Аҟәа. Ажьырныҳәамза 11, 2024 шықәса. Аԥсныпресс. Асезон алагара инакны ԥхынҷкәынмза анҵәамҭанӡа експорт ҳасабала идәықәҵаз амандарина акапан 21 680 тонн рҟынӡа инаӡоит, уи иҳаҩсыз ашықәс, аиԥш-зеиԥшу аамҭахәҭа азы аасҭа 5 нызықь тонн рыла еиҵоуп. Абри азы Аԥсныпресс ахь адырра ҟарҵеит Аҳәынҭқарратә ҳазалхратә Еилакы аҳазалхратә статистикеи анализи рыҟәша аҟны.

Аҟәа. Ажьырныҳәамза 11, 2024 шықәса. Аԥсныпресс. 10 127 - ҩык аҭааит Риҵатәи ареликтә милаҭтә парк ашықәсҿыцтәи аныҳәатә мшқәа ажьырныҳәамза  1 инаркны 10-нӡа.  Урҭ рахьынтә - 1 120- ахәыҷқәа роуп. Иҭииз абалеҭқәа рҟынтәи афинанстә лагалақәа - 6 525 900 мааҭ рҟынӡа инаӡоит, ҳәа адырра ҟанаҵоит атуризм Аминистрра апресс-маҵзура.

2023 шықәса, аиԥш-зеиԥшу аамҭахәҭа азы Риҵатәи ареликтә милаҭтә парк иаҭааз рхыԥхьаӡара  10 077-ҩык рҟынӡа инаӡоит, урҭ рахьынтә – 1045 ахәыҷқәа.  Иҭииз абилеҭқәа рҟынтәи афинанстә лагалақәа - 6 531 400 мааҭ рҟынӡа инаӡоит.

Аҟәа. Ажьырныҳәамза 11, 2024 шықәса. Аԥсныпресс.  Аҟәатәи «Динамо» ааӡамҭа, 2009 шықәсазы ииз,  Апрофессионалтә шьапылампылтә Клуб ЦСКА Академиа  ашьапылампыласҩы Даниил Дунамалиан 2023-тәи  ашықәс аихшьаалақәа рыла иреиӷьу ахәмарыҩ ҳәа далкаахеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы апресс-маҵзура.

Аҟәа. Ажьыныҳәамза 11, 2024 шықәса. Аԥсныпресс. Гал араионтә хәышәтәырҭа Хада аҳақьым хада Асҭамыр Гамгиа «Гал-медиа» акорреспондент диҿцәажәо, фы-шықәса зхыҵуаз Лизи Кәачахьиа лыԥсра атәы далацәажәеит.

Уи иажәақәа рыла, ахәыҷы лыуацәа аӡәгьы амедицинатә цхырааразы Галтәи ахәышәтәырҭа иадымҵаалаӡеит. Ирласу амедицинатә цхыраара Амаҵзура ахь ҭелла адыррагьы ҟамлаӡеит.  Иҟоу адыррақәа рыла, лара ажьырныҳәамза 9 ашьыжь лҭаацәа дахьыргаз Жәаргьыҭ ақалақь аҿы лыԥсҭазаара далҵит.  

Аҟәа. Ажьырныҳәамза 11, 2024 шықәса. Аԥсныпресс. Аныҳәатә ԥсшьарамшқәа шыҟазгьы, С. Ҷанба ихьӡ зху Аԥснытәи аҳәынҭқарратә драматә театр аҿы аусура иашыкьаҳәымҭан.  Атеатр актиорцәа асезон ҿыц аартра рҽазыҟарҵоит. А. П. Чехов еицырдыруа ипиеса ала иқәыргылоу аспектакль «Саншьа Иуана» ала иқәыргылоу аспектакль аԥхьарбара азгәаҭоуп жәабранмза аҽеиҩшамҭазы. Аспектакль ақәыргылаҩ арежиссиор қәыԥш Бенар Ақаҩба.  Абри атәы аанацҳауеит акультура Аминистрра.

Аспектакль иалахуп актиорцәа: Аԥсны зҽаԥсазтәыз артист Сергеи Габниа, ареспублика зҽаԥсазтәыз артистцәа Тома Гамгиа, Адгәыр Малиа (аеншьа Иуана), Лаврик Ахба, еицырдыруа актриса  Розита Ҭаниа, абаҩхатәра злоу актиор қәыԥшцәа Есма Кәыҵниа, Лана Џьопуа, Леон Кәыр-оглы.  

Аҟәа. Ажьырныҳәамза 10, 2024 шықәса. Аԥсныпресс. Аекологиа азы аҳәынҭқарратә Еилакы ахантәаҩы Савели Ҷыҭанаа аԥснытәи аӡымҿхак иахьаҵанакуа ақамшьиа акра инамаданы ишьақәгылаз аҭагылазаашьа далацәажәеит.

«Иацы сара авидеонҵамҭа сзаарышьҭит. Уаҟа аҟәатәи абаӷәаза аҿы хыԥхьаӡара рацәала аӷбақәа шгылоу убоит. Иазгәасҭарц сҭахуп, ари амшцәгьақәа раԥхьа абжьааԥны иҟало ҭагылазаашьоуп. Насгьы ари аҭыԥ аҿы изеиԥшразаалак аԥсыӡкра шымҩаԥысмсуагьы сҳәар сҭахуп», – ҳәа Аԥсныпресс акорреспондент диҿцәажәо иҳәеит Савели Ҷыҭанаа.

Уи иажәақәа рыла, сынтәа, уаанӡа еиԥш акәымкәа, ақамшьиа акраан азинеилагарақәа маҷны иаарԥшын.

«Аԥсыӡкразы иаԥҵоу аԥҟарақәа реилагара ҟалом. Иахьатәи аамҭазы ҳара иааҳарԥшит мацара аҟәара аҟынтәи 500-метра иазааигәаны аԥсыӡкра  иадҳәалоу ҩ-зинеилагарак. Руак иацжәацы иҟалеит, егьи - иахьа. Урҭ рыла аусеилыргара мҩаԥысуеит», – ҳәа иҳәеит Савели Ҷыҭанаа.

Аҟәа. Ажьырныҳәамза 10, 2024 шықәса. Аԥсныпресс. 2008 шықәсазы ииз аспортсменцәа рыла еилоу Аҟәатәи «Динамо» акоманда аӡынтәи атурнир «Dagomys Cup» аҿы аиааира агеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Афинал аҿы аԥснытәи акоманда Ашьапылампылтә Клуб «Спартак» (ақ. Краснодар) иаиааит.

Атурнир иреиӷьу абжахьчаҩыс далкаахеит Доминик Шьакаиа, иреиӷьу амбахьчаҩыс - Ален Хонелиа.

Акоманда азыҟаиҵоит Мераб Кәакәаскьыр.

Атурнир Дагомыс,  ажьырныҳәамза 5 - 10 рзы имҩаԥысуан.  

Аҟәа. Ажьырныҳәамза 10, 2023 шықәса. Аԥсныпресс. Ақәыларазы ахара рыдҵоуп Дәрыԥшь ақыҭан инхо ҩыџьа ауаа, иара убас урҭ ирыцыз   – Ҟәланырхәа ақыҭан инхо Ефрем Заур-иԥа Ешба, ҳәа адырра ҟанаҵоит атәыла аҩныҵҟатәи  аусқәа Рминистрра апресс-маҵзура. 

Ефрем Ешба (1984 ш.ииз) Гәдоуҭа  ақалақь аҿы дааныркылеит, уи иҟаиҵаз азы иҿы иқәшаҳаҭхеит.

Гагра араион Алаҳаӡы ақыҭан ашьусԥшааратә усбарҭа аусзуҩцәа Гәдоуҭа араион аҩныҵҟатәи аусқәа Русбарҭа ауаажәларратә шәарҭадара амилициеи аоперативтә еилазаареи рыцны  имҩаԥыргаз аоперативтә ԥшааратә  усмҩаԥгатәқәа раан иааныркылеит 1975 шықәсазы ииз Тәанба Владимир Витали-иԥа, 1977 шықәсазы ииз Тәанба Заур Тарас-иԥа. Уи данааныркылоз аамҭазы имҩаԥгаз хаҭала игәаҭараан иӷьычыз амобилтә ҭел идырбалеит. 

Ашьаустә материалқәа рыла, Ефрем Ешба, Владимир Тәанба, Заур Тәанба, Ефрем Ешба ириҭаз адырра ала, заанаҵы ицәыҵеицәажәаны, атәым мазара ампыҵакра, ахәҭакахьала иҭииз амандаринақәа ирыҭныхыз аԥаратә хархәагақәа ргара хықәкыс иҟаҵаны ақәылара аԥшьыргеит.   

Ахара зду ауаа Ҟәланырхәа ақыҭахь рхы дырхеит. Араҟа урҭ ахәлара иазыԥшит. Анаҩс Заури Владимири Тәанаа алашьцара рҽалакны ааха зауз аамҭала дахьаанкылаз ахатәы ҩны иҩналеит. Урҭ  1957 шықәсазы ииз аԥҳәыс, аԥара рылҭарц азы илықәлеит. Заур Тәанба лабала, ҭаҷкәымла аԥҳәыс длысуа далагеит, Владимир  Танба – аԥҳәыс лнапқәа ҳәызбала ахәрақәа аниҵеит.  Аԥара анырмоу ашьҭахь, ацәгьоуцәа  ирымԥыхьашәаз амобилтә ҭел аашьҭыхны, ааигәа ирзыԥшыз Ефрем Ешба имашьынала аҭыԥ аҟынтәи рҽырӡеит.  

Аҟәа. Ажьырныҳәамза 10, 2023 шықәса. Аԥсныпресс. Атәыла аҩныҵҟатәи аусқәа Рминистрра Автоҳәынҭинспекциа Аусбарҭа анапхгаҩцәа –  Автоҳәынҭинспекциа Аусбарҭа анапхгаҩы ихаҭыԥуаҩцәа Асҭамыр Ҭаниеи Рауль Ҳагбеи Гәдоуҭа араион аҩныҵҟатәи аусқәа Русбарҭа  Автоҳәынҭинспекциа ахатәы еилазаара алархәны анҭыҵтәи аусуратә еилатәара мҩаԥыргеит, ҳәа адырра ҟанаҵоит атәыла аҩныҵҟатәи аусқәа Рминистрра аофициалтә саит.

2023 шықәсазы Гәдоуҭа араион аҿы зегьы реиҳа аԥстәбара зцу амҩатә машәыртә хҭысқәа ҟалеит. Урҭ ирыхҟьаны 25-ҩык  ҭахеит.

Автоҳәынҭинспекциа Аусбарҭа аҿы ари агәҭынчымра узцәрызго астатистика амзысқәа жәпакы ирыдҳәалоуп ҳәа ирыԥхьаӡоит. Ахәҭакахьала, уахь иаҵанакуеит Автоҳәынҭинспекциа аусзуҩцәа рганахьала аҭыԥ змоу агхақәагьы уахь иаҵанакуеит. Гәдоуҭа араион аҩныҵҟатәи аусқәа Русбарҭа  Автоҳәынҭинспекциа ахатәы еилазаара амҩақәа рҿы ашәарҭадара ашьақәыргылара азы ганрацәала аусура арӷәӷәара азы ахыдҵақәа рзықәыргылоуп.

Аҟәа. Ажьырныҳәамза 9, 2024 шықәса. Аԥсныпресс. Изакәанымкәа анаркотикатә маҭәашьарқәа рыдгалара азы ахара рыдҵоуп хҩык Аԥсны ауааԥсыра.  

Аоператив-ԥшааратә усмҩаԥгатәқәа рымҩаԥгараан аҳҭнықалақь аҩныҵҟатәи аусқәа Русбарҭа ашьаусԥшааратә ҟәша аусзуҩцәа дааныркылеит 2000 шықәсазы ииз Сыҷынаа Алиас Феликс-иԥа. Абри атәы аанацҳауеит ареспублика аҩныҵҟатәи аусқәа Рминистрра апресс-маҵзура.

Сыҷынаа Алиас имхыз амедицинатә шприц иҭаз агәырлаҵаратә еилаҭәа, имҩаԥгаз аекспертиза инақәыршәаны, «метадон» ҳәа изышьҭоу анаркотикатә маҭәашьар ауп.  Анаҩс аҭира хықәкыс иҟамҵаӡакәа изакәанымкәа анаркотикатә маҭәашьар аахәареи адгалареи аиагареи рзы, Сыҷынаа Алиас Феликс-иԥа иганахьала ашьаусеилыргара хацыркуп. Сыҷынаа Алиас ахьырхәра аҳасабала аҭыԥ дшахымҵуа азы ашәҟәы инапы аҵарҩуп.

Гагра ақалақь аҿы Араион аҩныҵҟатәи аусқәа Русбарҭа ашьаусԥшаара аҟәша аусзуҩцәа Гәылрыԥшь араион аҿы инхо,  1983 шықәсазы ииз Каарес Роберт Виктор-иԥа анаркотикатә маҭәашьар идырбалеит.

Роберт Каарес идырбалеит амедицинатә шприцқәа ҩба ирҭаз, «мефедрон» ҳәа изышьҭоу  анаркотикатә маҭәашьар.

Анаҩс аҭира хықәкыс иҟамҵаӡакәа изакәанымкәа анаркотикатә маҭәашьар аахәареи адгалареи аиагареи рзы Роберт Каарес иганахьала ашьаусеилыргара хацыркуп.  Уи аҭыԥ дшахымҵуа азы ашәҟәы инапы аҵарҩуп.