Аҟәа. Мшаԥымза 3, 2025 шықәса. Аԥсныпресс. Аҳәынҭқарра Ахада Бадра Гәынба М. В. Ломоносов ихьӡ зху Москватәи Аҳәынҭқарратә Университет аректор Виктор Садовничи иира Амш идиныҳәалеит.
Адныҳәаларатә цҳамҭаҿы, ахәҭакахьала иҳәоуп:
«Ҳаҭыр зқәу Виктор Антон-иԥа, ишәыдысныҳәалоит шәира Амш. Шәара шәыԥсҭазааратә мҩа зегьы – анаука, аҵарадырреи агуманисттә идеалқәеи рыҿиара ламысла, гәыкала азааԥсара хра злоу ҿырԥшны иҟоуп. Шәара ректорс шәыҟазаара аамҭа аҩныҵҟала М. В. Ломоносов ихьӡ зху Москватәи аҳәынҭқарратә университет Урыстәылатәи Афедерациа аҟнеиԥш, адунеи зегьы аҟынгьы иреиҳау аҵараиурҭақәа рыбжьара заҳаҭыр ҳараку, аԥхьагылара змоу аҵараиурҭақәа ируакхеит, атрадициақәа рышьҭрамадареи аинновациақәеи аҵарадырра иҳараку аҩаӡареи иасимволны иҟалеит», - ҳәа иазгәаҭоуп адныҳәалараҿы.
Бадра Гәынба ҷыдала Виктор Садовничи иҭабуп ҳәа еиҳәеит Аԥсни уи астудентцәеи рганахьала иааирԥшуа ахшыҩзышьҭра азы.
«Шәара шәыцхыраара иабзоураны шәҩыла аԥснытәи аҿар алегендартә ҵараиурҭа Москватәи Аҳәынҭқарратә Университет аҿы аҵара азы алшара роуит. Иахьа уи аушьҭымҭацәа ироуз адыррақәа ҳтәылаҟны еиуеиԥшым ахырхарҭақәа рҿы рхы иадырхәоит.
Шәара ишәылшаз рацәоуп урыстәылатәи иреиҳаӡоу ашколи аҭҵаарадырреи рырҿиаразы, жәларбжьаратәи аҭҵаарадырратә усеицзура амҽхак арҭбааразы. Агәра ганы сыҟоуп шәара шәусура азнеишьеи хәызмаӡам шәԥышәеи анаукеи аҵарадырреи анаҩстәи рыҿиара акыр ишацхраауа.
Ҳаҭыр зқәу Виктор Антон-иԥа, шәира Амш аҽны ишәзеиӷьасшьар сҭахуп агәабзиара, анасыԥ, ашықәснҵыра ду, аҭҵаарадырраҿы аихьӡарақәа!»