Аҟәа. Абҵарамза 19, 2024 шықәса. Аԥсныпресс. Ставрополи Черкесски ақалақьқәа рҿы Ареспублика Аԥсны ашәҟәыҩҩцәеи ажурналистцәеи Реидгыларақәа рлахәыла, Аԥснытәи аҳәынҭқарратә Университет апрофессор Екатерина Бебиа иаԥылҵаз аҭоурых-документалтә фильм «Ҳабацәа рабацәа рыдгьыл аҟынӡа ихароу амҩа» («Долгая дорога к земле предков») аӡыргара мҩаԥгахоит.
Афильм Нхыҵ Кавказ еицырдыруа ауаажәларратә усзуҩ, арегионалтә уаажәларратә еиҿкаара — Ставропольтәи атәылаҿацә абаза жәлар рмилаҭ-культуратә автономиа «Абаза» анапхгаҩы, Адунеизегьтәи аԥсуа-база жәлар Рконгресс алахәыла Армида Хизир-иԥҳа Псҳәы-Чагова илыхҳәаауп.
Афильм асиужеттә цәаҳәа хаданы иҟоуп — Армида Псҳәы-Чагова Аԥснытәи ашьхақәа рҿы иҭаҵәаху џьанаҭ дгьыл ҳәа изышьҭоу, Аҟәа араион, ашьха иаԥну Ԥсҳәы ақыҭан иҟоу лара дызхылҵыз рыԥсадгьыл аҭааразы лгәазыҳәара аҟалара аҭоурых. Лара лхы лдыруа дҟалеижьҭеи ари зынаӡара уадаҩу аҭыԥ аҭаара гәазыҳәараны илыман. Афильм афырхаҵа илыцны ахәаԥшыҩ ари иуадаҩу амҩа данысуеит, иблалагьы ибоит Ԥсҳәы ақыҭа уажәтәи ауааԥсыра рыбзазашьеи рҵасқәеи ртәы. Аҭыԥантәи ауааԥсыра рыҿцәажәарала ахәаԥшыҩ ақыҭа аҭоурых, амҳаџьырра, аибашьрақәа, ахҵәара, уҳәа егьырҭ аԥышәарақәа жәпакы зхызгаз ауаа ирлахьынҵахаз ртәы еиликаауеит. Автор иааирԥшуеит урҭ рмилаҭтә культура, рытрадициақәа, зегьы ирыцку рыԥсадгьыл ахь абзиабара мырӡкәа иахьа уажәраанӡа ишааргаз атәы.
Афильм иара убас аанкьа зны араҟа инхоз, ашьхарантәи илбааны анаҩс аул Старо-Кувинск инхаз рҭоурых аанарԥшуеит. Афильм «Ҳабацәа рабацәа рыдгьыл аҟынӡа ихароу амҩа» («Долгая дорога к земле предков») реалла имҩаԥысыз ахҭысқәеи аперсонажқәеи рыла ишьаҭаркуп; араҟа иҟаӡам иқәыргылоу акадрқәа.
Афильм аԥҵаҩы Екатерина Бебиа арежиссиор, аоператор, атекст автор, амҩаԥгаҩ, амонтажҟаҵаҩы, абжьыоператор, иара убас амузыкатә еиқәыршәаҩы раҳасабала дықәгылоит. Уи лзы ари арҿиаратә усураҿы иҿыцу хырхарҭаны иҟаӡам: лара ҩ-нызықь инареиҳаны адокументалтә фильмқәеи ателеочеркқәеи дравторуп. Лара Аԥснытәи ателехәаԥшра аҿы ҩынҩажәа шықәса аус лухьеит.
Ставрополь ақалақь аҿы афильм аӡыргара мҩаԥысуеит абҵарамза 21 рзы аныҳәақәа Рыҩны «Парнас Палазо» аҿы (Ленин имҩа, 251). Аусмҩаԥгатә алагоит асааҭ 16:00 рзы.
Аҩбатәи аӡыргара мҩаԥгахоит абҵарамза 22, 2024 шықәса рзы Ҟарачы-Черкесстәи Ареспублика, ақалақь Черкесск, А.А. Дауров ихьӡ зху Ҟарачы-Черкесстәи акультуреи аҟазареи рколеџь аҿы (Ленин имҩа, 8). Аусмҩаԥгатә алагоит асааҭ 12:30 рзы.
