Аҟәа. Ажьырныҳәамза 2, 2024 шықәса. Аԥсныпресс. Аҳәынҭқарра Ахада Иусбарҭа икоммерциатәым аиҿкаарақәа рактивистцәа ирымоу Урыстәылатәи Афедерациа атәылауаҩра рымхразы асиақәа рышьҭра ҟалазшәа асоциалтә ҳақәа рыла аларҵәара зауз аинфомациа инамаданы аҳәамҭа ҟанаҵеит.
«Аоппозициатә интернет ресурсқәак рҿы лассы-лассы ицәырҵуа иалагеит атәылаҿы аҭагылазаашьа аибарххара иазырхоу имцырку аинформациа. Ҳаҭыр зқәу атәылауаа, Ареспублика Аԥсны анапхгара еснагьгьы атәылауаа рзинқәа рыхьчареи икоммерциатәым аиҿкаарақәа рыҿиареи рхақәиҭреи алыршара азԥхьагәазҭо Аконституциа иарбоу азакәанԥҵаратә нормақәа рықәныҟәареи иадгылон», – ҳәа иазгәаҭоуп аҳәамҭа аҿы.
Аҳәынҭқарра Ахада Иусбарҭа атәылауаа зегьы рахь агәҽанызаара аадырԥшларц, ироуа аинформациа ала алкаақәа рыҟаҵареи, иара убри ала ииашам адыррақәа ауаажәларра рыларҵәареи рахь ииасаанӡа уи цқьа игәарҭаларц.
«Даара акыр аҵанакуеит аетикатә нормақәа рықәныҟәареи егьырҭ ауаа ррепутациеи рзинқәеи ҳаҭырқәҵарала рызныҟәара». – ҳәа иаҳәоит ааԥхьара аҿы.
Аҳәынҭқарра Ахада Иусбарҭа ауааԥсыра рахь аҳәара ҟанаҵоит апровакациа рҽаларымгаларц.
«Ареспублика Аԥсны анапхгареи анапхгараҭаратә усбарҭақәеи егьырҭ атәылақәа ртәылауаҩра амхра азҵаарақәа рыӡбаразы азинмчы рымаӡам. Убас ала, хыхь ҳазлацәажәоз аинфомациа аиаша ишацәыхароу умбар залшом. Уи анегативтә ҟазшьа амоуп, адестабилизациатә хықәкқәа рынагӡара ауп изышьҭоу», – ҳәа иаҳәоит аҳәамҭа атекст аҟны.
Ареспублика Аԥсны Ахада Иусбарҭа ауаажәларра ракзаареи ҳәоуеиқәшәарала рыҟазаареи иадгылоит, атәылауаа зегьы рахь Аԥсны Аконституциеи Азакәанқәеи ишарбо еиԥш аҭынчреи аизҳазыӷьареи аусеицуреи анхареи аҿиареи рымҩа алырхырц азы ааԥхьара ҟанаҵоит.
