Аҟәа. Ажьырныҳәамза 3, 2023 шықәса. Аԥсныпресс. 2023 шықәсазы Аԥсны амҩан 186 транспорттә машәыр ҟалеит, ҳәа аҩныҵҟатәи аусқәа Рминистрра аҟны имҩаԥысыз аилатәара аҿы адырра ҟаиҵеит Аҳәынҭавтоинспекциа Аусбарҭа аиҳабы Валентин Ҭраԥшь.
«Аҳасабырбатә 2023 шықәсазы Ареспублика Аԥсны иахьаҵанакуа иҟалеит 186 амҩа-транспорттә машәыртә хҭыс, урҭ ирыхҟьаны иҭахеит 57 - ҩык, еиуеиԥшым ахәрақәа роуит 264-ҩык. 2022 шықәса аиԥш-зеиԥшу аамҭахәҭа азы ашәҟәы иҭагалан 214 амҩа-танспорттә машәыртә хҭысқәа, урҭ рҿы иҭахеит 64-ҩык, ахәрақәа роуит - 296-ҩык», – ҳәа иҳәеит Валентин Ҭраԥшь.
«2022-тәи ашықәс иаҿырԥшны 2023-тәи ашықәс азы амҩатә машәырқәа 28 рыла имаҷын, иҭахазгьы 7-ҩык рыла еиҵан, ахәрақәа зауз - 23-ҩык рыла.
Иҳаҩсыз ашықәс азы зегьы реиҳа амҩатә машәыр ахьыҟалаз Гәдоуҭа араион аҿы ауп - 53 авариа, урҭ рҿы иҭахеит 25-ҩык, 56-ҩык еиуеиԥшым ахәрақәа роуит», ҳәа иазгәеиҭеит Аҳәынҭавтоинспекциа Аусбарҭа аиҳабы Валентин Ҭраԥшь.
Аилатәараҿы амҩан иҟалаз амашәырқәа реиҳарак зыхҟьаз ҳәа аӡбахә ҳәан амашьына аццакреи, амҩеихдақәеи шьапыла амҩеихдақәеи рыҟны аԥҟарақәа реилагара.
Аԥсны Аҩныҵҟатәи аусқәа рминистр Роберт Киут адҵа риҭеит амҩан амашәырқәа раԥырҟәҟәаразы русура дырӷәӷәарц, иазгәеиҭеит есышықәса ареспубликаҿы амашьынақәа рхыԥхьаӡара ишазҳауа. Иҳәеит аԥыжәара шаҭатәу, ижәны, анаркотикатә маҭәашьарқәа здкыланы амашьына аԥсҟы зкуа рахьырхәра.
Амҩан амашәырқәа раԥырҟәҟәаразы атәыла Аҩныҵҟатәи аусқәа Рминистрра иаарласны ареспубликатә мҩаду хадаҟны афотои авидеои ҭызхуа 17 камера шьақәнаргыларан иҟоуп. 2025 шықәсазы урҭ рхыԥхьаӡара 50 цыра рҟынӡа еизҳауеит.
