Аҟәа. Жьҭаарамза 9, 2023 шықәса. Аԥсныпресс. Еицырдыруа асахьаркыатә фильм «Миллионк аӷьычразы иҟаҵатәузеи» афырхацәа аԥсышәала ицәажәараны иҟоуп.
«Ҳара ҩ-сериак змоу аԥштәы змоу асахьаркыратә фильм «Миллионк аӷьычразы иҟаҵатәузеи» адублиаж аҟаҵара хҳаркәшеит. Афильм аҿы арольқәа рыбжьы ахырҵеит С. Ҷанба ихьӡ зху Аԥсуа драматә театр актиорцәеи Аҿартә театр актиорцәеи – Роман Сабуа, Адгәыр Џьениа, Фрида Леиба, Гарик Аџьынџьал, уҳәа егьырҭгьы», – ҳәа Аԥсныпресс акорреспондент диҿцәажо иҳәеит акинорежиссиор Виачеслав Аблоҭиа.
Уажәы асериарацәазмоу амультипликациатә фильм «Лео и Тиг» адублиаж иадҳәалоу аусура мҩаԥысуеит. Уи рхы аладырхәуеит 14-ҩык актиорцәа. Аԥсышәала атекст еиҭеигоит Виачеслав Аблоҭиа, аматериал аредакциа ҟалҵоит Гәында Кәыҵниа.
«Миллионк аӷьычразы иҟаҵатәузеи» - арежиссиор Уилиам Уаилер икомедиатә фильм ауп. Ароль хадақәа нарыгӡоит – Одри Хепберни Питер О'Тули. Афильм ҭыхын 1966 шықәсазы акинокомпаниа World Wide Productions (ЕАА) аҿы.
«Лео и Тиг» — урыстәылатәи анимациатә ахәыҷтәы сериал ауп. Уи аԥҵан анимациатә студиа «Паровоз» аҿы.
Асиужет ашьаҭаҿы иҟоуп—мрагыларанаскьатәи аԥстәқәа аиҩызцәа Леои Тигеи зыниаз-изынԥаз атәы зҳәо ажәабжь. Ҩаԥхьа аныҟәарахьы рҽеиқәыршәо, афырхацәа еиуеиԥшым аԥсабаратә цәырҵрақәа ирыниоит, мрагыларанаскьатәи атәылаҿацә амаӡақәа аадыртуеит, иара убас ауадаҩрақәа ирықәшәаз ацхыраара рырҭоит. Аха дара рхала иаанхаӡом: урҭ ирыцхраауеит аԥшӡа Мила, алыџ Иара абнаҳәа Куба.
