Аҟәа. Ԥхынҷкәынмза 25, 2023 шықәса. Аԥсныпресс. Жәлар Реизара-Апарламент адепутатцәа асессиа аилатәара аҿы актәи аԥхьарала «Ихымԥадатәиу атәанчахәытә ԥгаԥса асистемаҿы хазхаҭалатәи (ихаҿырку) ашәҟәҭагаларазы» азакәан апроект рыдыркылеит.
«Иарбоу азакәан апроект атәанчаҩратә еиқәыршәара ареформақәа ралагалараҿы ихадоу аелементқәа ируакуп, уи аҳәынҭқарратә тәанчахәытә еиқәыршәара азы Аԥсны Аҳәынҭқарра азакәанԥҵара иаҵанакуа атәылауаа рзы адыррақәа хра рыманы рышәҟәҭагалара амҩаԥгара алзыршо ҳаамҭазтәи аҳәынҭқарратә система аԥҵара иазырхоуп», – ҳәа иаҳәоит азакәан апроект иацу аилыркаагатә шәҟәы аҿы.
Иарбоу азакәан адкылара, иара убри ала хазхаҭалатәи (ихаҿырку) ашәҟәҭагалара алагалара, атәанчаҩратә еиқәыршәара асистема аҿы иҟоу апроблемақәа жәпакы рыӡбара алнаршоит.
Азакәан апроект аҳәынҭқарратә тәанчаҩратә система амеханизмқәа аҿиара иаҿу аџьармыкьатә еизыҟазаашьақәа ирықәшәо аҟалара иацхраауеит, аԥгаԥсатә џьашықәси иалагалаз аԥгаԥсатә шәатәқәеи рхышәа-ҵышәа иадҳәалоу атәанчахәы ахышәа-ҵышәа ашьақәыргылареи рганахьала аҳәынҭқарратә тәанчаҩратә ԥгаԥсаҟаҵара аҿиареи, атәылаҿы аус зуа ауааԥсыреи тәанчара иҟоуи рхыԥхьаӡара еиҳа ииашаны азԥхьагәаҭареи рзы алшара аԥнаҵоит.
Азакәан апроект иара убас аҳәынҭқарратә усбарҭақәа еиҳа аеффективра аланы рхылаԥшратә функциақәа рынагӡара алзыршо амеханизмқәа шьақәнаргылоит.
Азакәан апроект ала дарбанызаалак атәанчахәытә ԥгаԥсазы ашәҟәы зҽанызҵаз иҷыдоу аршаҳаҭга иҭара азԥхьагәаҭоуп.
Атәанчахәытә ԥгаԥсазы иҷыдоу аршаҳаҭга атәылауаҩ, аҳәынырцәтәи атәылауаҩ, мамзаргьы атәылауаҩра змам ахаҿы аҳәынҭқарратә социалтә ԥгаԥсатә система аҿы ашәҟәы дышҭагалоу шьақәнарӷәӷәоит.
Уи ала атәанчахәы ашьақәыргыларазы ихымԥадатәиу адыррақәа – аџьашықәс, аԥгаԥсатә лагалақәеи ашәарақәеи уҳәа егьырҭ адыррақәеи зныԥшуа ахатәы ԥхьаӡамҭа аартхар ҟалоит.
Аԥсны атәылауаа ихымԥадатәиу атәанчаҩратә ԥгаԥса асистема аҿы ашәҟәы иҭагалахоит автоматтә режим ала: ихымԥадатәиу атәынчаҩратә ԥгаԥса асистема аҿы ашәҟәҭагалареи анаҩстәи аԥгаԥсатә аршаҳаҭга аҭареи ахәыҷы – Аԥсны атәылауаҩ иира азы аҳәынҭқарратә шәҟәҭагалараан, мамзаргьы уаанӡа ихымԥадатәиу атәанчаҩратә ԥгаԥса асистема аҿы ашәҟәы иҭагаламыз Аԥсны атәылауаҩ Аԥсны атәылауаҩшәҟәы иоураан имҩаԥыслоит. Убри аан аԥгаԥса иахысыз ахаҿқәа зегьы хаҭала, мамзаргьы аԥгаԥсаҟаҵаҩы ила Аԥсны Аҳәынҭқарра Атәанчаҩратә фонд, ма уи аҟәша ахь аԥгаԥсатә аршаҳаҭга аиураз адҵаалара илшоит.
