Аҟәа. Мшаԥымза 3, 2025 шықәса. Аԥсныпресс. Краснодартәи атәылаҿацә агубернатор Вениамин Кондратиев Бадра Гәынба официалла Аҳәынҭқарра Ахада имаҵура ахагылара иазкыз аныҳәатә церемониа далахәын. Уи мҩаԥысит ахаша, мшаԥымза 2 рзы.
«Ҳара ҳрегионқәа ирзеиԥшу аҳәаа анаҩс акыр шықәса ирыбжьоу аиҩызареи аусеицуреи еиднкылоит. Ҳрызгәдууп наҟ-ааҟ ахәаахәҭра-економикатә, агуманитартә усхкқәа рҿы иҟоу аихьӡарақәа. Убас, иаагозар, аҵыхәтәантәи хәы-шықәса рыла Аԥсни Ҟәбинеи рыбжьара атауареикәыршара 2-нтә иазҳаит. Иумбар залшом ақыҭанхамҩа, ааглыхра, иара убас атуристтә усхкы аҿы еицынарыгӡо апроектқәа иаадырԥшуа аихьӡарақәа», – ҳәа и-Telegram-канал аҿы иҩит арегион ахада.
Уажәы иҟоу атауареикәыршара амҽхак 10 млрд мааҭ иреиҳауп.
Вениамин Кондратиев агәрагара ааиԥшит ҿыц иалырхыз Аҳәынҭқарра Ахада инапхгарала Краснодартәи атәылаҿацә амадара еиҳагьы ишыӷәӷәахо, аекспорттә потенциал шазҳауа, азеиԥш Амшынеиқәатә ԥшаҳәа апотенциал хра злоу аҿиара шаиуо.
Вениамин Кондратиев даҽазныкгьы Бадра Гәынба дидныҳәалеит, аҭакԥхықәра зцу аҳәынҭқарратә усура аҿы изеиӷьаишьеит ақәҿиарақәеи аманшәалареи.
