Аҟәа. Абҵарамза 18, 2024 шықәса. Аԥсныпресс. Имҩаԥысит Аҳәынҭқарра Ахада Аслан Бжьаниеи гәыԥҩык Апарламент адепутатцәеи реиԥылара.
Иалацәажәеит атәылаҿы ишьақәгылаз аполитикатә ҭагылазаашьа. Асааҭ 18:00 иахымгакәа аделегациақәа шьақәыргыланы атәыла анапхгареи аоппозициеи реиҿцәажәарақәа ирылагарц азы аӡбамҭа рыдыркылеит.
Аоппозициа ахаҭарнакцәа анапхгаратә хыбрақәа ркомплекс аҿаԥхьа игылоу ауаа ирырҭаз адырра ала, Жәлар Реизара-Апарламент аҿы имҩаԥысыз аилатәара аихшьаалақәа рыла, ԥшьҩык адепутатцәа Аҳәынҭқарра Ахада Аслан Бжьаниа иахь рышьҭра азы аӡбамҭа рыдыркылеит.
Аоппозициа абжьаҟазацәа рыда аоппозициа ахадацәеи Аҳәынҭқарра Ахада Ихаҭыԥуаҩ Бадра Гәынбеи реиԥылара аиҿкааразы ажәалагала ҟанаҵеит.
Аоппозициа ахаҭарнакцәа ақәшаҳаҭуп Бадра Гәынба Аҳәынҭқарра Ахада инапынҵақәа наигӡаларц, аха урҭ, аилибамкаареи ииашамкәа аинтерпретациеи ҟамларц азы хаҭала иара далархәны излацәажәатәу аҭагылазаашьа аҭышәынтәалара инамаданы дҵақәаки жәалагалақәаки рымоуп.
