Москватәи аҳәынҭқарратә Университет аректор, ауниверситетқәа Евразиатәи рассоциациа апрезидент, иара убас Урыстәыла аректорцәа Реидгыла апрезидент иаҳасабала Шәара есымша Аԥснытәи аҳәынҭқарратә Университет шәацхраауан, иахьа уажәраанӡагьы ӷәӷәала  адгылара ашәҭоит. Шәара шәыбзоурала ААУ иаартуп М. В. Ломоносов ихьӡ зху Москватәи аҳәынҭқарратә Университет анаукеи аҵарадырреи Рцентр. ААУ анапхгараҭареи аколлективи Аԥсны жәлар зегьы гәык-ԥсыкала иҭабуп ҳәа шәарҳәоит арҭ хра злоу аусқәа рзы», – ҳәа иаҳәоит Алеко Гәарамиа иҟаиҵаз адынҳәалара аҿы.

В. А. Садовничи – Ареспублика Аԥсны ҳаҭыр зқәу атәылауаҩ иоуп. Иара Аԥснытәи аҳәынҭқарратә Университет ҳаҭыр зқу адоктор, ҳаҭыр зқу апрофессор ҳәа ахьӡ ианашьоуп. Аԥсны ахадарагьы иазгәарҭеит апрофессор иеихьӡарақәа, иагьианаршьеит «Ахьӡ-Аԥша» аорден I аҩаӡара, иара убас анаукатә усура аҿы иааԥсара азы,  Ареспублика Аԥсны иреиҳаӡоу аҵарадырра аҿиара аҿы илагала ду, ззанааҭтә дырра аҩаӡара ҳараку акадрқәа реиҵааӡара  азы Аԥсны аҭҵаарадырра зҽаԥсазтәыз аусзуҩы ҳәа ахьӡ ихырҵеит.

Москватәи аҳәынҭқарратә Университет – 1992-1993шш. Аџьынџьтәылатәи еибашьра ашьҭахь Аԥснытәи аҳәынҭқарратә Университет аусеицуразы аиқәшаҳаҭра зыбжьазҵаз раԥхьатәи ҵараиурҭаны иҟоуп.

Москватәи аҳәынҭқарратә университет аректор Виктор Антон-иԥа Садовничи аҵарааӡара аҳәаақәа рҿы мацара акәымкәа, аҳәынҭқарратә ҩаӡараҿгьы еснагь аҩызара ааирԥшуан. Уи зырҵабыргуа фактуп 1992-1993 шш. Аԥсны Аџьынџьтәылатә еибашьра алагамҭазы Виктор Антон-иԥа хантәаҩра ззиуаз Евразиатәи ауниверситетқәа Рассоциациа апрезидиум еизганы ақырҭуа қәылаҩцәа иахьрықәыӡбаз, Борис Ельцин иахь аколлективтә шәҟәы ахьырышьҭыз. Уи адагьы аибашьра анцоз Садовничи иҟаиҵеит кыр зҵазкуаз даҽа ҩызаратә цхырааракгьы. Ишаҳдыруа еиԥш ашьаарҵәыратә шықәсқәа рзы аԥсуа хҵәацәа маҷҩымкәа Нхыҵ Кавкази Урыстәылеи еиуеиԥшым аҿацәқәа рахь иԥсаҟьан. Виктор Антон-иԥа ибзоурала Урыстәыла аҳҭнықалақь аҟны иҟаз 87-ҩык астуденттә қәра иаҵанакуаз аҿар Москватәи аҳәынҭқарратә университет иахыԥхьаӡалахеит, азыӡырҩцәақәак раҳасабала. Иара убас Аԥснынтәи иҟаз 16 - ҩык арҵаҩцәа ауниверситет аҟны аус руратәы, азеиԥшнхарҭаҿгьы ауадақәа роуратә дырхылаԥшит. Абҵарамза, 1993 шықәсазы Виктор Антон-иԥа Садовничи ибзоураны  ААУ  Евразиатәи ауниверситетқәа Рассоциациа ахь ирыдыркылеит.