Аҟәа. Рашәарамза 23, 2023 шықәса. Аԥсныпресс. Апрокуратура Хада Крылов Евгени Алеқсандр-иԥа Аԥсны Аҳәынҭқарра Ашьаустә Закәанеидкыла   99 ахәҭа 2 апунктқәа «а»,  «д»,  «к» рыла иазԥхьагәаҭоу ацәгьоурақәа («Ауаҩшьра»), иара убас Ашьаустә Закәанеидкыла ахәҭаҷ    29, ахәҭа  3 ала иазԥхьагәаҭоу ацәгьоура («Ацәгьоура аҽахыҟаҵареи ацәгьоура аҽазышәареи») рыла ахарадҵа идҵоуп, ҳәа адырра ҟаҵоуп Аԥсны Аҳәынҭқарра апрокуратура Хада асаит аҿы.

Аҟәа. Рашәарамза 23, 2023 шықәса. Аԥсныпресс. Бзыԥтәи абжьаратәи ашол № 1 аҿы шьаҭанкыла аспортзал аиҭашьақәыргылара, Бзыԥтәи абжьаратәи ашкол №2 ахыбра аԥсахра, иара убас Гагра араион Пицунда ақалақь абжьаратәи ашкол №1 аспортзал аиҭашьақәыргылареи мҩаԥысуеит. Уи афинанстәра Гагра араион Ахадара ала имҩаԥысуеит.

Хәы-шықәса ирылагӡаны Бзыԥтәи абжьаратәи ашкол №1  аркын, уи аҭагылазаашьа амашәыр ахылҿиаар ахьалшоз инамаданы.

Гагра араион ахада ихаҭыԥуаҩ Хана Гәынба ишеиҭалҳәаз ала, ажәытә спортзал ықәганы шьаҭанкыла аҿыц аргылара иалагеит.

«Иарбоу апроект ахарџьынҵа – 27 млн. мааҭ рҟынӡа инаӡоит. Цәыббрамзазы  - аспортзал ҿыц аргылара ахыркәшара азԥхьагәаҭоуп, уи ашколтә ԥсҭазаара иақәшәо иҟаҵахоит. Араҟа иҟалоит амҵәышәмпыли анапылампыли рзы  аплошьадкақәа», – ҳәа илҳәеит лара.

Аҟәа. Рашәарамза 23, 2023 шықәса. Аԥсныпресс. Рашәараза 22-23 ауха рзы илеиз ақәаршыҩ иахҟьаны Очамчыра араион ақыҭақәа фба амшцәгьа аԥхасҭа роуит.

«Ахәҭакахьала,  ақыҭақәа Тамшь, Лашькьындар, Акәасқьа, Баслахә, Лабра, Кәтол ахатәыҩнқәа актәи аихагылақәеи агәраҵақәеи аӡы рыҵалеит, ацҳақәа агеит.

Очамчыра араион Амцарцәара-еиқәырхаратә ҟәша аиқәырхаҩцәа аҩнқәа ирыҩналаз аӡы аҭгареи аудақәа ррыцқьареи, иара убас аҩнымаҭәеи атехниеи рдәылгареи рҿы аҭыԥантәи ауааԥсыра ирыцхраауеит», - ҳәа иазгәаҭоуп Иҷыдоу аҭагылазаашьақәа рзы Аминистрра иҟанаҵо адыррақәа рҿы.

Аҟәа. Рашәарамза  23,2023 шықәса. Аԥсныпресс. Ҭҟәарчал ақалақь Аалӡга аӡиас иху ацҳа аҿы ашьаҟамҩа хаҳәцәыла ачаԥара иазку аусурақәа ахыркәшамҭахь инеиуеит.

Зҭакԥхықәра Ҳәаақәҵоу Аилазаара «СтройДом»  адиректор Раули Шамугиа иҟаиҵаз адыррақәа рыла, ашьаҟамҩатә хаҳәцәы ашьҭаҵара иазку аусурақәа иҳаҩсыз ашықәс азы ихацыркын, аусурақәа рхықәшара радхалара аобиективтә ҵаҵӷәқәа амоуп.

«Аусурақәа маҷк ада зегьы хыркәшоуп. Мызкы иалагӡаны ҳара ахаҳәцәы ашьҭаҵара ҳалгоит. Ахаҳәцәы ахьықәҵоу азеиԥш ҵакыра 1 160 ԥшьыркца метра  рҟынӡа инаӡоит. Ишьҭаҳҵахьеит 745 ԥшьыркца  метра рҟынӡа. Аусурақәа 70 процент рыла инагӡоуп», -ҳәа инаҵшьны иазгәеиҭеит Раули  Шамугиа.

Аҟәа. Рашәарамза 23, 2023 шықәса. Аԥсныпресс.  Аҟәатәи амшынтә баӷәаза ахь инеит акруизтә лаинер «Князь Владимир». Ари урыстәылатәи аӷба Аҟәаҟа инанагӡо аҩбатәи аԥышәара-гәаҭаратә ныҟәароуп.

Алаинер абаӷәазанӡа инаӡеит рашәарамза 23, ахәаша ашьжьымҭан, асааҭ 8:30 рзы.  

Зынӡа 2023 шықәсазы аԥхынтәи аамҭахәҭа иалагӡаны алаинер инанагӡоит 11 реис.

Иара уажәы Шәача-Новороссиск-Иалта-Севастополь-Шәача амаршрут ала иныҟәалоит.

Акруиз 5 мыш ирҭагӡахоит (3 мыш Аҟәатәи амшынтә баӷәазаҿы игылазаауеит). Зынӡа аԥхынтәи аамҭахәҭа иалагӡаны алаинер инанагӡоит 11 реис, есымчыбжьы – рашәарамза 29 инаркны цәыббрамза 11 аҟынӡа.

Ареспубликатә Унитартә Наплакы «Аԥснытәи амшынтә ӷбаныҟәара» адиректор Хада Даур Арӡынба иажәақәа рыла, алаинер иҭоуп 54 – ҩык апассаџьырцәа.

«Уи аекскурсиатә маршрутқәа ҭызҵаало еиуеиԥшым атуристтә еилазаарақәа рхаҭарнакцәа роуп.  96 -ҩык – уи аекипаж алахәылацәа роуп», -ҳәа иазгәеиҭеит иара.

Аҟәа. Рашәарамза 23, 2023 шықәса. Аԥсныпресс. Аминистрцәа Реилазаара Ақәҵарала аҳәынҭқарратә мазара анапхгараҭареи априватизациеи рзы Аҳәынҭқарратә Еилакы Пицунда ақалақь аҿы иҟоу апансионат «Самшитовая роща» амазаратә комплекс  Аԥсны аҳәынҭқарратә шәарҭадара Амаҵзура аоперативтә напхгараҭара аҳасабала аҭара азы адҵа аҭоуп.

Аҟәа. Рашәарамза 22, 2023 шықәса. Аԥсныпресс. Ацәыргақәҵатә Зал Хада аҿы асахьаҭыхҩы Марииа Ԥлиа ҳаамҭазтәи аҟазара иазку лцәыргақәҵа «Упала в краску» аатит.  

Аекспозициа иалалаз аусумҭақәа реиҳарак 2023 шықәсазы иаԥҵоуп.

Аҟәа. Рашәарамза 22, 2023 шықәса. Аԥсныпресс. Аминистрцәа Реилазаара Ақәҵарала, рашәарамза 28, ахаша, Кәырбанныҳәа («Курбан-баирам») аныҳәа азгәаҭара иазкны иусуратәым аныҳәатә мшны ирылаҳәахоит. 

Аҟәа. Рашәарамза 22, 2023 шықәса. Аԥсныпресс.  аӡиудо азы XV жәларбжьаратәи атурнир «Аиааира Ахраҿа» аицлабрақәа  рҿы  2010-2011 шш. рзы ииз ақәратә категориа иаҵанакуа рыбжьара аиаареи аԥхьахәқәеи згаз алкаахеит.   

34 - кьыла иҟоу акапантә категориа иаҵанакуа рыбжьара актәи аҭыԥ ааникылеит Гордеи Шакура (ақ. Ессентуки), аҩбатәи - Лука Кәарацхьелиа (ақ. Гал), ахԥатәи аҭыԥқәа ааныркылеит - Елисеи Петровец (ақ.Пермь), Лаша Ҳашба (ақ. Аҟәа).

38 - кьыла иҟоу акапантә категориа иаҵанакуа рыбжьара актәи аҭыԥ ааникылеит Кирилл Попов (Пермтәи атәылаҿацә), аҩбатәи аҭыԥ ааникылеит Ладо Гулордаа (ақ. Шәача), ахԥатәи аҭыԥқәа ааныркылеит - Арзум Арутиуниан (Ареспублика Адыгеиа), Ника Кәарацхьелиа (ақ. Гал).

42 - кьыла иҟоу акапантә категориа иаҵанакуа рыбжьара актәи аҭыԥ ааникылеит Степан Тымченко (Ареспублика Адыгеиа), аҩбатәи - Иусуф Џьобиров (Адыгеиа), ахԥатәи аҭыԥқәа ааныркылеит - Аркади Топчиан (ақ. Шәача), и ара убас Илиас Усенов (ақ. Аҟәа).

Аҟәа. Рашәарамза 22, 2023 шықәса. Аԥсныпресс. Аԥсны Ахәаахәҭра-ааглыхратә Палата Апрезидент Ҭамила Мерцхулаа Жәларбжьаратәи ахәаахәҭратә палатеи Адунеизегьтәи апалатақәа Рфедерациеи Женеватәи ахәаахәҭреи ааглыхреи амаҵзурақәеи рпалатеи рыла еиҿкаау ахәаахәҭратә палатақәа XIII Адунеизегьтәи рконгресс лхы алалырхәуеит.  

Аконгресс Женева ақалақь (Швеицариа), жәларбжьаратәи ахәаахәҭра-цәыргақәҵатә центр «Palexpo» аҿы имҩаԥысуеит. 

Иахьа имариам агеополитикатә ҭагылазаашьа шыҟоугьы, Аԥсны Ахәаахәҭра-ааглыхратә Палата абар хәынтәуп Адунеизегьтәи аконгресс аҿы ҳреспубликеи аԥснытәи абизнес еилазаареи аинтересқәеи рӡыргара мҩаԥго ари аусмҩаԥгатә иалахәхоижьҭеи, - ҳәа адырра ҟаҵоуп Аԥсны Аҳәынҭқарра Ахәаахәҭра-Ааглыхратә Палата асаит аҿы.

«Ҳара ҳзы аконгресс – ари баша усмҩаԥгатәны иҟаӡам,  уи реалла иҟоу аԥсҭазааратә ԥышәа ала ишьаҭарку апартниортә еизыҟазаашьақәа рыҿиареи рышьақәгылареи абизнес ацхыраара аҭареи атәыла аҿы аусдкылара аҿиареи рзы иҿыцу адыррақәа раиура рзы зеиӷьаҟам платформаны иҟоуп. Ҳара ас еиԥш аҵак ду змоу аусмҩаԥгатә алахәхара ҷыдала ахшыҩзышьҭра аҳҭоит. Уи зыгәра угаратәы иҟоу абизнес-партниор иаҳасабала жәларбжьаратәи аилазаара аҿы ахаԥшьгара анаҩс, егьырҭ алахәылацәа зегьы ҳраҟараны наҟ-ааҟтәи аинтерес аарԥшразы алшара ҳанаҭоит.  Жәларбжьаратәи апартниорцәа адиалог амҩаԥгара азхиара аадырԥшуеит», – ҳәа илҳәеит Ҭамила Мерцхәлаа.