Анаҩс акциа иалахәыз «Афыхацәа рышьҭала» имҩасит, Аԥсны жәлар Рџьынџьтәылатәи еибашьра аҿы иҭахаз ажәыларатә рота «Ветерок» аибашьцәа, Ҟабада-Балкариантәи иааны хатәгәаԥхарала еибашьуаз ҳашьцәа, Аҟәатәи абаталион аибашьцәа рбаҟақәа амҵан ашәҭ шьыҵәақәа шьҭарҵеит. 

Аусмҩаԥгатә хыркәшахеит хыхьтәи Гәымсҭатәи ацҳа аҿы ишьақәыргылоу агәалашәаратә хаҳәцәқәа рымҵан ашәҭ шьыҵәрақәа рышьҭаҵарала.

1993 шықәса, хәажәкырамза 15-16 ауха иалагаз ажәыларатә операциа лҵшәадахеит. Акыр ишьаарҵәыраз аидысларақәа рышьҭахь, хәажәкырамза 17 – 18 рзы аԥснытәи архәҭақәа шьҭахьҟа, уаанӡатәи рпозициақәа рахь ихьаҵыр акәхеит.  Аибашьра ахы инаркны аҵыхәтәанынӡа изхызгаз аԥсуа еибашьцәа изларҳәо ала, Аҟәа ахақәиҭтәразы имҩаԥгаз Марттәи ажәылара зегьы реиҳа иуадаҩын. Марттәи ажәылараан иҭахеит 222-ҩык аԥсуа еибашьцәа, шәҩыла еиуеиԥшым ахәрақәа роуит,  23-ҩык хабарда ибжьаӡит.