Аҟәа. Лаҵарамза 2, 2023. Апсныпресс. Атәыла аԥыза-министр Алеқсандр Анқәаб Урыстәылатәи Афедерациа анаукеи иреиҳаӡоу аҵарадырреи рминистр ихаҭыԥуаҩ Константин Могилевски диԥылеит, ҳәа адырра ҟанаҵоит Аԥсны аминистрцәа Реилазаара апресс-маҵзура.  

Аганқәа анаукеи аҵарадырреи русхки, иара убас азакәанԥҵаратә усхки рҿы аусеицура аҿиара иадҳәалоу азҵаарақәа жәпакы ирылацәажәеит, анаукатә еилазаарақәеи егьырҭ анаука-ҵарадырратә усура аҿиара аинститутқәеи реицапҵара азҵаарақәа ирзааҭгылеит.  

Константин Могилевски урыстәылатәи аган аринахысгьы Аԥсны аконсультативтәи ахархәаратәи ацхыраара аҭара ишазхиоу азгәеиҭеит.

Аҟәа. Лаҵарамза 2, 2023 шықәса. Аԥсныпресс /Алексеи Шамба/. Асахьаҭыхыҩ Адгәыр Амԥар иусумҭақәа рцәыргақәҵа аатит Аԥсны асахьаҭыхыҩцәа Реидгыла ацәыргақәҵатә зал Хада аҟны. Аекспозициа иалоуп 37 асахьатә усумҭа, 22 – ҿыханҵа, 15 – аграфикатә ҭыхымҭақәа.

Ацәыргақәҵатә зал Хада адиректор Ельвира Арсалиа лажәақәа рыла, Адгәыр Амԥар ицәыргақәҵа – ари енагь даара аинтерес зҵоу акакәны иҟоуп, избан акәзар «акыр имариамыз асахьаҭыхыҩ иԥсҭазааратә мҩа есымша исахьақәа, иааизакны ирҿиара ирнубаалоит». Адгәыр лассы-лассы имариам азҵаарақәа шьҭихуеит, иаагозар, ауаҩы ҳаамҭазтәи адунеи аҿы иааникыло аҭыԥ, атехнологиақәа рыҿиареи азаҵәреи ртема». Ельвира Арсалиа лгәаанагарала, Адгәыр Амԥар ҷыдала ахәаԥшцәеи иареи аимадара ӷәӷәа рыбжьоуп, асахьаҭыхыҩ иусумҭақәа рҿы еснагь анализ аҟаҵаразы аҭыԥ аанижьуеит.

Акультура аминистр Даур Ақаҩба асахьаҭыхыҩ хаҭалатәи ицәыргақәҵа ахьалыршахаз азы дидныҳәалеит, убри аан уи иибаз асахьақәа ддыршанхеит ҳәа иазгәеиҭеит.

«Иазгәасҭарц сҭахуп, иахьарнахыс урҿиамҭақәа рыбзиабаҩцәа рхыԥхьаӡара ишацлаз», - ҳәа Адгәыр Амԥар иахь ихы рханы иҳәеит атәыла акультура аминистр.  

Икьаҿу аофициалтә хәҭа аамышьҭахь хыԥхьаӡарацәала иааз ахәаԥшцәа ицәыргақәҵаз асахьақәа хшыҩзышьҭрала рыхәаԥшра, даҽакала иуҳәозар рыҭҵаара иалагеит. Шамахамзар џьара иуԥымло агеометриатә фигурақәа рырацәара, аусумҭақәа зегьы рҿы ҷыдала аԥштәылгареи ацентр алкаареи ирыбзоураны улаԥш иузаҟәымҭхо ирыдхалон.  Дара асахьақәа рыдагьы урҭ рыхьӡқәагьы, иаагозар, «Аобиект аус адулара», «Аҟьаҟьара аизшәара», «Аҵакы агәалҭәаара», «Амистериа», уҳәа убас иҵегьы аинтерес рыҵоуп.  

Аҟәа. Лаҵарамза 2, 2023 шықәса. Аԥсныпресс. Аҟәа ақалақь Ахадара Аӡаԥшьи Гарикәареи аӡиасқәа рӡыршьҭрақәа ррыцқьара азы аԥаратә хархәагақәа азоунажьит.  Иара убас мҽхакы ҭбаала имҩаԥган Басла аӡиас аӡыршьҭра арҭбаара иазкыз аусурақәагьы, ҳәа адырра ҟанаҵоит аҳҭнықалақь Ахадара.

«Аӡаԥшь аӡиас аӡыршьҭра рыцқьахоит. Уаанӡа араҟа арыцқьаратә усурақәа 2020 шықәсазы имҩаԥган. Уи иабзоураны аӡхыҵра иахҟьаны Титов имҩеи уи азааигәара иҟоу аҵакырақәеи аӡы рықәлара аԥхьырҟәҟәаара алыршахеит.  Иахьа ари аусура ҩаԥхьа ацҵаразы аамҭа ааит», -ҳәа 2023 шықәса актәи аԥшьбаразы  аусура аихшьаалақәа рыҟаҵара иазкны Аҳәынҭқарра Ахада Иусбарҭа аҟны  имҩаԥгаз аусуратә еилатәара аҿы дықәгыло иҳәеит Аҟәа ақалақь ахада Беслан Ешба.

Аҟәа. Лаҵарамза 2, 2023 шықәса. Аԥсныпресс. Аԥсны имҩаԥысит акциа «Аҟәа-Одесса». Уи Одесса ақалақь, лаҵарамза 2, 2014 шықәсазы иҭахаз ргәалашәара иазкын.  

Акциа иалахәыз амшын ихырҵеит ақьаад иалхыз 48 ӷба, убри аҟара ауаа ҭахеит усҟан иҟалаз атрагедиа аҿы, ҳәа адырра ҟанаҵоит Москватәи Акультра-усуратә Центр «Москва-Аҩны» апресс-маҵзура.

Абар ҩышықәса инеиԥынкыланы имҩаԥгахо ари аусмҩаԥгатә аиҿкаара рхахьы иргеит акультуратә фонд «Платформа», ауаажәларратә еиҿкаара «Аԥсны иқәырхо Урыстәыла атәылауаа рзинқәа рыхьчаразы Ацентр». Убри аан адгылара ҟанаҵеит Аԥсны иқәынхо урыстәылатәи аидгьылуаа Рассоциациа.

Аҟәа. Лаҵарамза 2, 2023 шықәса. Аԥсныпресс.  Аҳәынҭқарратә автоинспекциа аусзуҩцәа иҳасыз амчыбжьи аԥсшьарамшқәеи рзы имҩаԥыргаз апрофилактикатәи ареидтәи усмҩаԥгатәқәа раан 1691 амҩаҿы аныҟара аԥҟарақәа реилагара  аадырԥшит.  Урҭ рахьынтә 67 – автомашьынақәа рыԥшшәахәыркра анормақәа реилагара иадҳәалоуп. Автомашьынақәа рсаркьақәа рыԥшшәахәыркра аҭыԥаҿы иаԥыхын.

Аҟәа. Лаҵарамза 2, 2023 шықәса. Аԥсныпресс. Аԥсны ахәыҷтәы-қәыԥштә хореографиатә ансамбльқәа XXV Ареспубликатә конкурс «Аӡыхь – 2023» («Родничок») лаҵарамза 4-5 рзы,  Р.Гәымба ихьӡ зху Аԥснытәи аҳәынҭқарратә филармониа аҿы имҩаԥысраны иҟоуп.  

Аконкурс абарҭ аноминациақәа рыла имҩаԥысуеит: аԥсуа жәлар рыкәашара, адунеи ажәларқәа рыкәашарақәа;  

Ҳаамҭазтәи акәашара;

Аицыкәашара ;

Ахкытә кәашара.

Алахәылацәа ақәратә гәыԥқәа ҩба рыла еихшоуп: аиҵбыратә гәыԥ – 7 шықәса зхыҵуа инадыркны  12 шықәса зхыҵуа рҟынӡа; аиҳабыратә гәыԥ –13 шықәса зхыҵуа инадыркны 18 шықәса зхыҵуа рҟынӡа.

Аконкурсантцәа абарҭ акритериақәа рыла ахәшьарақәа рыҭахоит: иҳараку анагӡаратә ҟазара; акәашара атема аоригиналтә ҟазшьа аҭаны асценаҿы аарԥшра; акәашара амузыка ацнагӡара, асценатә культуреи акостиуми.

Аҟәа. Лаҵарамза 2, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа дызхагылоу Аԥсны Аҳәынҭқарра аделегациа лаҵарамза 2-4 рзы Аминералтә ӡқәа рыҟны раԥхьаӡақәны имҩаԥысуа Кавказтәи аинвестициатә цәыргақәҵа далахәхоит.

Иахьа аԥснытәи аделегациа Урыстәылатәи Афедерациа – Ставропольтәи атәылаҿацә ашҟа ицеит.

Аделегациа аилазаараҟны иҟоуп: аԥыза-министр ихаҭыԥуаҩ, аекономика аминистр Кристина Озган, атуризм аминистр Ҭемраз Хышба, Аԥсны Жәлар Реизара – Апарламент Аекономикатә политикеи, ареформақәеи, аинформациатә технологиқәеи рзы аилак ахантәаҩы Резо Занҭариа, Аԥсны Жәлар Реизара – Апарламент Абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Беслан Ҳалуашь.

Аҟәа. Лаҵарамза 2, 2023 шықәса. Аԥсныпресс.  Аԥсны аҩаша, лаҵараза 2 рзы Аминералтә ӡқәа рыҟны имҩаԥысуа Кавказтәи аинвестициатә цәыргақәҵа иалахәхоит.  

Ацәыргақәҵа Урыстәыла арегионқәа ринвестициатә потенциал аҿиара азы аҳәынҭқарреи абизнеси рыбжьара аусеицура азы иҿыцу плошьадканы иҟалоит. Аусмҩаԥгатә алахәылацәа аинфраструктуратәи аинновациатәии апроектқәеи апрограммақәеи рынагӡара аусхкы аҿы ҳаамҭазтәи атенденциақәеи аперспективақәеи рбареи реилкаареи рзы алшара роуеит», - ҳәа адырра ҟаҵоуп «Это Кавказ» асаит https://etokavkaz.ru аҿы.

Лаҵарамза 3 – 4 рзы имҩаԥысло Кавказтәи аинвестициатә цәыргақәҵа аусуратә программа иалагалоуп асессиақәеи астол гьежьқәеи.

Раԥхьатәи амш, лаҵарамза 2 азы ацәыргақәҵатә експозициа аусура иалагоит. Рыстендқәа рыдгалара мҩаԥыргоит  Ареспублика Даӷьсҭан, Чечентәылатәи Ареспублика, Ингуштәи Ареспублика, Нхыҵ Уаԥстәыла-Аланиа, Ҟабарда-Балкариатәи Ареспублика,  Ҟарачы-Черқьестәи Ареспублика, Ставропольтәи атәылаҿацә, иара убас Аԥсны Аҳәынҭқарреи Аахыҵ Уаԥстәылеи. Аекспозициа азона хаданы иҟалоит Акционертә Еилазаара «Кавказ.РФ» аҿиара Аинститут» еидкылоу астенд. Араҟа Нхыҵ Кавказ акурортқәа анаҩстәи рыҿиара азы апланқәеи амакрорегион ихадоу аинвестициатә проектқәеи рыдгалара мҩаԥгахоит.

Аҟәа. Лаҵарамза 1, 2023 шықәса. Аԥсныпресс.  Маи 1 азы Аԥсны Ахада Аслан Бжьаниа Лыхнашҭа даҭааит. Ибеит апрель 5 азы ааха зырҭаз аҭәаҵла ду аҭагылазаашьа. Аҭәаҵла абӷьы ҿалеит, иара еиқәхоит ҳәа агәыӷра ыҟоуп.

«Аҵла аҭагылазаашьа хар амам, абыӷьқәа ылнагеит. Ҳгәыӷуеит уи аԥсы ҭахап ҳәа. Убри азы иааҳалшо зегьы ҟаҳҵоит», – иҳәеит  Аҳәынҭқарра Ахада .

Гәдоуҭа. Лаҵарамза 1,  2023 шықәса. Аԥсныпресс.  Маи 1 азы Гәдоуҭа ақалақь аҟны Аԥсны иналукааша аҳәынҭқарратә усзуҩ Нестор Лакоба диижьҭеи 130 шықәса аҵра иазкны агәалашәаратә усмҩаԥгатәқәа нарыгӡеит.

Аҳәынҭқарреи Гәдоуҭа араиони рнапхгаҩцәа, ауаажәларра, аижәлантәқәа Лакобаа, Аԥсны Акоммунисттә партиа рхаҭарнакцәа, ашколхәыҷқәа Н.А.Лакоба ибаҟаҿы ашәҭқәа шьҭарҵеит. Анаҩс акультура Аҩнаҿы имҩаԥысит Лакоба игәалашәара ахәылԥаз. Уи даҭааит аҳәынҭқарра Ахада.

Акультура Аҩны уахьааҩнало еиҿкаан Лакобеи уи иҭаацәеи ирызкыз афотоцәыргақәҵа.

Ахәылԥаз аартуа, Гәдоуҭа араион Ахадара аиҳабы ихаҭыԥуаҩ Валери Аҩӡба иазгәеиҭеит Нестор Лакоба иԥсадгьыли ижәлари аԥхьа иширгылоз.

Ашколхәыҷқәа еиҭарҳәеит Нестор Лакоба иԥсҭазаара, 30-тәи ашықәсқәа раантәи атрагедиатә хҭысқәа, иара убас урҭ Лакоба изкыз ажәеинраалақәа ирыԥхьеит.