Аҟәа. Ԥхынҷкәынмза 12, 2022 шықәса. Аԥсныпресс. Иахьа Аԥсны Жәлар Реизара-Апарламент аҟны имҩаԥысит Аекономикатә политикеи, ареформақәеи, аинформациатә технологиқәеи рзы аилак изаамҭанытәиу аусуратә еилатәара. Уи мҩаԥигеит Аилак ахантәаҩы Резо Занҭариа.

Аилак аҟны имҩаԥысит «Афымцамч азы атарифқәа рышьҭыхра аанкыларазы» азакәан апроект алацәажәара.

Ари азакәан апроект аԥшьгаҩцәа адепутатцәа ирыдыргалоит Аԥсны Аҳәынҭқарраҟны ахархәаҩцәа ркатеогриақәа зегьы рзы 2011 шықәса хәажәкырамза 10 аҟн. «Ахәқәа рҳәынҭқарратә ҳәаақәҵаразы» Аԥсны Аҳәынҭқарра Азакәан инақәыршәаны Афымцамч азы атарифқәа рышьҭыхра аанкылара.

Иара убас ирыдыргалоит ахәԥса зшәо рзы афымцамч азы атариф афымцамч ахархәара зырҭо акатегориақәа зеиԥшразаалак, 2022 шықәса ԥхынҷкәынмза 1 азы Аԥсны Аҳәынҭқарра иахьаҵанакуа ахәԥса зшәо акатегориазы аус зуа атариф еиҳаны ҟалашьа амаӡам ҳәа ашьақәыргылара.

Аҟәа. Ԥхынҷкәынмза 13, 2022 шықәса. Аԥсныпресс. Аҳәынҭқарра Ахада Аслан Бжьаниа Аиҳабыреи Ахада Иусбарҭа анапхгареи алархәны аусуратә еилацәажәара мҩаԥигеит

Аилацәажәараан иахәаԥшын асоциалтә-економикатә ҿиареи аинвестпрограмма анагӡареи ирыдҳәалоу азҵаарақәа. Аилацәажәара алахәцәа адырра ҟарҵеит аҳәынҭқарра Ахада изыӡбақәеи инапынҵақәеи аҭыԥаҟны рынагӡара шымҩаԥысуа азы. Иара убас иалацәажәеит ДЖӘР-еи ЛЖӘР-еи рхәыҷқәа рзы агуманитартә цхыраара аиҿкаареи ашьҭреи ирызкыз азҵаара.

Аҟәа. Ԥхынҷкәынмза 12, 2022 шықәса. Аԥсныпресс. Аԥсны Жәлар Реизара-Апарламент аҿы Алхас Барцыц ихантәаҩрала имҩаԥысит жәларбжьаратәи, апарламентбжьаратәи аимадарақәеи аџьынџьуаа рымадареи  рзы апарламенттә Еилакы аилатәара. Уи ихы алаирхәит атәыла адәныҟатәи аусқәа рминистр ихаҭыԥуаҩ Одиссеи Бигәаа.

Аилак аилатәара аҿы ирылацәажәеит адипломатиатә маҵзура азы азакәан апроект аиқәыршәара азы Аԥсны адәныҟатәи аусқәа Рминистрра ажәалагалақәа.

Аҟәа. Ԥхынҷкәынмза 12, 2022 шықәса. Аԥсныпресс.  Аԥсны Жәлар Реизара-Апарламент Аиҳабы Урыстәылатәи Афедерациа Афедералтә Еизара апалатақәа рнапхгаҩцәа Урыстәылатәи Афедерациа Аконституциа амш рыдиныҳәалеит.

Афедерациа Ахеилак Ахантәаҩы Валентина Матвиенко лыхьӡала ишьҭу адныҳәалараҟны иҳәоуп: «Урыстәылатәи Афедерациа Аконституциа Урыстәылатәи аҳәынҭқарра аҿиара ахырхарҭа хадақәа ҳәаақәнаҵоит, аамҭа ицәырнаго ашәарҭара дуқәа инарықәыршәаны зыда ԥсыхәа ыҟам азыӡбақәа рыдкылара иацхраауеит, аурыстәылаа рзы итрадициатәу адоуҳатә-леишәатә ҵасқәа реиқәырхара иацхраауеит.

Ҳара агәра ҳгоит аԥсны-урыстәылатәи апарламентбжьаратә усеицура аԥхьаҟгьы арӷәӷәара Аԥсны Урыстәылеи рыжәларқәа ринтересқәа инарықәыршәаны ҳҳәынҭқаррақәа реизыҟазаашьақәа реизырҳара ишацхраало. 

Аҳәынҭқарратә Дума Ахантәаҩы Виачеслав Володин изырханы Лаша Ашәба иҳәеит: «Урыстәылатәи Афедерациа Аконституциа  уи азинтә система уасхырс иамоуп, УА аҿаԥхьа иқәгылоу ауснагӡатәқәа рыӡбара шьаҭас иамоуп.

Аҟәа. Ԥхынҷкәынмза 11, 2022 шықәса. Аԥсныпресс.  Аԥсны Жәлар Реизара – Апарламент Аиҳабы Лаша Ашәба Аԥсны Аҳәынҭқарра Ауаажәларратә Палата ауаажәларратә диалоги аҭыԥантәи ахаланапхгареи рзы Акомиссиа ахантәаҩы Сократ Раҷ-иԥа Џьынџьал ииубилеитә рыцхә идиныҳәалеит.

«Ҳаҭыр зқәу Сократ Раҷ-иԥа!

Аԥсны Жәлар Реизара – Апарламент ахьӡала ишәыдысныҳәалоит 85-шықәса шәхыҵра амш!

Иахьа Шәара Аԥсны Аҳәынҭқарраҟны хьӡи-ԥшеи змоу иналукааша аполитикцәа шәыруӡәкуп. 

Шәеицырдыруеит ҳреспулика аҩныҵҟа еиԥш, уи анҭыҵгьы. Шәара Аԥсны Жәлар Реизара – Апарламент ааԥхьарақәа ҩба рыҟны депутатс шәыҟан, уи напхгарагьы ашәҭон 1994 шықәса инаркны 2002 шықәсанӡа. Ҳәарада, Апарламенти Аиҳабыреи рыҟны шәусура акыр иуадаҩыз аамҭақәа рзы имҩаԥысуан -  1992–1993 шш. Аԥсны Аџьынџьтәылатә еибашьреи имариамыз аибашьрашьҭахьтәи ашықәсқәеи ирықәшәеит.

Аполитикаҟны Шәара шәцәырҵит ишәыз, аԥышәа змаз анапхгаҩы иаҳасабала. Ишәывагыланы аус шәыцызуаз шәҩызцәеи Шәареи иахьатәи аԥсуа ҳәынҭқарра аԥҵараҟны шәылшамҭақәа рацәоуп.

Иҟәыӷоу, аиаша иадгылоу, ахара инаԥшуа аполитик, ахҭысқәа рыҿиашьа азԥхьагәаҭара, еиуеиԥшым апроблемақәа дипломатиатә мҩала рыӡбара зылшо – абас ишәыхцәажәоит шәыздыруа зегьы, шәколлегацәа, шәнапы злакыз аус иацызҵо иахьатәи ауаажәларратәи аҳәынҭқарратәи усзуҩцәа.

Шәара есқьынгьы ҳтәылауаа ргәы иҵхо, еиҳа иҵарны иқәгылоу азҵаарақәа рзы аиҿцәажәара шәазхиоуп. Шәара шәпатриотизм, шәыуаҩра, обиективла азҵаара азнеира реиԥш иҟоу шәҟазшьа аҷыдарақәа Аԥсны Аҳәынҭқарра Ауаажәларратә палата анаԥҵаз аахыс шәызлоу аиҿкаараҟны аҵак ду амоуп. 

Аҟәа. Ԥхынҷкәынмза 11, 2022 шықәса. Аԥсныпресс. Адунеизегьтәи аԥсуа-база жәлар Рконгресс Иреиҳаӡоу Ахеилак ахантәаҩы Мусса Еқьзеқь иҟынтәи аҳамҭақәа раиура азы зхы иақәитәу аиқәԥара азы аиубилетә X Жәларбжьаратәи атурнир Афон Ҿыц ақалақь аҿы имҩаԥысит.  

Аицлабрақәа аспорттә клуб «Абаза»  10-шықәса ахыҵра инамаданы, Адунеизегьтәи аԥсуа-база жәлар Рконгресс 30- шықәса ахыҵреи Адунеизегьтәи аԥсуа-база жәлар Рконгресс VIII Аизара Ду амҩаԥгареи рҳәаақәа ирҭагӡаны имҩаԥган.  

Аицлабрақәа рхы аладырхәит 130-ҩык инарзынаԥшуа ақәратә категориақәа хԥа ирыҵанакуа рыбжьара зхы иақәиҭу аиқәԥара аспортсменцәа. Ақәратә категориақәа зегьы рыҩныҵҟа акапантә категориақәа рылагьы еиҭашан.  

Аҟәа. Ԥхыҷкәынза 11, 2022 шықәса. Аԥсныпресс.  Аҟәа ақалақь, Сергеи Багаԥшь ихьӡ зху аспорт Ахан аҿы иаатит «Аҟәа ақалақь Ахраҿа» агаразы 2004-2006 шш. рзы ииз арԥарцәа рыбжьара традициала имҩаԥысуаз анапылампыл азы атурнир хыркәшахеит.

Уи рхы аладырхәит 7 командак: Гагра, Пицунда, Аҷандара, Очмчыра, Гәылрыԥшь, Ареспубликатә хәыҷтәы-қәыԥштә спорттә школ, иара убас Аҟәа ақалақь, уҳәа рҟынтәи  акомандақәа. Аҟәа ақалақь акоманда аилазаараҿы иҟоуп аҳҭнықалақь Ахадара аҿари аспорти рзы Аусбарҭа анапылампыл асекциа аспортсменцәа. Атурнир ԥхынҷкәынмза 9 рзы  иалагеит.

Иахьа афиналтә хәмаррақәа мҩаԥысит, урҭ реихшьаалақәа рыла, актәи аҭыԥ ааннакылеит акоманда  «Сухум Спартак».

Аҟәа. Ԥхынҷкәынмза 11, 2022 шықәса. Аԥсныпресс. Аԥыза-министр Алеқсандр Анқәаб аинформациатә Маҵзура РИА Новости аинтервиу аҭо, Аԥсны аенергетикатә сектор аинвестициақәа ралагалара азҵаара аганахьала азакәанԥҵара аиӷьтәра аус адулара мҩаԥысуеит ҳәа иазгәеиҭеит.. 

«Асовет Еидгыла аныҟаз аамҭазы Аԥсны аенергетика иалагалахон аҳәынҭқарратә биуџьеттә ԥаратә хархәагақәа, аха иахьа урҭ азхо иҟам асистема зегьы ишахәҭоу ала аус ауо иҟаларц азы. Араҟа ҳара урыстәылатәи аинвестициақәа рыда ҳхәарҭам. Аха урыстәылатәи аинвестор даарц азы уи еиликаауазар  ахәҭоуп аенергетика аусхкы аҿы азинтә еизыҟазаашьақәа рҭышәынтәалара иазку азакәанԥҵара», - ҳәа иҳәеит Алеқсандр Анқәаб.

Аҟәа. Ԥхынҷкәынмза 11, 2022 шықәса. Аԥсныпресс. Аҟәатәи ахәыҷтәы-қәыԥштә спорттә школ №1 аҿы Краснодартәи атәылаҿацә асахьаркыратә гимнастика Афедерациа ацхыраарала, ажьырныҳәамза 10, 2023 шықәса рзы  5-7 шықәса зхыҵуа ахәыҷқәа асахьаркыратә гимнастика азы агәыԥ ахь рыдкыларазы ралԥшаара мҩаԥысуеит.

Абри атәы аанацҳауеит Аҟәа ақалақь Ахадара аҵара аҟәша Аусбарҭа.  Еиҳа инарҭбаау аинформациа аиуразы адҵаалара алшоит абри аҭел ала: +7 940 776-70-65.

Аҟәа. Ԥхынҷкәынмза 11, 2022 шықәса. Аԥсныпресс. Апсны Аҳәынҭқарра Ахада Аслан Бжьаниа аҳәынҭқарратәи аполитикатәи усзуҩы Сократ Џьынџьал «Ахьӡ-Аԥша» аорден I аҩаӡара ианеишьеит.

«Аԥсны амилаҭ-хақәиҭратә қәԥареи Аԥсуа ҳәынҭқарра ашьақәгылареи рыҟны акрызҵазкуа илагаламҭазы Џьынџьал Сократ Раҷ-иԥа «Ахьӡ-Аԥша» аорден I аҩаӡара ианашьазааит», -ҳәа иаҳәоит Аҳәынҭқарра Ахада Аслан Бжьаниа иҭижьыз Аусԥҟа аҟны.