Аштат ахамырҭәаара азҵаара дазааҭгыло, амилициа аинрал-маиор Роберт Киут  апрофильтә ҵараиурҭақәа рҿы аҵара зҵо акадр ҿыцқәа рыла аҩныҵҟатәи аусқәа Русбарҭа ахарҭәаараҿы иара иганахьала хымԥада ацхыраара шыҟало азгәеиҭеит.

Иааизакны атәыла аҩныҵҟатәи аусқәа рминистр инапаҵаҟа иҟоу аусбарҭақәа русзуҩцәа русушьа ахәшьара бзиа аиҭеит, иара ахатәы еилазаара атәылауаа рыҿцәажәараан аамсҭашәареи аауаҩыԥсшәареи аадырԥшларц, иара убас рганахьала иҟало ааԥхьарақәа зегьы иаразнак азхьаԥшра арҭаларц рзы абжьгара ҟаиҵеит.

«Иазгәасҭарц сҭахуп, аусзуҩцәа доусы рлагала ауп ҳара иахьа ауааԥсыра ршәарҭадара аиқәыршәара, Ашықәс Ҿыц аныҳәеи Қьырса ныҳәеи ишахәҭоу ала иаԥылартә еиԥш аҭагылазаашьақәа рзаԥҵара  ҳалзыршо. Шәара ишәыду аҵакыра – зегьы реиҳа иуадаҩу акакәны иҟоуп, 60 нызықьҩык инареиҳаны ауааԥсыра нхоит ари аҵакыра аҿы. Аныҳәатә мшқәа рзы змаҵуратә уалԥшьа назыгӡо зегьы иҭабуп ҳәа шасҳәарц сҭахуп ламысла инашәыгӡо шәусура азы. Ари даара аҭакԥхықәра дууп – аныҳәатә мшқәа раан ауааԥсыра рҭынчреи ршәарҭадареи ахылаԥшра аҭара, аиҳарак зегьы рзы иреиҳау ныҳәаны иҟоу ашықәсҿыцтәи ауха азы» - ҳәа иҳәеит Роберт Киут.