Аҟәа. Ԥхынҷкәынмза 25, 2023 шықәса. Аԥсныпресс. Жәлар Реизара-Апарламент адепутатцәа актәи аԥхьарала «Аҿкчымазарақәа риммунапрофилактиказы» азакәан апроект рыдыркылеит. Аусшәҟәы адгалара мҩаԥигеит Апарламент аҿы Аҳәынҭқарра Ахада есымшатәи ихаҭарнак Анри Барцыц.
Иарбоу азакәан апроект ауааԥсыра рсанитар-епидемиологиатә шәарҭадара аиҿкаареи ауааԥсыра ргәабзиара ахьчареи хықәкыс иҟаҵаны аҿкчымазарақәа риммунапрофилактика аусхк аҟны аҳәынҭқарратә политика ашьаҭақәа шьақәнаргылоит.
«Ауааԥсыра аҿкчымазарақәа рацәыхьчара амассатә адунеи зегьы аҟны актуалра злоу апроблемақәа иреиуоуп. Аҿкчымазарақәа рҽацәыхьчара азы зегьы реиҳа аеффективра злоу хархәаганы иҟоуп аиммунапрофилактика амҩаԥгара», – ҳәа иҳәеит Анри Барцыц.
Азакәан апроект иазԥхьагәанаҭоит Аминистрцәа реилазаара ишьақәнарӷәӷәаз алаҵаҟаҵаратә мзари алаҵақәа рыҵәахра аҭахрақәеи. Аминистрцәа реилазаара ишьақәнаргылароуп реиҳа ирылаҵәо ачымазарақәа зхәышәтәуа ауаа рзанааҭқәа реиқәыԥхьаӡа, урҭ азанааҭқәа знапы рылаку хымԥада алаҵа рзыҟарҵалароуп. «Азакәан иара убасгьы иазԥхьагәанаҭоит арҭ атәылауаа алаҵашьҭахьтә уашәшәырара рызцәырҵыр, асоциалтә дгылара рыҭара анормақәа. Убри аан атәылауаа есымза аԥаратә харҭәаа рыҭареи аԥаратә цхыраара аиуреи рзы азин рымоуп»,- ҳәа иҳәеит Анри Барцыц.
Адепутат Леонид Лакербаиа аимҳәаршә аҟынтәи алаҵа змам ахәыҷы, иарбоу аепидемиа алаҳәара аан ашкол ахь инашьҭра залыршахом ҳәа иазгәеиҭеит.
Леонид Лакербаиа ари азакәан апроект адкылара иаҵоу аҵакы ахадара азгәеиҭеит, убри аан адепутатцәа апрофильтә комитет аҿы азакәан апроект алацәажәараан агәабзиарахьчара Аминистрра аганахьала аилибамкаара шрыбжьалаз атәы иҳәеит.
«Ахәҭаҷ 8 апункт 2 аҿы аепидемиатә рбагақәа рыла апрофилактикатә лаҵақәа рыҟаҵара азы аӡбамҭа здызкыло аҳәынҭқаратә санитартә ҳақьым иоуп ҳәа иазгәаҭоуп. Ҳсанитартә ҳақьым хада авторитет ду шлымоугьы, иарбоу аӡбамҭа адкылара аминистрцәа Реилазаара ақәыршаҳаҭны мацара ауп ишалыршахо», – ҳәа иҳәеит Леонид Лакербаиа.
Адепутат Дауҭ Хәытаба ахәҭакахьала, ари азҵаара ӷәӷәала адискуссиа цәырнагоит, убри аҟнытә уи акыр ишәа-иза, ҭакԥхықәала азнеира аҭахуп ҳәа иазгәеиҭеит.
«Араҟа зыӡбахә ҳәоу ахәыҷқәа рымацара акәӡам, уи иаҵанакуеит аиҳабацәагьы. Ари аимак-аиҿак зцу азҵаара ауп. Иҳалшома ҳара ауаа алаҵа аҟаҵара мчыла рыдгалара. Сара хаҭала, сԥа еиҵбы алаҵа илаҵара мап ацәыскит, уи сара идырны исыдыскылаз аӡбамҭа ауп. Џьара-џьаргьы аҭаацәагьы ргәаанагара ахшыҩзышьҭа аҭалатәуп», – ҳәа иҳәеит Дауҭ Хәытаба.
