Аҟәа. Цәыббрамза 25, 2023 шықәса. Аԥсныпресс. Константин Ахба самбо азы жәларбжьаратәи акласс аспорт азҟаза Владимир Соловиов ихьӡ зху абокс азы атурнир аҿы аиааира игеит. Атурнир цәыббрамза 22 инаркны 24-нӡа Санкт-Петербург ақалақь имҩаԥысуаз наҟ-ааҟ ҩыџьа реиндаҭларазы XII Афестиваль аҳәаақәа ирҭагӡны еиҿкаахеит.
Аԥсны аҿари аспорти русқәа рзы аҳәынҭқарратә Еилакы иҟанаҵо адыррақәа рыла, аԥснытәи аспортсмен зыкапантә категориа 52 кьыла рҟынӡа иҟоу рыбжьара Санкт-Петербург ақалақь Аолимпиатә гәыӷрақәа рышкол ахьӡала дықәгылеит. Афиналтә еиндаҭлара аҿы Константин Ахба Ленинградтәи аобласть аспортсмен Илиа Кустариов дииааит.
Владимир Соловиов ихьӡ зху Афестиваль иаднаԥхьалеит 3,5 нызықьҩык рҟынӡа аспортсменцәеи азыҟаҵаҩцәеи. Афестиваль есышықәса имҩаԥысуеит, уи хыԥхьаӡара рацәала ахырхаҭақәа амоуп: акарате, зхы иақәиҭу аиқәԥара, абокс, агеэпплинг, асамбо.
Константин Ахба – Михаил Чачба ихьӡ зху гәдоуҭатәи аспорттә школ ааӡамҭа иоуп. Уи, 13-14 шықәса зхыҵуа арԥарцәа рыбжьара абокс азы Урыстәыла аԥхьахәгара аҿы аџьазтә медал ианашьахеит. Азыҟаҵаҩцәа Аслан Ахбеи Едуард Депелиани рааӡамҭа иоуп.
