Аҟәа. Ԥхынҷкәынмза 12, 2023 шықәса. Аԥсныпресс. Аҵарадырра Аминистрра 100-шықәса ахыҵра иазку аныҳәатә усмҩаԥгатә мҩаԥысит Аԥснытәи аҳәынҭқарратә драматә театр аҿы.

Аҵара аминистр Инал Габлиа иқәгылараҿы иахьа Ареспублика Аԥсны азы акыр зҵазкуа мшуп ҳәа иазгәеиҭеит.

«Иахьа ҳара иазгәаҳҭоит Аԥсны аҵарадырра Аминистрра 100-шықәса ахыҵра. Ари имаҷым аамҭахәҭа зҵазкуа аҭоурых азы Аминистрра шьаҿа-шьаҿала, лҵшәа бзала, атәыла аҿы аҵарадыра аҿиареи аларҵәареи рзы ахыдҵа анагӡара иаҿын. 100-шықәса рыҩныҵҟа, акыр ауадаҩрақәа шыҟазгьы, уи атәыла ауааԥсыра зегьы рҵарадырра азы хра злоу алагала ҟанаҵон. Уи дарбанызаалак ауаҩы ипотенциал аарԥшра, ауаажәларра рыҩныҵҟа ихатә ҭыԥ аԥшаареи ижәлар рхаҭарнак иашаны дҟаларц азы иара аҭакԥхықәра адагьы амиссиа ауп инанагӡоз», – ҳәа иҳәеит аминистр.

Иара иазгәеиҭеит, аҵыхәтәантәи 100 шықәса рыҩныҵҟа адунеи акыр аҽшаԥсахыз, аҵара Аминистррагьы аамҭа ишьақәнагылоз аҭагылазаашьақәа аҽарнааланы аус шауаз.  Шықәсы рацәа инеиԥынкыланы иҿыцу аҵарадырратә программақәа аус рыдулахон, иԥхьагылоу атехнологиақәа аларгалон, арҵаҩратә методика аиӷьтәра иазку ауснагӡатәқәа мҩаԥысуан.

«Ҳара ари аус дуӡӡа знапы алаку зегьы иҭабуп ҳәа раҳҳәарц ҳҭахуп, аԥхьаӡа иргыланы ҳарҵаҩцәа, еиҵагыло аҿар реиҵааӡараҿы аихьӡарақәа раарԥшраҿы адгылара ҳазҭоз зегьы. Агәра ганы ҳаҟоуп ҳминистрра аринахысгьы аҿиара амҩа ишаныло, аҵарадырра акәзар, Аԥсны аҿиареи апрогресси уасхырс ишамазаауа», – ҳәа иҳәеит аҵара аминистр.

Аҳәынҭқарра Ахада Ихаҭыԥуаҩ Бадра Гәынба Аҳәынҭқарра Ахада Аслан Бжьаниа ихьӡала адныҳәалара даԥхьеит.

«Асовет мчра анышьақәгыла ашьҭахь раԥхьатәи ашықәсқәа рзы иаԥҵан Аԥсны Жәлар аҵарадырратә комиссариат. Уи напхгаҩыс даман ашәҟәыҩҩы, ауаажәларратә усзуҩ Самсон Ҷанба. Аԥсны Жәлар Ркомиссариат аҟны аџьабаа ду рбеит Дырмит Гәлиа, Симон Басариа, Кондрат Ӡиӡариа уҳәа аӡәырҩы. Дара ирыбзоураны Аԥсны иҭыжьын раԥхьатәи арҵагашәҟәқәа, уи ареспублика аҿы аҵарадырра аҿиара акыр иацхрааит», – ҳәа иазгәаҭоуп адныҳәалара атекст аҿы.

Аҳәынҭқарра Ахада иҳаҩсыз ашәшықәса азы Аминистрра аҵарадырра асистема аҿиара, атәылауаа рдыррақәеи рылшарақәеи рыҩаӡара ашьҭыхра аҿы ихадоу ароль нанагӡон ҳәа иазгәеиҭеит.  

«Шәара шәаԥхьа иҟаз реиԥш, ааԥсарак ҟамҵакәа ажәлар зыҩаӡара ҳараку адыррақәа рызнагареи апрограммақәеи аҵаратә усбарҭақәеи рмодернизациеи рзы аус жәуеит, арҵаҩратә еилазаара ацхыраареи адгылареи ашәҭоит», – ҳәа иазгәаҭоуп адныҳәаларатә цҳамҭа атекст аҿы.

Аслан Бжьаниа арҵаҩцәа зегьы агәабзиареи ачҳареи  аманшәалареи рзеиӷьеишьеит.

Аҟәа. Ԥхынҷкәынмза 12, 2023 шықәса. Аԥсныпресс. Иахьа Аԥсны аминистррақәеи ахылаԥшырҭақәеи жәпакы аиубилеитә рыцхә – аԥҵара ҟалеижьҭеи  30 шықәса аҵра азгәарҭоит.  

30 шықәса раԥхьа, ԥхынҷкәынмза 12, 1993 шықәсазы, Ареспублика Аԥсны Иреиҳаӡоу Асовет ахантәаҩы Владислав Григори-иԥа Арӡынба «Ареспублика Аԥсны аҳәынҭқарратә напхгараҭара аусбарҭақәа рыструктура азы» азакәан инапы аҵаиҩит.

Ари азакәан ала ишьақәыргылан аибашьрашьҭахьтәи ареспублика анапхгараҭаратә аҳәынҭқарратә усбарҭақәа рыструктура. Уи иалалеит 18 министеррақәеи 16 егьырҭ аҳәынҭқарратә напхгараҭара аусбарҭақәеи.  

Ареспублика Аԥсны Аминистррақәа:

1. Атәылахьчара Аминистрра.
2. Аҩныҵҟатәи аусқәа Рминистрра.
3. Адәныҟатәи аусқәа Рминистрра.
4. Акультура Аминистрра.
5. Аҵарадырра Аминистрра.
6. Афинансқәа Рминистрра.
7. Аргылареи архитектуреи Рминистрра.
8. Ақыҭанхамҩеи афатәи-жәтәи Рминистрра.
9. Аекономика Аминистрра.

• Ахәаахәҭра Аминистрра.
• Ааглыхра Аминистрра.
• Аекологиа Аминистрра.
• Аиустициа Аминистрра.
• Агәабзиарахьчара Аминистрра.
• Атранспорти аимадареи Рминистрра.
• Аџьеи асоциалтә хьчареи Рминистрра.
• Аинформациеи акьыԥхьи Рминистрра.
• Аенергетика Аминистрра.

Аҟәа. Ԥхынҷкәынмза 12, 2023 шықәса. Аԥсныпресс. Аԥсны аҵара Аминстрра ашколнӡатәи аҵарадырра азы раԥхьаӡа акәны «Анбан» шәҟәы ҭнажьит. Ари ашәҟәы иара убас иацуп аусуратә тетрадқәа.  Аминистрра 100-шықәса ахыҵра иазкны имҩаԥгаз аныҳәатә усмҩаԥгатә аҿы дықәгыло абри азы адырра ҟаиҵеит аҵара аминистр Инал Габлиа.

Аамҭа кьаҿ иалагӡаны «Анбан» шәҟәы ҿыц Аԥснытәи ашколқәа рҿы ицәырҵуеит.

Иара убас Инал Габлиа ааигәатәи аихьӡарақәа ртәы еиҭеиҳәеит:

Ԥхынҷкәынмза 10, 2023 шықәса рзы Урыстәылазегьтәи ахәыҷтәы центр «Смена» ахь амҩа иқәлеит зхыԥхьаӡара 25-ҩык рҟынӡа инаӡо, 8-11-тәи аклассқәа рҿы аҵара зҵо ашкол-интернатқәа рҵаҩцәа рыла еилоу актәи агәыԥ.

Абҵарамза 16 рзы Б.Шьынқәба ихьӡ зху абжьаратәи ашкол  №1  аҵаҩцәа рыла еилоу акоманда амҩаҿы аныҟәаразы аинспектор ҿарацәа Жәларбжьаратәи Реизгара аҿы аиааира ргеит. Иара убас хара имгакәа Аԥснынтәи ахәыҷқәа азҩыдатәратә Центр  «Артек» ахь идәықәҵахоит.

Аҟәа. Ԥхынҷкәынмза 12, 2023 шықәса. Аԥсныпресс.  Ԥхынҷкәынмза 10, 2023 шықәса рзы амассатә инфорациа ахархәагақәа рҿы азинхьчаратә усбарҭақәа русзуҩцәа Тҟәарчал араион Ҵарча ақыҭан инхоз Витали Иван-иԥа Қарбаиа даанкыланы дахьырыԥҟаз иахҟьаны иԥсҭазаара далҵит ҳәа аинформациа цәырҵит.

Иҟоу адыррақәа рыла, Аԥсны ауаҩы изинқәа рыхьчара знапы иану Анас Кьышьмариа апрокурор Хада, аҩныҵҟатәи аусқәа рминистр, Гал араион апрокурор, Гал араион аҩныҵҟатәи аусқәа Русбарҭа аиҳабы рахь аамҭа кьаҿ иалагӡаны абри аинформациа ала агәаҭарақәа рымҩаԥгареи, насгьы урҭ рылҵшәақәа рзы адырра ауаҩы изинқәа рыхьчара знапы иану Иаппарат ахь анашьҭреи ралыршаразы ашәҟәы налышьҭит.

Аҟәа. Ԥхынҷкәынмза 12, 2023 шықәса. Аԥсныпресс. Иахьа Ареспублика Аԥсны аекономика Аминистрра аԥҵеижьҭеи 30 шықәса ҵит.

Ԥхынҷкәынмза 12, 1993 шықәса рзы Ареспублика Аԥсны Иреиҳаӡоу Асовет ахантәаҩы  Владислав Арӡынба «Ареспублика Аԥсны аҳәынҭқарратә напхгараҭара аусбарҭақәа рыструктура азы» азакәан инапы аҵаиҩит.  Ари азакәан инақәыршәаны иаԥыхыз Аҳәынҭқарратә плантә комитет ахаҭыԥан иаԥҵахеит атәыла аекономика Аминистрра.

Еиуеиԥшым ашықәсқәа рзы ари Аминистрра ахадараҿы иҟан Даур Барганџьиа, Константин Ҭыжәба, Константин Озган, Беслан Кәыбраа, Адгәыр Лышәба, Руслан Арӡынба, Давид Ирадиан, Николаи Ачба, Адгәыр Арӡынба. Дара зегьы ҳҳәынҭқарра аекономика аҿиареи уи аҭышәынтәалара алыршареи рлагала аларҵеит. Уажәы аекономика Аминистрра дахагылоуп Кристина Озган.

Аҟәа. Ԥхынҷкәынмза 12, 2023 шықәса. Аԥсныпресс.  Аԥсны Аҳәынҭқарра Ахада  Аслан Бжьаниа Владимир Путин Урыстәылатәи Афедерациа Аконституциа амш идиныҳәалеит. Абри атәы аанацҳауеит Аҳәынҭқарра Ахада ипресс-маҵзура.

Адныҳәаларатә цҳамҭа атекст аҿы, ахәҭакахьала иҳәоуп:

«Ҳаҭыр зқәу Владимир Владимир-иԥа!

Азин сыщәҭозар, ҳаҭырқәҵарыла сшышәзыҟоу азгәаҭо,  ишәыдысныҳәалрц сҭахуп аҳәынҭқарратә ныҳәа ду - Урыстәылатәи Афедерациа Аконституциа Амш.

1993 шықәса ԥхынҷкәынмза 12 Урыстәыла аҭоурых ҿыц аҟны аҳәынҭқарра аԥсҭазаараҿы аамҭа ҿыц ашьақәгылара иазҳәоу иҷыдоу аҭыԥ ааннакылоит.

Урыстәылатәи Афедерациа Аконституциа атәыла қәҿиарала аҿиара уасхырс иазышьҭоуп, ацәаҩашәатә хырхарҭа хадақәаны изгәылоу, ауаҩы изинқәеи ихақәиҭреи акырӡа зҵазкуа ак акәны иазгәазҭаз.

2020 шықәса рзы Адокумент Хада аԥсахрақәа ралагалара

Аҟәа. Ԥхынҷкәынмза 12, 2023 шықәса. Аԥсныпресс. Ашықәс Ҿыц аламҭалазы С.Ҷанба ихьӡ зху Аԥснытәи аҳәынҭқарратә драматә театр, Аԥсны аҳәынҭқарра ақәыԥшцәа ртеатр, Ф.Искандер ихьӡ зху Аурыс драматә театр аԥсышәалеи урыс бызшәалеи ахәыҷтәы спектакльқәа дырхиеит.    

Аԥсуа адраматә театр аҿы ԥхынҷкәынмза  25 рзы А.Н. Островски ипиеса ала иқәыргылоу аспектакль «Асҭыԥҳа»  аԥхьарбара мҩаԥысуеит.   Апиеса аԥсуа бызшәахьы еиҭалгеит апоетесса Нелли Ҭарԥҳа. Ашықәсҿыцтәи ақәгылара арежиссиор-ақәыргылаҩ –  Аԥсны Зҽаԥсазтәыз артистка Мадина Аргәын.

Ԥхынҷкәынмза 25 инаркны ԥхынҷкәынмза 30-нӡа аспектакль Аҟәа ақалақь аҿы имҩаԥыслоит, ажьырныҳәамза  2 - 3 рзы – Гагра ақалақь акультура Аҩны аҿы.

Аҳәынҭқарратә ақәыԥшцәа ртеатр ахәыҷқәа ирызнархьиеит аԥсуа бызшәала иқәыргылоу аспектакль  «Ашықәсҿыцтәи ахҭыс». Арежиссиор-ақәаргылаҩ – Ахра Кәарҷиа. Аспектакль аԥхьарбара мҩаԥгахоит ԥхынӷкәынмза 20 рзы С.Ҷанба ихьӡ зху Аԥсуа драматә театр асцена аҿы.

Аҟәа. Ԥхынҷкәынмза 12, 2023 шықәса. Аԥсныпресс. Ашәахьа, ԥхынҷкәынмза  11 рзы Аҳәынҭқарра Ахада Аслан Бжьаниеи Жәлар Реизара-Апарламент Аиҳабы Лаша Ашәбеи алархәны  аекономикатә политикеи ареформақәеи аинформациатә техногиақәеи рзы апарламенттә Еилакы аилатәара мҩаԥысит.

Аилатәара иалахәыз азакәан апроектқәа ирыхәаԥшит. Урҭ рхыԥхьаӡараҿы иҟоуп:

«Еидкыланы аҳәынҭқарратә  аахәарақәа рзы»;

«Ареспублика Аԥсны Анхаратә Закәанеидкыла»;

«Ареспублика Аԥсны Анхаратә Закәанеидкыла азинмчы аҭара азы»;

«Ареспублика Аԥсны Аҳаиртә Закәанеидкыла аиҭакрақәа ралагалара азы»;

«Аинвестициатә еилахәылара аҭышәынтәалара аганахьала Ареспублика Аԥсны азакәанԥҵарақәак  аиҭакрақәа  ралагалара  азы»;

«Аинвестициатә еилахәылара азы».

Апрофильтә Еилакы алахәылацәа иарбоу азакәан апроектқәа иааиуа аилатәара аҿы Апарламент ишьақәнарӷәӷәарц азы абжьгара аҟаҵара азы аӡбамҭа рыдыркылеит. 

Анаҩс апарламенттә Еилакы ахантәаҩы Резо Занҭариа «Ареспублика Аԥсны афымцаенергетика аҿы ареформақәа рымҩагара» атема ала аӡыргара мҩаԥигеит.  Аилатәара иалахәыз ирыдгалаз апроект иахәаԥшны доусы ргәаанагарақәа рҳәеит. 

Аҟәа. Ԥхынҷкәынмза 12, 2023 шықәса. Аԥсныпресс. Жәлар Реизара-Апарламент Аиҳабы Лаша Ашәба Урыстәылатәи Афедерациа Афедералтә Еизара апалатақәа рхантәаҩцәеи Аԥсны Аҳәынҭқарраҟны иҟоу Ацҳаражәҳәаҩи Урыстәыла Аконституциа Амш рыдиныҳәалеит.

Афедерациа Ахеилак Ахантәаҩы Валентина Матвиенко лыхьӡала ишьҭу адныҳәалараҟны иҳәоуп:

«Афедерациа Ахеилак ҳаамҭазтәи Урыстәылатәи аҳәынҭқарра ашьаҭа зырӷәӷәаз, уи атәылауаа рзы итрадициатәу адоуҳатә-леишәатә ҵасқәа реиқәырхара алзыршо Урыстәылатәи Афедерациа Аконституциа инақәыршәаны иаԥҵоуп. Урыстәылатәи Афедерациа Аконституциа Урыстәылатәи аҳәынҭқарра аҿиара ахырхарҭа хадақәа ҳәаақәнаҵоит, аамҭа ицәырнаго ашәарҭара дуқәа инарықәыршәаны зыда ԥсыхәа ыҟам азыӡбақәа рыдкылара иацхраауеит. 2020 шықәсазы урыстәылазегьтәи жәлар рыбжьыҭирала ишьақәырӷәӷәаны Урыстәылатәи Афедерациа Аконституциа иалагалаз аиҭакрақәа, аҳәынҭқарра аҿиара апроцесс аҿы имҩаԥысуа аҭоурыхтә еиҭакрақәеи атәыла иҭышәынтәалоу аекономикатә ҿиареи рзы хра злоу аҭагылазаашьақәа раԥҵара иазырхоуп.  

Ҳара агәра ҳгоит аԥсны-урыстәылатәи апарламентбжьаратә усеицура аԥхьаҟгьы арӷәӷәара Аԥсны Урыстәылеи рыжәларқәа ринтересқәа инарықәыршәаны ҳҳәынҭқаррақәа реизыҟазаашьақәа реизырҳара ишацхраало».

Аҟәа. Ԥхынҷкәынмза 12, 2023 шықәса. Аԥсныпресс. Аԥсны адәныҟатәи аусқәа рминистр Инал Арӡынба аҩганктәи, аԥсны-шьамтәылатәи амшхәаԥштә иаҵанакуа жәларбжьаратәи азҵаарақәа рылацәажәаразы   Шьамтәылатәи Арабтәи Ареспублика ахь дцеит, ҳәа адырра ҟанаҵоит Аԥсны адәныҟатәи аусқәа Рминистрра Амедиацентр.

Аҩаша, ԥхынҷкәынмза 12 рзы,  Инал Арӡынба  Дамаск ақалақь аҿы иҟоу Идырым Асолдаҭ ибаҟа даҭааит, уаҟа уи атәыла ахақәаиҭреи ахьыԥшымреи зхы ақәызҵаз Шьамтәыла Афырхацәа ҳаҭырла игәалаиршәеит.