Аҟәа. Хәажәкырамза 28, 2023 шықәса. Аԥсныпресс. Аминистрцәа Реилазаара Аԥсны абиуџьеҭнҭыҵтәи афондқәа фба рбиуџьеҭқәа рынагӡара азы аҳасабырбақәа шьақәнарӷәӷәеит. Зыӡбахә ҳамоу Аԥсны Атәанчаҩратә фонд, ихымԥадатәиу амедицинатә бгаԥса Афонд, арепатриациа Афонд, 1992-1993шш. Аԥсны жәлар рџьынџьтәылатәи еибашьра аинвалидцәа рҳәынҭқарратә биуџьеҭнҭыҵтәи Афонд, асоциалтә бгаԥсеи аџьа ахьчареи Рфонд, Амҩатә Фонд.

Атәанчаҩратә Фонд ахашәалахәқәа иҳаҩсыз ашықәс азы 1 362 397,7 нызықь мааҭ рҟынӡа инаӡон, аныхтәқәа  – 1 295 861,6 нызықь мааҭ аҟынӡа. Ажьырныҳәамза 1, 2023 шықәсазы Афонд аҿы иаанханы иҟаз аԥаратә хархәагақәа рцәынха – 83 654,2 нызықь мааҭ рҟынӡа инаӡон.  

Ихымԥадатәиу амедицинатә бгаԥса Афонд ахашәалахәқәа –  54 490,0 нызықь мааҭ, аныхтәқәа  – 55 311,5 нызықь мааҭ;  Ажьырныҳәамза 1, 2023 шықәсазы Афонд аҿы иаанханы иҟаз аԥаратә хархәагақәа рцәынха –1 917,7 нызықь мааҭ рҟынӡа инаӡоит.

Арепатриациа Афонд ахашәалахәқәа – 211 459,8 нызықь мааҭ рҟынӡа инаӡа инаӡон, аныхтәқәа – 165 652,2 нызықь мааҭ; Ажьырныҳәамза 1, 2023 шықәсазы Афонд аҿы иаанханы иҟаз аԥаратә хархәагақәа рцәынха –162 900,4 нызықь мааҭ рҟынӡа инаӡон.  

1992-1993шш. Аԥсны жәлар рџьынџьтәылатәи еибашьра аинвалидцәа рҳәынҭқарратә биуџьеҭнҭыҵтәи Афонд ахашәалахәқәа – 165 414,0 нызықь мааҭ рҟынӡа инаӡон, аныхтәқәа - 163 577,4 нызықь мааҭ, ажьырныҳәамза 1, 2023 шықәсазы Афонд аҿы иаанханы иҟаз аԥаратә хархәагақәа рцәынха  –  18 265,6 нызықь мааҭ рҟынӡа инаӡон.

Асоциалтә бгаԥсеи аџьа ахьчареи Рфонд ахашәалахәқәа –  146 191,5 нызықь мааҭ рҟынӡа инаӡон, аныхтәқәа  – 113 723,7 нызықь мааҭ рҟынӡа инаӡон, ажьырныҳәамза 1, 2023 шықәсазы Афонд аҿы иаанханы иҟаз аԥаратә хархәагақәа рцәынха  –   46 242,9 нызықь мааҭ рҟынӡа инаӡон.

Амҩатә Фонд ахашәалахәқәа – 95 363,5 нызықь мааҭ, аныхтәқәа – 102 832,1 нызықь мааҭ, ажьырныҳәамза 1, 2023 шықәсазы Афонд аҿы иаанханы иҟаз аԥаратә хархәагақәа рцәынха  –  5 364,7 нызықь мааҭ рҟынӡа инаӡон.  

Атәыла аԥыза-министр Алеқсандр Анқәаб Атәанчаҩратә Фонди асоциалтә бгаԥсеи аџьа ахьчареи Рфонди русура бзианы ишынарыгӡаз азгәеиҭеит.

Атәанчаҩратә Фонд ахантәаҩы Денис Гәылариа  иахьатәи амш азы Афонд ауал амам ҳәа иазгәеиҭеит.

«Иахьатәи амш азы ҳара раионк ауп зфинанстәра мҩаԥаамгац, аха ҳазҭоу амчыбжь нҵәаанӡа уаагьы иахәҭоу ашәатәқәа зегьы ҟаҵахоит. Хы-шықәса рыла Афонд ахь алагалақәа 300 млн - 400 млн. мааҭ рыла иазҳаит. Сынтәа ҳара иара убри арежим ала аус аауеит, хымз рыла  40 млн рҟынӡа еихьӡарыла ҳаауеит», –  ҳәа иҳәеит иара.

Аҟәа. Хәажәкырамза 28, 2023 шықәса. Аԥсныпресс. Аминистрцәа Реилазаара 2022 шықәсазы ареспубликатә биуџьеҭ анагӡара азы аҳасабырба шьақәнарӷәӷәеит.

Аусшәҟәы адгалара мҩаԥигеит аԥыза-министр ихаҭыԥуаҩ, афинансқәа рминистр Владимир Делба.

2022 шықәсазы Аԥсны Аҳәынҭқарратә биуџьеҭ ахашәалахәытә хәҭа 13 736 931,1 нызықь мааҭ рҟынӡа инагӡахеит, аныхтә хәҭа 13 338 398,8 нызықь мааҭ рҟынӡа инагӡоуп. Аҳәынҭқарратә биуџьеҭ анагӡара иалҵшәаны иҟалаз апрофицит  398 532,3 нызықь мааҭ рҟынӡа инаӡеит.  

2022 шықәсазы ареспубликатә биуџьеҭ анагӡара ахашәалахәытә хәҭа 10 654 101,4 нызықь мааҭ рҟынӡа инаӡоит, аныхтә хәҭа ала - 10 438 198,1 нызықь мааҭ рҟынӡа инаӡоит, апрофицит   -  215 903,3 нызықь мааҭ рҟынӡа инаӡоит. 

Афинансқәа рминистр иажәақәа рыла, абар шьҭа ҩы-шықәса инеиԥынкылны аҳәынҭқарратә биуџьеҭ апрофицит ацны инагӡахоит. «2022 шықәсазы ишьақәгылаз апрофицит 398,5 млн. мааҭ рҟынӡа инаӡеит. Акыр шықәса раахыс раԥхьаӡа акәны  2022 шықәсазы ҳара абиуџьеҭ ахашәалахәытә хәҭа  анагӡара аҩаӡара 110% рҟынӡа инаӡартә еиԥш аҟаҵара ҳалшеит», - ҳәа иазгәеиҭеит Владимир Делба.  

Ахатәы лагалақәа рҟынтәи ишьақәгыло ахашәалахәқәа, 2022 шықәсазы 4 947 882,6 нызықь мааҭ, даҽакала иуҳәозар,  122,0 % рҟынӡа инаӡеит. 2022 шықәсазы ахатәы хашәалахәқәа 2021 шықәсазы аиԥш-зеиԥшу аамҭахәҭа иаҿырԥшны уахәаԥшуазар,   878 987,3 нызықь мааҭ рыла еиҳахеит.  

«Уаанӡа еиԥш уажәгьы, абиуџьеҭ алагалақәа аиҳара алазгало хылаԥшырҭаны иҟоуп ашәахтәқәеи аизгақәеи рзы Аминистрра. Уи алагала ашәагаа азеиԥш хатәы хашәалахәқәа рҟынтәи 53,4% рҟынӡа инаӡоит.  Аҳәынҭқарратә ҳазылхратә Еилакы - 37,7%, аҩныҵҟатәи аусқәа Рминистрра –  1,7%. Аҳасабырба алацәажәараан арҭ Ахылаԥшырҭақәа хԥа 93% рҟынӡа ареспублика ахатәы хашәалахәқәа шьақәдыргылоит», - ҳәа инаҵшьны иазгәеиҭеит Владимир Делба.

2022 шықәсазы азеиԥшҳәынҭқарратә зҵаарақәа рыӡбаразы ахарџь  1 883 016,1  нызықь мааҭ рҟынӡа инаӡеит (97,1 %). Урҭ рахьынтә:

– азакәанԥҵаратә мчра  аусбарҭақәа русура азы – 62 099,6 нызықь мааҭ, мамзаргьы даҽакала иуҳәозар, 100,0 %;

– анагӡаратә мчра аусбарҭақәа русура азы – 178 793,3 нызықь мааҭ, даҽакала иуҳәозар 97,3 %;

 – аӡбаратә система аусура азы – 200 643,6 нызықь мааҭ, даҽакала иуҳәозар 93,1 %;

– афинанстә, ашәахтә, аҳазылхратә усбарҭақәа русура азы - 392 947,9 нызықь мааҭ, даҽакала иуҳәозар  99,4 %;

– жәларбжьаратәи аусура азы – 99 167,3 нызықь мааҭ, даҽакала иуҳәозар 98,0 %;

– аҳәынҭқарратә уал ашәара азы – 31 827,8 нызықь мааҭ, даҽакала иуҳәозар т 96,2 %., 

 - арезервтә фондқәа рзы – 608 811,4 нызықь мааҭ, даҽакала иуҳәозар 100,0 %, Аҳәынҭқарра Ахада ирезервтә фондгьы уахь иналаҵаны – 508 898,6 нызықь мааҭ;

Аԥсны аминистрцәа Реилазаара арезервтә фонд – 99 912,8 нызықь мааҭ.

Аҳәынҭқарра Ахада ирезертә фонд ахарџь ала  2022-тәи ашықәс азы аԥсабаратә цәырҵра бааԥсқәа рыԥхьырҟәҟәаареи ахҟьаԥҟьақәа рықәгареи рзы иныхын 295 195,5 нызықь мааҭ, урҭ рахьынтә ауадаҩра иақәшәаз атәылауаа (1243 ҩык) аматериалтә цхыраара рыҭара азы 166 531,4 нызықь мааҭ, аиҭашьақәыргылара-ргыларатә усурақәа рымҩаԥгара азы 128 664,1 нызықь мааҭ.

2022 шықәазы хықәкылатәи аматериалтә цхыраара рыҭан  1924 – ҩык атәылауаа. Уи азеиԥш еицҵалыҵ 223 642,8 нызықь мааҭ рҟынӡа инаӡоит. 2022 шықәсазы аминистрцәа Реилазаара арезервтә фонд аҟынтәи аиҭашьақәыргылара-ргыларатә усурақәа рымҩаԥгара азы иазоужьыз аԥаратә хархәагақәа рзеиԥш еицҵалыҵ 67 119,9 нызықь мааҭ рҟынӡа инаӡоит.  34 инарзынаԥшуа аобиектқәа рреконструкциеи реиҭашьақәыргылареи рфинанстәра мҩаԥган.

Амилаҭтә шәарҭадареи азинхьчаратә усура аиҿкаареи рзы ахарџьқәа 1 786 721,0 нызықь мааҭ рҟынӡа инаӡеит.  (93,3 %). 

Амилаҭтә економика азы иазоужьуп 2 382 383,9 нызықь мааҭ. (88,6 %).

Аҵарадырра азы ахарџь 488 482,0 нызықь мааҭ рҟынӡа инаӡоит  (94,1 %), агәабзиарахьчара азы -  1 045 219,3 нызықь мааҭ (99,4 %), акультуре аҟазреи амасатә информациа ахархәагақәеи  рзы - 318 538,1 нызықь мааҭ (98,4 %), абҩарҵәыра, аспорт, аҿартә политика азы - 70 822,3 нызықь мааҭ (95,1 %),  асоциалтә политика азы – 287 786,0 нызықь мааҭ (94,8 %).

Атәыла абиуџьеҭ анагӡара азы аҳасабырба алацәажәараан аԥыза-министр иәаҭыԥуаҩ, аекономика аминистр Кристина Озган, 2022  шықәсазы абиуџьеҭ арбагақәа еиҳа идуны иҟоуп ҳәа иазгәалҭеит.

«Агәра ганы сыҟоуп 2023 шықәсазы ас еиԥш атемпи адинамикеи ишацҵахо», –  ҳәа илҳәеит лара.

Аҟәа. Хәажәкырамза 28, 2023 шықәса. Аԥсныпресс. Хәажәкырамза 23 рзы Аԥсныҟа иааит раԥхьатәи аконтеинертә дәыӷба. Авагонеиԥшьыра рыдыркылеит аихамҩатә станциа «Аҟәа» аҿы.   

Ари аҩыза ахҭыс Аԥсны аихамҩа аҭоурых аҿы раԥхьаӡа акәны иҟалеит.

Аԥсны Аихамҩа анапхгараҭара ас еиԥш апроект ахацыркра азы аӡбамҭа аднакылеит аидарамҩангарақәа реизырҳара хықәкыс иҟаҵаны.

Иааз авагонеиԥшьыра аҿы иҟоуп 62 контеинер, урҭ ирҭоу аидара акапан 2700 тонн рҟынӡа инаӡоит.  

Аҟәа. Хәажәкырамза 28, 2023 шықәса. Аԥсныпресс. Амҩаҿы аныҟәара ашәарҭадара ашьақәыргылара, аиҳарак аԥстәбарақәеи ааха ӷәӷәақәа раиуреи зцу амҩатә машәыртә хҭысқәа рхыԥхьаӡара армаҷра аҩныҵҟатәи аусқәа Рминистрра аусура ихадоу ахырхарҭақәа иреиуоуп, убри аҟнытә уи Ахылаԥшырҭа анапхгараҭара ҷыдала ахылаԥшра анаҭоит, ҳәа аҩаша, хәажәкырамза 28 рзы Аҳәынҭқарратә автоинспекциа ақалақьтәии араионтәии аҟәшеиҵақәа рнапхгаҩцәеи аинспекторцәеи алархәны имҩаԥигаз аусуратә еилатәара аҿы иазгәеиҭеит    аҩныҵҟатәи аусқәа рминистр ихаҭыԥуаҩ Беслан Ҷкадуа.  

Арбагақәа реиӷьтәра шыҟоугьы, Беслан Ҷкадуа иажәақәа рыла, «иҟоу аҭагылазаашьа уаанӡа еиԥш уажәгьы имариам, иарбоу ахырхарҭала анаҩсгьы аусура аҭахуп».

Аинспекторцәа рҿаԥхьа  автомашьына арныҟәцара азы азин аршаҳаҭга амхрагьы уахь иналаҵаны, азинеилагаҩцәа рганахьала, азакәанԥҵара инақәыршәаны ахьырхәратә усмҩаԥгатәқәа рынагӡара хықәкыс иҟаҵаны, раԥхьатәи аилагарақәеи анаҩстәи аилагарақәеи релектронтә реестр излауа ала ахархәара азы адҵа ықәыргылан.

Аҟәа. Хәажәкырамза 29, 2023 шықәса. Аԥсныпресс.  Хәажәкырамза 27 рзы Аҳәынҭқарратә ҳазылхратә Еилакы аҳазылхратә ԥыԥшырҭа «Ԥсоу» аконтрабати аҳазылхратә зинеилагарақәеи рзы аҟәша аусзуҩцәеи аҩныҵҟтәи аусқәа Рминистрра анаркотикатә маҭәашьарқәа реикәыршара аҿагылара аҟәша аусзуҩцәеи Аужьҭра-гәаҭаратә Ԥыԥшырҭа «Ԥсоу», «Импорт» ахырхарҭа ала аҳазылхратә гәаҭареи амашьына лассқәа ррежими рзона иахьаҵанакуа автомашьына ааныркылеит. Амашьына агәаҭараан ирыԥшааит иагьрымырхит аполиетилентә еилаҳәараки 1000 мааҭ ицо акупиура ала аилаҳәараки. Урҭ рыҩныҵҟа иҟан аххыраԥшра змоу амаҭәашьар. Иара убас ирыԥшааит  4 ҭрак ирҭаз (40 таблетка) «нейронтин» ҳәа изышьҭоу ахәшә.  

Аҟәа. Хәажәкырамза 29, 2023 шықәса. Аԥсныпресс. Урыстәылатәи Афедерациа атәанчаҩратә еиқәыршәареи асоциалтә бгаԥсеи Рфонд ала инамыцхәны аԥснытәи аган иазшәаз атәанчахәқәеи ацҵақәеи рхарҭәаара азы аԥҟара шьақәырӷәӷәоуп, ҳәа иаанацҳауеит Урыстәылатәи Афедерациа  Афедерациа Ахеилак аофициалтә саит.

У.А. Афедералтә Еизара Афедерациа Ахеилак аҿы «мшаԥымза 14, 2015 шықәса рзы иҭыжьыз «Иааиԥмырҟьаӡакәа Аԥсны инхо Урыстәылатәи Афедерациа атәылауаа атәанчахәы ала реиқәыршәара азы Урыстәылатәи Афедерациеи Аԥсны Аҳәынҭқарреи ирыбжьарҵаз Аиқәшаҳаҭра аиҭакрақәа ралагалара азы Апкаанҵа аратификациа азура азы» афедералтә закәан иақәшаҳаҭхеит.

Азҵаара ала ажәахә ҟаҵо дықәгылеит жәларбжьаратәи аусқәа рзы Афедерациа Ахеилак Акомитет алахәыла Сергеи Цеков.

Аҟәа. Хәажәкырамза 29, 2023 шықәса. Аԥсныпресс. Аполитикатә партиа «Аԥсны жәлар ракзаара Афорум» Аизара Ду мҩаԥысит ахаша, хәажәкырамза 29 рзы, асасааирҭа «Интер-Сухум» аконференц-зал аҿы. Апартиа анапхгаҩцәа асоциал-економикатә ҟазшьа змоу азҵаарақәеи аԥсуа ҳәынҭқарра ашәарҭадара иадҳәалоу азҵаарақәеи рзы ргәаанагарақәа рҳәеит.

Апартиа ахантәаҩы Аслан Барцыц, Аԥсны жәлар цәалашәараны ирныруеит ашәарҭара ишҭагылоу. Рыцҳарас иҟалаз, иахьа атәыла иахагылоу анапхгара агәҭынчымра узцәырызгашьа ахымҩаԥгашьа рымоуп ҳәа иазгәеиҭеит. 

«Абар шьҭа ԥшьы-шықәса ирылагӡаны ҳара атәыла анапхгара ҳаамҭазтәи аҳәынҭқарра ашьаҭаркҩы Владислав Арӡынба дзыдгылоз, аконституциатә шьаҭа аилымшәареи ахьыԥшымреи иазырхоу амилаҭ-хақәиҭратә курс амҩаԥгара иадҳәалоу аидеиа хада ацәхьаҵра ишаҿу аабоит», – ҳәа инаҵшьны иазгәеиҭеит иара.

Аслан Барцыц агәра ганы дыҟоуп ахьыԥшымра иазырхоу акурс ауп Аԥсны 1993 шықәсазы аиааира агарареи 2008 шықәсазы Урыстәылатәи Афедерациа ала Аԥсны ахьыԥшымра азхаҵареи рахь иназгаз. Аха ҳазҭагылоу аамҭазы атәыла ауааԥсыра реихьӡарақәа зегьы «планла ахә армариара» мҩаԥысуеит.   

Уи иажәақәа рыла атәыла аҿы амилаҭтә амшхәаԥштә шыҟам умбар залшаӡом. Аслан Барцыц ишазгәеиҭаз ала, аӡәгьы ишахәҭоу ала, ҭакԥхықәрала дазнеиӡом адемографиа, арепатриациа, аекономика арӷәӷәара, атәылахьчара, аҵарадырра, агәабзиарахьчара, Нхыҵ Кавкуаз ҳаиашьаратә жәларқәеи аԥсуа жәлари реизыҟазаашьақәа, уҳәа хадара злоу азҵаарақәа рыӡбара.

«Зегьы ахаламҩаԥысрала ицоит. Иахьа атәыла иахагылоу рзы хадара злоу усны иҟалеит аиҳарак амшын аҿықәан иҟоу иреиӷьу адгьылқәа рыҭирала  алигархцәеи аҳәаанырцәтәи амалуааи ринтересқәа алоббизм аҟаҵара», – ҳәа иазгәеиҭеит Аслан Барцыц.

Ҷыдала иақәыӡбан Пицундатәи аҳәынҭқарратә дача Урыстәылатәи Афедерациа ахатәрахь аҭара азы аиқәшаҳаҭра.  Ажәахәҟаҵаҩы игәаанагарала, уи анапаҵыҩра «ажәлар ирыцәӡаны, маӡала, азакәанԥҵара ӷәӷәала аилагарала» имҩаԥысит. 

«Ари аусшәҟәы иаҵоу аниуансқәа зегьы ишахәҭоу ала аус адызулараны иҟаз аусбарҭақәа акоординатқәа ралкаара аганахьала агха дуқәа ҟарҵеит. Ари афакт апрокуратура Хада ала  ишьақәыргылахеит», – ҳәа инаҵшьны иазгәеиҭеит Аслан Барцыц.

Аҟәа. Хәажәкырамза 29, 2023 шықәса. Аԥсныпресс.  Зҭакԥхықәра Ҳәаақәҵоу Аилазаара «Аԥсны аҩқәеи аӡқәеи» иҭнажьуа хә-хкык аҩқәа иџьбарам арыжтәқәеи акониаки аҩқәеи аликиоруадкатә рыжтәқәеи Жәларбжьаратәи аконкурс аҿы ахьтәы медалқәа ранашьахеит.  Абри атәы аанацҳауеит азауад Инстаграм аҿы иамоу адаҟьа.

Аконкурс мҩаԥысуан Шәача ақалақь, хәажәкырамза 23 -25 рзы.

Амедалқәа ранашьахеит:

– акрызхыҵуа аҩеиқәтәа ҟаԥшь «Ашҭа Лаша»,

–акрызхыҵуа аҩеиқәтәа ҟаԥшь «Аҭауад Гәымсҭа Ашҭа»,

– еиқәтәахьоу, агәилԥштәы змоу аҩҿа «Гәымсҭа Ашҭа»,

–  еиқәтәахьоу аҩҿа ҟаԥшь «Чегем»,

– иҿыхаам аҩеилачча шкәакәа «Лыхны».        

Аҟәа. Хәажәкырамза 29, 2023 шықәса. Аԥсныпресс. Имҩԥысит Ауаажәларратә Палата VI ааԥхьара раԥхьатәи апленартә еилатәара.   Араҟа иалхын Ауаажәларратә Палата амаӡаныҟәгаҩи амаӡаныҟәгаҩ ихаҭыԥуаҩцәеи.

Ауаажәларратә Палата амаӡаныҟәгаҩыс ҩаԥхьа далххеит Гәыли Кьычба. Амаӡаныҟәгаҩ лхаҭыԥуаҩцәас иалххеит Витали Смыр, Алеқсандр Страничкин, Низам Хапати Изольда Ҳагбеи.

Ауаажәларратә Палата алахәыла Сократ Џьынџьал ажурналистцәа дрыҿцәажәо актәи аилатәара аихшьаалақәа дрыхцәажәеит.

«Убас иҟалеит, сара Ауаажәларратә Палта ааԥхьарақәа зегьы рлахәылас сыҟан. Иубаратәы иҟоуп атәыла Ауаажәларратә Палата аусура ахь ринтерес ессаира ишазҳауа. Уи арҵабыргуеит ауаажәларратә еиҿкаарақәеи аполитикатә партиақәеи рыла Ауаажәларратә Палата аилазаара ахь зыдгалара мҩаԥгаз акандидатцәа рхыԥхьаӡара. 11 ҭыԥ ахь иадгалан 42-ҩык. Аконкурс ду ыҟан, уи ауааԥсыра  Ауаажәларратә Палата еиԥш иҟоу ауаажәларратә еилазаара аинститут аусура ишазҿлымҳау аанарԥшуеит. Иахьа актәи аилатара мҩаԥысит, далххеит амаӡаныҟәгаҩ», – ҳәа иҳәеит Сократ Џьынџьал.  

Иара ишазгәеиҭаз ала, ҩ-кандидатурак ықәыргылан - Давид Ԥлиеи Гәыли Кьчбеи. «Аҩ-кандидатурак иҭышәынтәалоу аҭагылазаашьа аҿы ирыхәаԥшит.

Аҟәа. Хәажәкырамза 29, 2023 шықәса. Аԥсныпресс. Хәажәкырамза 28 рзы С.Иа.Ҷанба ихьӡ зху аҳәынҭқарратә драматә театр аҿы ажурналист, афилологиатә наукақәа ркандидат Екатерины Бебиа лышәҟәқәа ҩба – «Харада ахара зыдҵаз»,  «Ахашҭра аҟынтәи – ахьыӡ камшәара аҟынӡа» рӡыргара мҩаԥысит.

Аӡыргара еиҿнакааит атәыла акультура Аминистрра. Уи амҩаԥгара аҭыԥ алхрагьы машәыршақә иҟамлаӡеит. 1937 шықәсазы атеатр азал аҟны имҩаԥган 13-ҩык аԥсуа интеллигенциеи аполитикатә елитеи рхаҭарнакцәа рус аӡбара.   

Екатерина Бебиа лышәҟәқәа рҿы 300-ҩык инарзынаԥшуа ауаа рлахьынҵа атәы еиҭалҳәоит.  Арҭ ашәҟәқәа рҭыжьразы ажурналист аинформациа аизгара даҿын 40-шықәса инареиҳаны.