Аҟәа. Цәыббрамза 25, 2023 шықәса. Аԥсныпресс. Цәыббрмза 26 – 27 рзы Ф.А. Искандер ихьӡ зху Аҳәынҭқарратә аурыс драматә театр аҿы А.С.Пушкин ироман дуӡӡа «Евгени Онегин» ала иқәыргылоу аспектакль аԥхьарбара мҩаԥысраны иҟоуп. Абри азы адырра ҟанаҵоит Аурыс драматә театр аофициалтә саит.
Ԥсра зқәым «Евгени Онегин» ззымдыруа дыҟамзар ҟалап. Аԥсҭазаара ҵакыс иамоу аилкааразы ақыҭарахь еихаз, аха араҟагьы уи анизымԥшаа агәҿыӷь иагоз, изцәагои ҳәа игәызианӡа иҟаз аҭаԥҳа азнаказы дхыхны, нас лгәы ҿызкааз, адуель аҿы зҩыза гәакьа иааигәыдҵан дызшьыз, ацәгьацәыԥхамшьашәа иҟоу ахаҵа изку ахристоматиатә сиужет Искандер Итеатр аспектакль ҿыц аҿы дарбанызаалак ахәаԥшыҩ изааигәоу абзиабара аԥшаара аҭоурых аарԥшрахьы ииасуеит.
Аспектакль ахәмарра адикорациақәа рышьақәыргылареи истильрку акостиумқәеи рхархәарала имҩаԥысуеит. Аха убри аан уи аурыс психологиатә театр атрадиақәа инарықәыршәаны ишьақәыргылоуп. Араҟа акцент хада актиорцәа роуп изықәку, урҭ апоетикатә текст арҵабыргра «аԥсы аҭаҵара» рылшартә аҟаҵара.
Аклассикатә текст аанханы иахьыҟоу ақәыргыламҭа аиумор ласи акы иаламҩашьо пушкинтәи аирониеи рыла игәылырҭәаауп. Араҟа иҟоуп угәы шьҭызхуа еиԥш улахь еиқәызҵогьы, узырхәыцуа, иара убасҵәҟьа ахыркәшамҭа азыԥшрала угәы зырхыҭхыҭуа аҭыԥқәа.
Арежиссиор Сергеи Ефремов уажәаԥхьагьы «Евгени Онегин» ала аспектакльқәа ықәиргылахьан. Аха хазы игоу аус зуа ахаҿы – иналукааша асахьаҭыхыҩ Денис Солнцев иқәиргыло алашара змоу Аурыс драматә театр аспектакль, аԥсуа актиорцәа ртемпераменти ренергиеи аклассикатә тексти аурыс театр зеиӷьаҟам атрадициақәеи ахьеиларсу иҷыдоу асахьаркыратә лҵшәа аазырԥшраны иҟоу иҿыцу рҿиамҭаны иҟалоит.
Аспектакль, А.С.Пушкин ироман ахаҭагьы еиԥш, ухызхуа абзиабара аҭоурых ала ишьаҭарку игәмырҿыӷьгоу, иара убри аамҭазы апарадоксқәеи амаӡақәеи злоу жәабжьны иҟоуп.
Аиҿагылара, ашәагаарацәара ҟазшьаҷыдараны измоу Пушкин ироманқәа есааира аҵакырацәара шаныԥшуа умбар залшом. Пушкин иҩымҭақәа зегьы рҿы аԥхьаҩ цәаҳәацыԥхьаӡа иара изы акыр зҵазкуа, ихадоу џьара акы иԥымлар залшаӡом. «Евгени Онегин» ахаангьы актуалра ацәыӡраны иҟаӡам, ҩышә шықәса шыҵхьоугьы, аурыс поет дуӡӡа усҟантәи игәҭахәыцрақәеи игәаанагарақәеи иахьатәи аамҭа уамашәа ишақәшәо умбар залшом.
Аспектакль Аконцертә усура аиҿкаара адгылара аҭара азы Автономтә икоммерциатәым Аиҿкаара «Аурыс сезонқәа» агрант ала иаԥҵан. Убри аан акыр ацхыраареи адгылареи ҟанаҵеит Урыстәылатәи Афедерациа акультура Аминистрра. Уи 2024 шықәсазы иазгәарҭараны иҟоу А.С.Пушкин иира Амш инамаданы еиҿкаауп.
