Аҟәа. Рашәарамза 27, 2023 шықәса. Аԥсныпресс. Рашәарамза 27 рзы Аԥснытәи аҳәынҭқарратә Университет аҿы амагистртә программа «Аҳәынҭқарратә напхгараҭара» ала  аужьҭымҭацәа рмагистртә диссертациақәа рыхьчара  мҩаԥысит, ҳәа адырра ҟанаҵоит ААУ аинформациеи амедиакоммуникациақәеи рыҟәша.

Аҳәынҭқарратә аттестациатә комиссиа напхгара аиҭоит Урыстәылатәи Афедерациа Анапхгара аҟны иҟоу Афинанстә Университет аекономикатә теориа  асекциа «Аекономикатә хәыцра аҭоурых» анапхгаҩы, Асовет Еидгыла ахыбгалара ашьҭахьтәи аамҭахәҭазы Урыстәыла аекономикатә ҵара азы раԥхьатәи арҵагашәҟәы  автор, аекономикатә наукақәа рдоктор, апрофессор Иаков Семион-иԥа Иадгаров.

Аҳәынҭқарратә аттестациатә комиссиа алахәылацәа: атәыла аԥыза-министр ихаҭыԥуаҩ, афинансқәа рминистр Владимир Делба; аԥыза-министр ихаҭыԥуаҩ, аекономика аминистр Кристина Озган; аекономикатә факультет адекан, аекономикатә наукақәа ркандидат, адоцент Ева Озган; аҳәынҭнапхгареи аменеџьменти ркафедра анапхгаҩы, аекономикатә наукақәа рдоктор, апрофессор Хәыта Гәымба; аекономикатә наукақәа ркандидат, аҳәынҭнапхгареи аменеџьменти ркафедра адоцент Анжела Барцыц.

Аҟәа. Рашәарамза 28, 2023 шықәса. Аԥсныпресс. Аҟәатәи аолимпиатә ӡҭарчы аҟны Жәларбжьаратәи анаркотикқәа рыдкылареи анаркотикатә маҭәашьарқәа изакәанымкәа реиҭарсреи  рҿагылара Амш иазкны аӡсра мҩаԥысуеит.

Аӡсра алагара аламҭалаз, уи алахәылацәа- еиуеиԥшым ақәратә категориақәа ирыҵанакуа ашколхәыҷқәа, азыҟаҵаҩцәа, аҭаацәа ирыдныҳәалеит атәыла аҿари аспорти русқәа рзы аҳәынҭқарратә Еилакы ахантәаҩы Тарас Ҳагбеи аҳәынҭқарратә Еилакы аҿар рыҟәша аиҳабы Идрис Кара-Осман-оглыи.

Аҟәа. Рашәарамза 28, 2023 шықәса. Аԥсныпресс. Рашәарамза  28 рзы Аԥсны аԥсылманцәа, адунеи зегьы аҿы аԥсылмантә динхаҵара ныҟәызго зегьы реиԥш иреиҳау аԥсылмантә ныҳәақәа ҩба иреиуоу – Кәырбан -баирам (Кәырбанныҳәа - ахатәы милаҭтә хьӡы) (Ид аль-Адха – араб бызшәала)  азгәарҭоит.  Уи иазгәарҭоит аныҳәа Ураза-баирам –аԥсылманцәа рзы иԥшьоу амыз Аурачра иадҳәалоу ачхара анхыркәшахалак ашьҭахь 70 мшы анҵлак.

Аԥсны Кәырбан-баирам (Кәырбанныҳәа-аԥсышәала иуҳәозар) аныҳәатә иусуратәым мшуп.

«Кәрбанныҳәа, мамзаргьы Ид аль-Адха — аԥсылманцәа рныҳәақәа ируакуп, аҳаџьныҟәара хнаркәшоит. Ари аҽны аҟәрҟан излаҳәо ала, ԥхыӡла, аԥаимбар Џьабраил, апророк Ибраҳим иҿы днеины, ԥсаҭатәыс Аллаҳ иҿаԥхьа иԥа дҟаиҵарц иеиҳәеит. Ибраҳим дазыразны, Мекка адәҳәыԥш аҟны дцаны, аҽазыҟаҵаратә усмҩаԥгатәқәа дрылагеит. Аллаҳ, абас ала дԥишәеит Ибраҳим, агәрагьы игеит иҿаҳәатәы шынаигӡоз ала. Аҵыхәтәантәи аминуҭқәа рзы, Аллаҳ, Ибраҳим иԥа Исмаил деиқәирхоит. Иԥа ихаҭыԥан ауаса ԥсаҭатәыс иҟаиҵоит.

Аҟәа. Рашәарамза 28, 2023 шықәса. Аԥсныпресс. Ареспубликатә Унитартә Наплакы «Амшынеиқәафымцамч» авариатә бригадақәа афымцаеиҵақәа «ИЭПиТи» «Баслати»  еимаздараны иҟоуп афымцацәаҳәа 10 кВ аргылара мҩаԥнагоит.   Уи Иашҭхәа ақыҭа ахь афымцамч анашьҭра алнаршоит, ҳәа адырра ҟанаҵоит АУН "Амшынеиқәафымцамч" апресс-маҵзура.

Аҟәа. Рашәарамза 28, 2023 шықәса. Аԥсныпресс. Гал араион Ахадара араион абиуџьет ахарџь ала атрактор-маҷқәа ҩба аанахәеит.

Гал араион агроном хада Лери Шьониа ажурналистцәа дрыҿцәажәо тракторк амчра  35 ҽамч амоуп, уи абҵарамза  2022 шықәсазы иаахәан, ахәԥса 900 нызықь мааҭ рҟынӡа инаӡоит ҳәа еиҭеиҳәеит.  Аҩбатәи атрактор 2023 шықәсазоуп ианаахәаз. Иара иамоу амчра 50 ҽымч ала еиҳауп, ахәԥсагьы – 1 млн 690 нызықь мааҭ рҟынӡа инаӡоит. Аиқәыршәагақәа зегьы  15-мыш рыла иааргараны иҟоуп.  

Аҟәа. Рашәарамза 28, 2023. Аԥсныпресс. Ареспубликатә акциа «Аԥсны аҿар анаркотикқәа ирҿагылоуп» аҳәаақәа ирҭагӡаны, ахаша, рашәарамза 28 рзы Жәларбжьаратәи анаркотикқәа рыдкылареи анаркотикатә маҭәашьарқәа изакәанымкәа реиҭарсреи  рҿагылара Амш иазкны атлетикалас азы аиԥхныҩлара мҩаԥысит. Аиԥхныҩлара иалахәыз амшын аԥшаҳәа иаваршәны Алашарбага аҳабла аҟынтәи атеатралтә плошьад аҟынӡа иҩуан.   Аиԥхныҩлара адистанциа -  2,5 км. рҟынӡа инаӡоит.

Аҿари аспорти русқәа рзы аҳәынҭқарратә Еилакы аиҳабы Идрис Кара-Осман-оглы акциа атәы еиҭеиҳәеит.

«Иахьа ҳара Жәларбжьаратәи анаркотикқәа рыдкылареи анаркотикатә маҭәашьарқәа изакәанымкәа реиҭарсреи  рҿагылара Амш иазкны акциа мҩаԥаҳгоит. Сынтәа ҳара уи рашәарамза 25 рзы имҩаԥаагарц акәын, аха, Урыстәылатәи Афедерациа аҟны иҟаз ахҭысқәа инарымаданы, уи рашәарамза  28  ахь ииаҳгар акәхеит. Иахьатәи акциа рхы аладырхәуеит еиуеиԥшым аспорттә хкқәа рыла зҽазыҟазҵо аспортсменцәа, атәыла анапхгара, араионтә комитетқәа рхыҭарнакцәа, ақалақьқәа Аҟәа, Гагра, Гәдоуҭа, Гал, Очамчыра, Гәылрыԥшь ауааԥсыра», –  ҳәа еиҭеиҳәеит иара.

Аҟәа. Рашәарамза 28, 2023 шықәса. Аԥсныпресс. Аҳәынҭқарра Ахада Аслан Бжьаниа Аԥсны аԥсылманцәа Кәырбанныҳәа рыдиныҳәалеит.

Адныҳәалараҿы, иҳәоуп:

"Акыр иаԥсоу ҳџьынџьуаа!

Аԥсны иқәынхо аԥсылманцәа гәык-ԥсык ала ишәыдысныҳәалоит Кәырбанныҳәа! Ари адунеи иқәынхо аԥсылманцәа зегьы агәреибагареи анцәахаҵареи ирдыргоу, иԥшьоу агәырӷьара зцу  ныҳәаны иазгәарҭо ныҳәоуп.

Аҟәа. Рашәарамза 28, 2023 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша Аԥсны иқәынхо аԥсылманцәа Кәырбанныҳәа рыдиныҳәалеит.

Аԥсны аԥсылманцәа Иаку рдоуҳатә Усбарҭа ахантәаҩы, амыфҭы Ҭемыр Ӡыба иахь иишьҭыз адныҳәалараҿы иҳәоуп: 

«Ҳаҭыр зқәу Ҭемыр Леонид-иԥа!

«Аԥсны Жәлар Реизара - Апарламент ахьӡала Аԥсны аԥсылманцәа Иаку рдоуҳатә усбарҭеи Аԥсны Аҳәынҭқарра иқәынхо аԥсылманцәа зегьи   ирыдысныҳәалоит аԥсылманра аҵасқәа, ауаҩра, аламыс еиқәырханы иаазго рзы аҵак ду змоу Кәырбанныҳәа.

Аҟәа. Рашәарамза 27, 2023 шықәса. Аԥсныпресс. Рашәарамза  27 рзы Москва иҟоу Аԥсны Ацҳаражәҳәарҭа аҿы ацҳаражәҳәаҩ Алхас Кәыҵниеи Аԥсны иҟоу Урыстәылатәи аҭоурыхтә еилазаара Ахаҭарнакра ахантәаҩы Милана Бжьаниеи Урыстәылатәи аҭоурыхтә еилазаара аҿар рыклуб акоординатор Иван Кулакови реиԥылара мҩаԥысит, ҳәа Ацҳаражәҳәарҭа аҟынтәи Аԥсныпрес ахь адырра ҟалеит.

Милана Бжьаниеи Иван Кулакови Урыстәылатәи аҭоурыхтә еилазаара Аҟәа ақалақь аҿы аусура апланқәеи аҿар рыклуб аҳәаақәа ирҭагӡаны аусеицура  аперспективақәеи ирылацәажәеит.

Аҟәа. Рашәарамза 27, 2023 шықәса. Аԥсныпресс.  Гал ақалақь апарк Хада акыр аамҭа ҵуеит аиҭашьақәыргылара аҭахны иҟоуижьҭеи.  Абар уажәы араҟа шьаҿа-шьаҿала аиқәыршәзааратә усурақәа рымҩаԥгара иалагеит.

Гал ақалақь ахада ихаҭыԥуаҩ Нарсоу Џьопуа ажурналистцәа дрыҿцәажәо, апарк Хада аҿы имҩаԥысуа аусура ахкқәеи урҭ рхыркәшара аҽҳәарақәеи ртәы иҳәеит.

«Нанҳәамза, 2022 шықәса рзы ақалақь ахада идҵаалеит аҭыԥантәи ауааԥсыра. Урҭ аҵыхәтәантәи 30–шықәса  ирылагӡаны изеиԥшразаалак зымҽхак дуу аусурақәа ахьымҩаԥгамыз апарк Хада аиҭашьақәыргылара азы аҳәара ҟарҵеит.   Ииашоуп, аамҭа-аамҭала араҟа арлашагатә фонарқәеи арымӡқәеи рыԥсахуан, аха уи азхоны иҟамызт, апарк аҿы зегьы реиҳа ихадоу – ашьаҟамҩатә хаҳәцәы ыҟамызт», - ҳәа иҳәеит иара.