Аҟәа. Рашәарамза 20, 2023 шықәса. Аԥсныпресс.  Аҳәынҭқарра  Ахада Аслан Бжьаниа акультура аусзуҩцәа аҳаҭыртә хьӡқәа ранашьаразы Аусԥҟақәа инапы рыҵаиҩит, ҳәа адырра ҟанаҵоит Аԥсны Аҳәынҭқарра Ахада ипресс-маҵзура.

Аҳыҭартә хьӡқәа ранашьоуп:

Ешба Кристина Руста-иԥҳа – Р. Д. Гәымба ихьӡ зху Аԥснытәи аҳәынҭқарратә филармониа асолистка, Аԥсны амузыкатә ҟазара аҿиараҿы ллагалеи иҳараку анагӡаратә ҟазареи рзы «Аԥсны Аҳәынҭқарра зҽаԥазтәыз артист» ҳәа аҳаҭыртә хьӡы ланашьоуп.

Џьумутиа Михаил Резо-иԥа – Гал араион акультура Аҩны асахьаркыратә наԥхгаҩы, ахәыҷтәы фольклортә ансамбль «Самырзаҟан», иара убас ашәаҳәареи акәашареи рансамбль «Гал» асахьаркыратә напхгаҩы, Аԥсны амилаҭтә ҟазара аҿы илшамҭақәеи еиҵагыло аҿар рырҿиаратә потенциал аҿиара аҿы илагалеи рзы «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы ианашьоуп.

Аҟәа. Рашәарамза 20, 2023 шықәса. Аԥсныпресс. Ф.А.Искандер ихьӡ зху аурыс драматә театр Ареспублика Татарсҭан, Сибратәи афедералтә оруг ахь агастрольқәа рынагӡаразы амҩа иқәлеит. Агастрольқәа хыркәшахоит рашәарамза 29 рзы.  

Урыстәылатәи Афедерациа акультура Аминистрра адҵа ала Афедералтә ҳәынҭқарратә биуџьеттә акультура аусбарҭа «Урыстәыла аконцерт» имҩаԥнаго аҳәаанырцәтәи ахырхарҭала апрограмма «Агастроль дуқәа» аҳәаақәа ирҭагӡаны,   Аурыс драматә театр аҳәаанырцәтәи ахәаԥшцәа иднарбараны иҟоуп аспектакльқәа: А. Н. Островски иҩымҭа ала иқәыргылоу  аспектакль «Ахаҵа ԥшӡа»,  Ф. Г. Лорки «Ишьаарҵәыроу ачара», ақалақьқәа Новокузнецк (рашәарамза 21, 22  рзы Новокузнецктәи адраматә театр асцена аҿы) , ақалақь Горно-Алтаиск ( рашәарамза 24, 25  рзы П.В. Кучииак ихьӡ зху Амилаҭтә драматә театр асцена аҿы), ҳәа адырра ҟаҵоуп Аурыс драматә театр аофициалтә саит аҿы.

Аҟәа. Рашәарамза 20, 2023 шықәса. Аԥсныпресс. Рашәарамза  25 рзы –анаркотикқәа рыдкылареи анаркотикатә маҭәашьарқәа реиҭарсреи рҿагылара  Жәларбжьаратәи Амш аназгәарҭо аҽны, Аҟәа ақалақь аҿы имҩаԥгахоит ареспубликатә акциа «Аҿар анаркотикқәа ирҿагылоит»», - ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Акциа ахықәкы хада – агәабзиара еиҷаҳаны анхашьеи аҿар рыбжьара анаркотикқәа рыларҵәара аԥхьырҟәҟәаареи.

Акциа аҳәаақәа ирҭагӡаны имҩаԥгахоит атлетикаластәи аиԥхныҩра. Иара убас имҩаԥысуеит амҵәышәмпыл 3х3, аӡысра,  астолтә ԥкьаҭмпыл, ашахматқәа, анардқәа, адомино азы аицлабрақәа, иара убас ахыци ахәымпали рыла ахысразы амастер-класс мҩаԥгахоит.

Акциа рхы аладырхәырц рылшоит уи азы агәазыҳәара змоу зегьы.

Аҟәа. Рашәарамза 20, 2023 шықәса. Аԥсныпресс. Ахаша, рашәарамза 21, асааҭ 21:00 рзы, 1941 – 1945 шш. Аџьынџьтәылатәи еибашьра Дуӡӡа алагара арыцхә аламҭалазы адунеи зегьы аҿы иазгәарҭо алахьеиқәҵареи агәалашәареи Рымш инамаданы, Аҟәа ақалақь аҿы имҩаԥысраны иҟоуп Жәларбжьаратәи амемориалтә акциа «Агәалашәара ацәашьы».  

«Агәалашәара ацәашьы» – ари агәырҩа адагьы аибашьраҿы аџьамыӷәа цәгьа зыхганы аиааира агара зылшаз ажәлар рзы агәадурагьы аазырԥшуа амемориалтә усмҩаԥгатәуп. Арҭ аҭоурыхтә хҭыс хьанҭақәа ргәалашәара иазкны Аиааира згаз афырхацәа рышьҭрамадаҩцәа амемориалтә Акциа рхы аладырхәырц рылшоит, Аџьынџьтәылатәи еибашьра Дуӡӡа аҿы иҭахаз ргәалашәара иазкны ацәашьқәа адыркуеит.

Аҟәа. Рашәарамза 19, 2023 шықәса. Аԥсныпресс. Ваинахаа рымҩеи Акьыртаа, Семерџьиева, Киараз амҩақәа рҿы иҵоу аӡымҩангагақәа реиҭашьақәыргыларатә усурақәа инарымаданы, аҩаша, рашәарамза 20 рзы, 00:00 сааҭ инаркны 20:00 сааҭ рҟынӡа ақалақь араионқәак рҿы (Аҳабла Ҿыц, Аихамҩатә ҳабла, Ешба имҩа, авокзал, аџьармыкьа, «ВИЭМ», ақалақь агәи аҩадаратәи ахәҭеи, иара убас Турбаза аҳабла, Синоп, Аԥсилаа рымҩа, Аишьцәа Занҭариаа рымҩа, Ҷанба имҩаду), иара убас Ӡыгәҭеи Баслаҭеи ақыҭақәа рҿы ӡыла аиқәыршәара еиԥҟьоит.

Аҟәа. Рашәарамза 19, 2023 шықәса. Аԥсныпресс.  Рашәарамза   20 – 21,  2023 шықәсазы Аԥсны Арбџьармчқәа рҿы Арбџьармчқәа рыҟны анапхгараҭара амҩаԥгаразы аштабтә аицҽазыҟаҵарақәа мҩаԥгахоит.

Ашәахьа, рашәарамза 19, 15:00 рзы атәылахьчара аминистр, аинрал-полковник Владимир Ануа Арбџьармчқәа рыҟны анапхгараҭара амҩаԥгаразы аштабтә аицҽазыҟаҵара аҩбатәи аетап ахацыркра азы алаҳәара ҟаиҵеит.   Атәылахьчара Ахылаԥшырҭа Хада аиҳабы аштабқәеи архәҭақәеи  рҽаԥхьа аԥхынтәи аҽазыҟаҵара аамҭахәҭа азы зынагӡара хымԥадтәиу адҵақәа ықәиргылеит.

Аштаб Хада зыԥшра ҟамҵакәа иуадаҩу аоперативтә ҭагылазаашьақәа рҿы идырым араионқәа иахьаҵанакуа Арбџьармчқәа рнапхгараҭара асистема ашьақәыргылар иалагеит. Архәҭақәа аполигонқәа зегьы рҿы, иара убас идырым  аҭыԥқәа рҿы арратә хыдҵақәа рынагӡаразы иреиҳаӡоу арратә зыҟаҵара рыҭоуп. 

Аҟәа. Рашәарамза 19, 2023 шықәса. Аԥсныпресс. Аԥснытәи аҳәынҭқарратә Университет аҿы аректор, академик Алеко Гәарамиеи Урыстәылатәи адукатуреи анотариати Ракадемиа апроректор, азиндырратә наукақәа рдоктор, апрофессор Лиудмила Букалеровеи реиԥылара мҩаԥысит, ҳәа иаанацҳауеит ауниверситет аинформациеи амедиа коммуникациақәеи рыҟәша.

Аҟәа. Рашәарамза 19, 2023 шықәса. Аԥсныпресс. Аҳәынҭқарра Ахада Аслан Бжьаниа аҳақьымцәа аҳәынҭқарратә ҳамҭақәа ранашьаразы Аусԥҟақәа инапы рыҵаиҩит.

Агәабзиарахьчара аҿы алагала дууи зыҩаӡара ҳараку азанааҭдырреи рзы «Ахьӡ-Аԥша аорден III аҩаӡара ранашьоуп:

Конџьариа Маиа Алеқсандр-иԥҳа – Гәдоуҭатәи араионтә хәышәтәырҭа Хада аҟны иҟоу ахәыҷтәы поликлиника аҳақьым-педиатр.

Хәырхәмал Шьазина Родик-иԥҳа – Ареспубликатә хәышәтәырҭа аҳақьым-пульмонолог.

Аҟәа. Рашәарамза 19, 2023 шықәса. Аԥсныпресс. Рашәарамза  19 инаркны ԥхынгәымза 15, 2023 шықәсанӡа Ростов-на Дону ақалақь, аконгресс-цәыргақәҵатә центр «ДонЭкспоцентр» аҿы имҩаԥысуеит  Урыстәылазегьтәи арҿиаратә уаажәларратә еиҿкаара «Урыстәыла асахьаҭыхыҩцәа Реидгыла» Арегионбжьаратәи асахьаҭыхратә цәыргақәҵа «Юг России XIII: живопись, скульптура».

Аҟәа. Рашәарамза 19,  2023 шықәса. Аԥсныпресс. Ацқьа Ааӡабхгаҩы Вонифати ихьӡ зху Агәыҳалалратә фонд Аҟәатәи Акафедралтә ныхабаа наӡаӡатәи ашьҭаҵара азы ҳамҭас ианаҭеит Ацқьа апостол Симон Канттәи еицамкуа иибаҩ-ишаҩ аҟәырҷахақәа.

Ацқьа апостол Симон Канттәи еицамкуа ибаҩ-ишаҩ аҟәырҷахақәа  рыиагара мҩаԥысит Аимператортә аиашахаҵаратә  палестинатә еилазаара аԥшьгарала.

Аԥснытәи Аиашахаҵаратә Уахәама ахада Виссариаон Аԥлиа Аԥсныпресс акореспондент диҿцәажәо, Аԥснытәи аиашахаҵаратә уахәама азы Симон Канттәи еицамкуа ибаҩ-ишаҩ аҟәырҷахақәа ари ахҭыс Египеттәи Виссарион игәалашәара амш аҽны иахьыҟалаз даара асимволтә ҵакы аҵоуп ҳәа иазгәеиҭеит.

«Ҳара, аиашахаҵаратә қьырсианцәа ҳзы, ари даара гәырӷьара дууп. Ари ҳара ауадаҩрақәа ҳанрықәшәо ззахь ҳхьаԥшуа, ҳзымҵаныҳәо Ацқьақәа еицамкуа рыбаҩ-рышаҩ аҟәырҷахақәа роуп. Ҳара ҳамҭас иҳарҭеит Аԥснынтәи иргаз, анаҩс  Европа иҟаз, ахәҭак Дамаск иҟаз Симон Канттәи еицамкуа ибаҩ-ишаҩ аҟәырҷахақәа. Аџьар  рхаргыланы аиасрақәа раан урҭ Франциаҟа инаргеит. Арҭ Симон Канттәи еицамкуа ибаҩ-ишаҩ аҟәырҷахақәа уаҳа џьаргьы адунеи аҿы иҟам. Ацқьа ибаҩ-ишаҩ Афон Ҿыц  аԥхьакырҭа аҿы иҟоуп», - ҳәа иҳәеит аб Висарион.