаниҵеит. Аусуратә еилатәара анымҩаԥысуаз аамҭазы зусураҿы иҟамыз аилыркаага рыҩыр акәхоит.

Аҟәа. Нанҳәамза 3, 2023 шықәса. Аԥсныпресс.  Ҳазҭоу ашықәс ԥхынгәымзазы ашәахтә шәатәқәа раҳасабала Аԥсны абиуџьет иалагалаз аԥаратә хархәагақәа рзеиԥш еицҵалыҵ 558,2 млн. мааҭ рҟынӡа инаӡеит. Уи  478,5 млн. мааҭ рыла ишьақәыргылоу аплан ала 117% рҟынӡа инаӡоит, ҳәа адырра ҟанаҵоит ашәахтәқәеи аизгақәеи рзы Аминистрра апресс-маҵзура.

2023 шықәса бжьымзы ирылагӡаны, 1 млрд. 942,2 млн. мааҭ рҟынӡа инаӡо аплан ала абиуџьет иалагалахеит  2 млрд 451,9  млн. мааҭ рҟынӡа ашәахтә шәатәқәа. Азԥхьагәаҭаратә рбагақәа рынагӡара 126% рҟынӡа инаӡеит. Ашәахтәқәа ралагалара адинамика 2022 шықәса аиԥш-зеиԥшу аамҭахәҭа иаҿырԥшны уахәаԥшуазар, 119% рҟынӡа инаӡеит, уи аԥаратә хархәагақәа реицҵалыҵ ала уахәаԥшуазар, 394,2 млн. мааҭ рҟынӡа инаӡоит.