Аҟәа. Рашәарамза 21, 2023 шықәса. Аԥсныпресс.  Иахьа аԥсуа-қырҭуа еиҿагылара азона аҿы аҭынчра ашьақәыргылара азы Ихьыԥшым Аҳәынҭқаррақәа Реиҩызара  Аколлективтә мчрақәа Аԥсныҟа ралагалара ҟалеижьҭеит  29 -шықәса ҵуеит.

Аҳәынҭқарра Ахада Ихаҭыԥуаҩ Бадра Гәынба, ашәарҭадара Ахеилак Амаӡаныҟәгаҩ Сергеи Шамба, Аԥсны иҟоу Урыстәыла Ацҳаражәҳәарҭеи Аԥсны иҟоу Урыстәыла аус ацура Ахаҭанакреи русзуҩцәа,  атәылахьчара Аминистрра, Аԥсны иҟоу урыстәылатәи аидгьылуаа реиҿкаарақәа Акоординациатә Хеилак ахаҭарнакцәа, Аԥснытәи Аиашахаҵаратә Уахәама ахада Виссарион Аԥлиаа  1994 - 2008 шш. рзы Аԥсны абжьаҟазаратә миссиа назыгӡоз Урыстәылатәи Афедерациа Арбџьармчқәа аруаа рбаҟа амҵан ашәҭ  шьыҵәрақәа шьҭарҵеит.

Абжьаҟазаратә (аҭынчраԥҵаратә) архәҭақәа рыруаа рбаҟа аадыртит аҟәатәи аԥшаҳәа аҟны арегионбжьаратә уаажәларратә еиҿкаара «Иҭыԥырку аибашьрақәеи бџьаршьҭыхлатәи аиҿагыларақәеи рветеранцәа Рхеилак «Аҭынчраԥҵаҩы»» аԥшьгарала ԥхынҷкәынмза 8, 2017 шықәсазы.  Абаҟа автор – аскульптор, Урыстәыла жәлар рсахьаҭыхҩы Владимир Суровцев.

Аҟәа. Рашәарамза 21, 2023 шықәса. Аԥсныпресс. Аминистрцәа Реилазаара аҿы «Изакәанымкәа ирҳаз ахашәалахәқәа  азакәантә ԥшра рыҭаны ралгареи атерроризм афинансыркреи  раԥырҟәҟәаара азы» азакәанԥҵареи «Авалиутатә хылаԥшреи авалиутатә усеиҿкаареи рзы» азакәанԥҵареи аус рыдуларазы иаԥҵоу аусуратә гәыԥ аилатәара мҩаԥысит.

Аусуратә гәыԥ напхгара аиҭоит аминистрцәа Реилазаара Аппарат анапхгаҩы  Давид Сангәылиа.

Аҟәа. Рашәарамза 21, 2023 шықәса. Аԥсныпресс. Гагра араион Ахадара 840 метра инарзынаԥшуа амшаҳәеи ашьаҟамҩатә цаҳәақәеи реиҭашьақәыргылара иазку аусурақәа мҩаԥнагеит. Ажурналистцәа дрыҿцәажәо абри азы адырра ҟаиҵеит Гагра араион ахада ихаҭыԥуаҩ Адамыр  Ҵышба.

«Араион Ахадара амчқәа рыла 840 метра инарзынаԥшуа аԥшаҳәеи ашьаҟамҩатә цаҳәақәеи еиҭашьақәдыргылеит. Ашьаҟамҩақәа ҿыцны хаҳәцәыла ичаԥан, аҵаргәатә ҭӡы рӷәӷәан. Хара имгакәа арлашагатә фонарқәа аҿыцқәа рыла иԥсаххоит», - ҳәа еиҭеиҳәеит Адамыр Ҵышба.

Иара убас, араион Ахадара Гагра ақалақь иахьаҵанакуа ашьапыламҩақәа реиҭашьақәыргылара мҩаԥысуеит. 2400 метра рҟынӡа инаӡо Гагрыԥшь  аӡиас аҟынтәи  Жоикәара аӡиас аҟынӡа инагоу ашьаҟамҩа ҿыц хаҳәцәыла ичаԥоуп.  

«Иԥсаххеит 4 нызықь квадраттә метра рҟынӡа ахаҳәцәы ԥсахын, иҿыцу ацәхыԥқәа шьақәыргылан», - ҳәа иҳәеит Адамыр Ҵышба.  

Аԥшаҳәа ацәаҳәа аиҭашьақәыргылареи ахаҳәцәы аԥсахреи ирықәхарџьхеит 70 млн. мааҭ инарзынаԥшуа. Аԥаратә хархәагақәа зегьы араион абиуџьет аҟынтәи иазоужьхеит.  

Аҟәа. Рашәарамза 20, 2023 шықәса. Аԥсныпресс. Милана Бжьаниа Урыстәылатәи аҭоурыхтә еилазаара  раԥхьатәи аҳәаанырцәтәи Ахаҭарнакра ахантәаҩыс дшьақәырӷәӷәахеит.

Рашәарамза 20 рзы Москва ақалақь, Урыстәылатәи анаукақәа ракадемиа иатәу ауаажәларратә наукақәа рзы анаукатә информациа Аинститут аҿы Урыстәылатәи аҭоурыхтә еилазаара азеиԥш еизара мҩаԥысит.  

Урыстәылатәи аҭоурыхтә еилазаара ахантәаҩы Сергеи Нарышкин Азеиԥш еизара амшхәаԥштә ахь ицәыригеит арегионалтә ҟәшақәеи ахаҭарнакрақәеи раԥҵара азҵаара.    

Аҟәа. Рашәарамза 20, 2023 шықәса. Аԥсныпресс. Аҟәа ақалақь апрокуратура рашәарамза 19, 2023 шықәсазы атәыла аҩныҵҟатәи аусқәа Рминистрра аусеилыргаанӡатәи аамҭалатәи аԥхьакырҭа  акамера №12 аҿы иҭакыз Руслан Радион-иԥа Агрба иԥсҭазаара алҵра инамаданы агәаҭара мҩаԥнагоит, - ҳәа адырра ҟанаҵоит Аԥсны апрокуратура Хада.

Ахҭыс ахьыҟалаз аҭыԥ ахь инеиз аоператив-усеилыргаратә гәыԥ, атәыла аҩныҵҟатәи аусқәа Рминистрра аусеилыргаанӡатәи аамҭалатәи аԥхьакырҭа  акамера №12 аҿы ирбеит зыԥсҭазаара иалҵхьаз Агрба Р.Р. аҽшьра аҟазшьа зныԥшуаз иԥсыбаҩ.  

Уи аԥхьа, рашәарамза 16, 2023 шықәсазы Агрба Р.Р. Аԥсны Атәылауаҩратә Закәанеидыла ахәҭаҷ 224 ахәҭа апункт «в» иазԥхьагәанаҭо ацәгьоура (анаркотикатә маҭәашьарқәа, арҩышьыгатә маҭәахәқәа, мамзаргьы урҭ раналагқәа изакәанымкәа раарыхра, рҭыжьра, аус рыдулара, рыҵәахра, рыиагара, анаҩстәи аҭиразы реиҭарсра) аҿы дыгәҩароуп ҳәа даанкыланы атәыла аҩныҵҟатәи аусқәа Рминистрра аусеилыргаанӡатәи аамҭалатәи аԥхьакырҭа ахь днаган.  

Аҟәа. Рашәарамза 20, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа усуратә визитла Москваҟа дцеит .

Аҳәынҭқарра Ахада Урыстәылатәи Афедерациа Ахада Иусбарҭеи атәыла Анапхгареи рҿы  аиԥыларақәа мҩаԥигараны дыҟоуп, - ҳәа иаанацҳауеит Аҳәынҭқарра Ахада ипресс-маҵзура.

Аҟәа. Рашәарамза 20, 2023 шықәса. Аԥсныпресс.    Имҩаԥгаз апрофилактикатә реидтә усмҩаԥгатәқәа ирылҵшәаны, иҳаҩсыз амчыбжь азы иаарԥшхеит  1695 инарзынаԥшуа амҩаҿы аныҟәара аԥҟарақәа реилагара, ҳәа иаанацҳауеит атәыла аҩныҵҟатәи аусқәа Рминистрра апресс-маҵзура.  

Урҭ рахьынтә: 61-ҩык амашьынарныҟәцаҩцәа автосаркьақәа рыԥшшәахәыркра анормақәа реилагара азы;

Аҟәа. Рашәарамза 20, 2023 шықәса. Аԥсныпресс. Рашәарамза 22 -24 рзы Аҟәа ақалақь, Ареспубликатә ахәыҷтәы-қәыԥштә спорттә школ аҿы имҩаԥыслоит 1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш  30- шықәса ахыҵра азгәаҭара иазку аӡиудо азы иаарту XV Жәларбжьаратәи аицлабрақәа «Аиааира Ахраҿа».

Аицлабрақәа ирылахәхоит 2007-2009, 2010-2011, 2012-2013, 2014-2015 шықәсқәа рзы ииз арԥарцәеи аҭыԥҳацәеи.  

***  *** 

Рашәарамза 23 рзы Ареспубликатә стадион аҿы имҩаԥысуеит иаарту Ареспубликатә турнир «Аолимпиатә аҩра амш».

Аицлабрақәа мҩаԥгахоит 2006, 2008-2009, 2010-2011, 2012-2013 шш. рзы ииз ареспублика ақалақьқәеи араионқәеи рҟынтәи арԥарцәеи аҭыԥҳацәеи рыбжьара. Урҭ рылшарақәа аадырԥшуеит 100, 300, 500 , 600 метра рҟынӡа инаӡо адистанциақәа рҿы.

Аҟәа. Рашәарамза 20, 2023 шықәса. Аԥсныпресс. Аграртә политикеи аԥсабаратә ресурсқәеи аекологиеи рзы Апарламенттә Еилакы инарҭбаау аусуратә еилатәара   мҩаԥысит ашәахьа, рашәарамза 19 рзы. Уи мҩаԥигон Аилак ахантәаҩы Ҭемыр Беииа.

Аилатәара аҿы жәабранмза 8, 2023 шықәсазы аминистрцәа Реилазаара аҿы ирыдаркылаз «Хәажәкырамза 27, 2019 шықәсазы аминистрцәа Реилазаара аҿы «Аԥсны Аҳәынҭқарра амилаҭтә парк «Кәыдрытәи аҩхаа» аԥҵара азы» Ақәҵара аиҭакрақәа ралагалара азы» Ақәҵара иалацәажәеит.  

Ақәҵара амилаҭтә парк «Кәыдрытәи аҩхаа» аҳәаақәа рыԥсахра азԥхьагәанаҭоит, даҽакала иуҳәозар – ари апарк аҵакыраҿы акыраамҭа нахыс инхо ауааԥсыреи зыхә дуу амҿымаҭәахә злыҵуа  аҵлақәа рыҟазаара инамаданы, апарк аҵакыра  16 нызықь гектар рыла аиҵатәра.

Аҟәа. Рашәарамза 20, 2023 шықәса. Аԥсныпресс. Аҳәынҭқарра Ахада Ихаҭыԥуаҩ Бадра Гәынба  Ҟабарда-Балкариа жәлар рартист Черим  Нахушев  диԥылеит, ҳәа адырра ҟанаҵоит Аҳәынҭқарра Ахада ипресс-маҵзура.

Бадра Гәынба артист агәыҳалалратә концерт амҩаԥгаразы Аԥсныҟа дахьааз азы иҭабуп ҳәа еиҳәеит.  

«Ҳара аиашьаратә Нхыҵ Кавказтәи ареспубликақәа рҟынтәи акультуратә программақәеи аусмҩаԥгатәқәеи рымҩаԥгаразы иаауа асасцәа рԥылара даара ҳаигәырӷьоит. Ҳара ҳазҭоу ашықәс иубилеитәуп – Аԥсны жәлар Рџьынџьтәылатәи еибашьра  аҿы Аиааира агара 30-шықәса ахыҵра азгәаҳҭоит. Ҳара иаҳгәалашәоит, иаҳхашҭрангьы ҳаҟаӡам Ҟабарда-Балкариантәи ҳашьцәа зхыԥхьаӡараҿы иҟаз Нхыҵ Кавказынтәи хатәгәаԥхарала иҳацеибашьуаз. Урҭ ҳажәлар ирырҭоз адгылареи агәазҭазаареи ахә ашьара уадаҩуп.  Ҳара Аԥсны ахақәиҭреи ахьыԥшымреи зхы ақәызҵаз ҳашьцәа ргәалашәара ҳаҭыр ду ҳзақәуп, иҳалшо ала иҭахаз рҭаацәеи аветеранцәеи адгылара раҳҭоит», - ҳәа иҳәеит Бадра Гәынба.