Аҟәа. Жәабранмза 22, 2024 шықәса. Аԥсныпресс.  Баҭал Аиба  Апарламент аҿы Аҳәынҭқарра Ахада ихаҭарнакыс дҟаҵоуп.

«Аԥсны Жәлар Реизара-Апарламент аҿы Аҳәынҭқарра Ахада Азинмчы змоу ихаҭанакыс дҟаҵазааит Аиба Баҭал Едуард-иԥа», -ҳәа иаҳәоит жәабранмза 21, 2024 шықәсазы знапаҵыҩра мҩаԥгаз Аусԥҟа атекст аҿы.

Аҟәа. Жәабранмза 22, 2024 шықәса. Аԥсныпресс.  Атәыла Аминистрцәа Реилазаара «Ауааԥсыа ргәабзиара иаԥырхагахар зылшо аалыҵ Аԥсныҟа аагареи аҭиреи рганахьала ақәиҭымтәра алагалара азы» Ақәҵара рыдыркылеит.

Ари ақәыиҭымтәра иаҵанакуеит ауаҩы игәабзиара иаԥырхагахар зылшо ҳәа иԥхьаӡахаз Зҭакԥхықәра Ҳәаақәҵоу Аилазаара «Чемпион» (ИНН: 3123375083, ОГРН: 1153123016837, Урыстәылатәи Афедерациа, Белгородтәи аобласть, ақалақь Белгород) иҭнажьуа ахәшарҭәа «Белорусское луговое».

Аҳәынҭстандарт, ареспубликатә Санитар-епидемиологиатә Станциа, иара убас Аҟәа ақалақьи араионқәеи рхадарақәа рҿы иҟоу Асанитар-епидемиологиатә Станциақәеи азԥхьанҵа рыҭоуп русдырра аҳәаақәа ирҭагӡаны абарҭ ауснагӡатәқәа рымҩаԥгара азы:

- ахәшарҭәа «Белорусское луговое» зҭиуа хазхаҭалатәи анаплакыҩцәеи аиуристтә хаҿқәеи иарбоу аалыҵ аҭира аанкылареи шьҭахьҟа аргьежьреи рзы азхьанҵа рыҭара;

-  иарбоу аалыҵ  алхра;

- иарбоу ахәшарҭәа ала ахәаахәҭра аарԥшреи аԥхьырҟәҟәаареи рзы анаҩстәи апрофилактикатә усмҩаԥгатәқәа  рымҩаԥгара.

Аҳәынҭқарратә ҳазалхратә Еилакы ахәшарҭәа «Белорусское луговое» атәылаҟа аагареи аҭиреи рзы иалагалоу ақәиҭымзаара анагӡара ахылаԥшра аҭара азы  адҵа аҭоуп.

Аҟәа. Жәабрамза 21, 2024 шықәса. Аԥсныпресс. Жәабранмза 21 – аԥсуа литература ашьаҭаркҩы Дырмит Гәлиа (21.02.1874 – 07.04.1960 шш.) иира Амш ауп.

Иахьа, Аҟәа ақалақь, Р.Гәымба ихьӡ зху Аԥснытәи аҳәынҭқарратә филармониа асквер аҿы ашәҟәыҩҩы иҳаҭгәын аҿаԥхьа ашәҭ шьыҵәрақәа рышьҭаҵара ацеремониа мҩаԥысит.  

Дырмит Гәлиа дыргәаладыршәарц арахь иааит Аҳәынҭқарра  Ахада Аслан Бжьаниа, Аҳәынҭқарра Ахада Ихаҭыԥуаҩ Бадра Гәынба, Жәлар Реизара-Апарламент Аиҳабы Лаша Ашәба, Аҳәынҭқарра Ахада Иусбарҭа анапхгаҩы Абесалом Кәарҷиа, Апарламент адепутатцәа, атәыла Анапхгара алахәылацәа, аԥсуа поетцәеи апрозаикцәеи, арҿиаратәии анаукатәи аинтеллигенциа ахаҭарнакцәа, ауаажәларра.

*** *** Аԥсуа литература ашьаҭаркҩы, Аԥсны Жәлар рпоет, арккаҩы, аҵарауаҩ, абызшәадырҩы Дырмит Гәлиа диит жәабран 21, 1874 шықәсазы анхаҩы Урыс Гәлиа (Урыс — Дырмит иаб Иасыф аҩнытәи ихьӡ акәын — аред.) иҭаацәараҿы, Гәылрыԥшь араион, Уарча ақыҭан. Дырмит Гәлиа ихаҭа абас игәалаиршәон урҭ ахҭысқәа: «Маан зыжәлаз ҭауадк ҳгәараҿы иманы дааит аҭырқәа аскерцәа — асолдатцәа. «Абарҭ ықәҵып ҳәа ргәы иҭаӡам», - иҳәеит. Аскерцәа ҳаҩны амца нацраҵаны ирыблит, ҳара амшын агаҿахь, аҭырқәа ӷба ахьыхгылаз ҳрыманы идәықәлеит. Сара усҟан ԥшьышықәса схыҵуан. Снапаҿы искын ахәмарга-флыка, егьи снапала санду Фындық лнапы скын».

Анаҩс, арҭ ахҭысқәа ипоема «Сара схәышҭаара» аҿы дрыхцәажәоит.

Ҭырқәтәылаҟа амҩа иахьынӡақәыз Гәлиа иҭаацәара изныкымкәа аԥсра ахықә иқәгылахьан, аха егьа уадаҩра шырхыргазгьы, Трапезунд аҟәара инхықәгылеит. Ухаҿы иузаамго, иуадаҩыз аҭагылазаашьа иақәшәеит аҭаацәара: фатәы-жәтәы рымамызт усгьы, рхы ахьныҵаркышаз хыбрагьы ыҟамызт. Ирыцхраауан  аҭырқәа ԥсыӡкыҩцәа ӷарқәеи, дара раԥхьа арахь иқәнагалахьаз аԥсуааи. Дырмит иаб Ҭырқәтәыла дыҟанаҵ Аԥсныҟа ахынҳәра дазгәышьуан, уи игәҭакы дацәхьаҵуамызт зынӡаскгьы. Убас, аԥсыӡкыҩцәа рнышь хәыҷы иақәтәаны ишынҭаацәаз зегьы мшынла Рыԥсадьгыл ахь идәықәлеит. Аԥхьа Баҭымынӡа инаӡеит. Араҟа, амҩа иацыз ауадаҩрақәа рызхымгакәа иԥсуеит Дырмит иашьеи иаҳәшьеи еиҵбацәа. Аха шьҭахьҟа мҩа ыҟамызт, рымҩа иацырҵеит. Аурысцәеи аҭырқәцәеи рыӷбақәа Гәлиаа рнышь аихсра ишаҿызгьы, аҭаацәара Аԥсны аҟәаранӡа инаӡеит, Рыԥсадгьыл ршьапы ықәдыргылеит.

Урыс Гәлиа азин ирымҭеит иқыҭа гәакьаҿ анхара, убри аҟнытә Кәыдры аӡиас-нырцә —Аӡҩыбжьа ақыҭа нхарҭа ҭыԥс иалихуеит. Гәлиа шықәсқәак аҵара иҵон аҭыԥантәи апап иҟны, уи ашьҭахь дҭалоит Аҟәатәи Ашьхарыуаа рышкол, ҷыдала аԥсуа хәыҷқәа рзы 1963 шықәсазы иаадыртыз. Амала, уи иаразнак даанамхәеит, избан акәзар еиҳарак ашкол аҟны ирыдыркылоз ҭауади аамысҭеи рхәыҷқәа ракәын. Аха Дырмит иаб ари аус иҽадицалеит: иҷкәын ашкол иҭаҵаразы хышықәса инеиԥынкыланы ашәҟәқәа алаиҵон.

Аҟыбаҩ бзиа злаз аҵаҩы иаразнак илаԥш дыҵашәеит арҵаҩы Давид Аџьамов, анаҩс Дырмит дгәеиҭеит ашкол ахылаԥшҩы Константин Маҷавариани. Арҭ аҩыџьа имаҷымкәа аџьабаа рбеит Дырмит хәыҷы иажәақәа рыла ажәлар рлакәқәа ақьаад ахь риагаразы, анаҩс урҭ кьыԥхьын «Кавказ аҭыԥқәеи, урҭ ирықәынхо ажәларқәеи ирызку аматериалқәа» ҳәа хьӡыс измаз аизга аҟны.

Константин Маҷавариани иқәыԥшыз Дырмит иԥсҭазаараҿы инаигӡоз ароль даара акраҵанкуан. Иара иоуп раԥхьаӡа акәны Дырмит иизырбаз аԥсуа алфавитқәа: абызшәадырыҩ ду Пиотр Услар еиқәиршәази, иара убасгьы Бартоломеи ианбаншәҟәи. Маҷавариани иоуп Гәлиа иазҳәаз Аԥсны аҭоурых аҭҵаара иашалагатәу, иҟоу адыррақәа егьа имаҷзыргьы, ари аус шхацырктәу. Иҟалап, убасҟан акәзар Дырмит Гәлиа раԥхьаӡатәи Аԥсны аҭоурых ашәҟәы аҩразы агәҭакы анизцәырҵ. Аамҭак ашьҭахь уи аидеиа аԥсҭазаара аиуит, иара ииҩыз «Аԥсны аҭоурых» ҭыҵуеит 1925 шықәсазы.

1889 шықәсазы, 15 шықәса зхыҵуаз Дырмит Гәлиа дҭалоит Гори иҟаз Кавказнхыҵтәи арҵаҩратә семинариа. «Араҟа сара аҵара сҵон ԥшьымз, аха исыхьыз аршра (атиф) иахҟьаны асеминариа сыҭцан. Асеминариа анапхгара иҟанаҵаз адҵаҿы ианырҵеит «асеминариа аҵаҩы Дырмит Гәлиа аҭыԥантәи аҳауа, ҳәарада, инаалом» ҳәа. Абри ала сышколтә ҵара хыркәшан, анаҩс рҵаҩцәас исзыҟалеит ашәҟәқәеи аԥсҭазаареи», — хәа иҩуеит иара иавтобиографиаҿы.

Аԥсны игәараз ачымазара бааԥсы «испанка» иахҟьаны иани, иаби, иандуи аниԥха ашьҭахь, Дырмит аҩны, анхамҩа аныҟәгара иадҳәалаз аџьабаа зегьы ихәда иқәҳаит, аха раԥхьаӡа иргыланы, еиҳабык иаҳасабала иара иуалын иашьеи иаҳәшьеи рааӡара. Игәы камыжькәа еиҵбацәа иааӡеит, ршьапы иқәиргылт. 17 шықәса анихыҵуаз, уи екстерн ҳасабла аԥышәарақәа иҭиуеит, иагьихырҵоит жәлар рырҵаҩы ҳәа ахьӡ. Убри инаркны иалагоит Дырмит Гәлиа иуаажәларратә, ирҵаҩра-рҿиаратә усура ду. 

Дырмит Гәлиа  акыр шықәса рҵаҩыс аус иуан еиуеиԥшым ақыҭа школқәа рыҟны. Нас Очамчыреи Аҟәеи ақалақьқәа рҿы ҭырџьманс дыҟан. Дырмит Гәлиа Ашьхарыуаа рышкрл, аҳәса ргимназиа, арҵаҩратә семинариа, уҳәа Аҟәа ақалақь аҿы иҟаз аҵараиурҭақәа жәпакы рҿы аус иуан, ахәыҷқәа аԥсшәа дирҵон.  Арҭ ашықәсқәа раан, иналаршә-ааларшәны акәзаргьы, напы аиркит ажәеинраалақәа рыҩра. Иара ақыҭақәа дрылаланы еимидон, иҵон ижәлар рбызшәа, рыбзазашьа, рқьыбзқәа, рҵасқәа.

1890 шықәсазы, аԥсуа бызшәа ззымдыруаз, аха аметодика аганахьала Дырмит ацхыраара изҭоз Константин Маҷавариани иаԥшьгарала, Гәлиа напы аиркуеит аԥсуа нбаншәҟәы аиқәыршәара. Аха уи азы, акириллицала иаԥҵаз Услари Барҭоломеи ралфавитқәа реиӷьтәразы имаҷымкәа аус рыдулатәын. Ус шакәызгьы, 1892 шықәсазы аԥсуа хәыҷқәа ироуит рхатәы бызшәала  аҵараҵаразы алшара. Убас, 17 шықәса зхыҵуаз Аӡҩыбжьатәи арԥыс Дырмит Гәлиа аԥсуа кульутра аҿиара аус аҿы хәы змаӡам алагала ҟаиҵеит.

Аҟәа. Жәабранмза 21, 2024 шықәса. Аԥсныпресс. Аԥсны аиустициа аминистр Анри Барцыц Аҳәынҭқарра Ахада иҿы 2023 шықәса рзы Аԥсны Аҳәынҭқарра аиустициа Аминистрра аусура азы аҳасабырба ҟаиҵеит.

«Иҳаҩсыз ашықәс алҵшәа бзиа аман. Аус рыдаҳулеит аиҿкаара-хылаԥшратә докәментқәа, урҭ зегьы аиустициа Аминистрра аусура аиӷьтәра иазкын, иара убас аппаратқәа рыҟәшақәеи, аструктуратә напхгарақәеи, анапаҵаҟа иҟоу аиҿкаарақәеи русеицзура аимадара ацхыраара анаҭон»,- ҳәа иҳәеит Анри Барцыц.

Аминистр иажәақәа рыла, 2023 ш. рзы аӡбаратә уснагӡатәқәа рмаҵзурақәа русура ахаҭабзиара аиӷьтәразы аусурақәа ирыцҵан.

Анри Барцыц иазгәеиҭеит, хазхаҭалатәи анаплакҩцәа рхыԥхьаӡара ишацлаз. Аҳасабырба аамҭазы ашәҟәы иҭагалан 580 аиуристтә хаҿқәа (510 - 2022 ш.) 1291 хаҿы (1251 - 2022 ш.).

2023 шықәса рзы Аԥсны ашәҟәы иҭагалан амассатә информациатә хархәагақәа 2, урҭ рахьтә акы - аинтернет саит, иара убас ажурнал, адырраҭаразы алицензиақәа 3 рыҭан.

Аҳәынҭқарра Ахада аҳәара ҟаиҵеит инарҭбааны еиҭеиҳәарц аусбарҭаҟны иалагалоу аҿыцрақәеи, урҭ рылҵшәеи ртәы. Ахәҭакахьала, уи зызкыз Аҟәа ақалақь анотариалтә конторақәа рҟны ишьақәыргылаз атерминалқәа роуп, аҳәынҭқарратә ҳазалхратә баџь ашәаразы. «Аԥсны абанкқәа руак аппаратқәа рышьақәыргылараҟны иҳацхрааит, атәылауаа анотариалтә усқәа рымҩаԥгараҟны акырӡа ацхыраара рызҭоз. Аха, ашәарҭара цәырҵит ахаҭара шьақәзыргыло ахьӡқәа рцәыӡра аус инамаданы, апрограмматә еиқәыршәара ахьынагӡам азы. Ари азҵаара аӡбаразы амҩақәа рыԥшаара ҳаҿуп», - ҳәа иҳәеит аиустициа аминистр.

Аҟәа. Жәабранмза 20, 2024 шықәса. Аԥсныпресс. Аԥсны Аҳәынҭқарра Ахада Иусбарҭаҟны имҩаԥысит Аҳәынҭқарра Ахада Аслан Бжьаниеи Ауаажәларратә Палата ахаҭарнакцәеи злахәыз аиԥылара, ҳәа адырра ҟанаҵоит Ауаажәларратә Палата апресс-маҵзура.

Аиԥылараҟны «Икоммерциатәым аиҿкаарақәеи аҳәаанырцәтәи агент ихықәкы назыгӡо хазхаҭалатәи ахаҿқәеи» ирызку Аԥсны Аҳәынҭқарра Азакәан апроект алацәажәара  зҵаара хадас иқәгылан.

Аиԥылара аконструктивтә ҟазшьа  аҭаны имҩаԥысит, уи алахәылацәа азакәан иахьыԥшны ргәаанагарақәа еибырҳәеит.

Зыӡбахә ҳәоу азакәан апроект ахықәки, Аԥсны Аҳәынҭқарра Аконституциа афундаменталтә нормақәеи инарықәыршәаны, Ауаажәларратә Палата алахәылацәа рызҵаарақәа рҭакқәа ҟарҵеит Ашәарҭадаратә Хеилак амаӡаныҟәгаҩ Сергеи Шамба, Аиустициа аминистр Анри Барцыц, Аҳәаанырцәтәи аусқәа рминистр Инал Арӡынба, Аҳәынҭқарратә Шәарҭадаратә Маҵзура ахантәаҩы Ҭемыр Ахьиба.

Аҟәа. Жәабранмза 19, 2024 шықәса. Аԥсныпресс. Асоциалтә ҳақәа рҿы аҵыхәтәантәи аамҭазы абаҟәа ҳәа изышьҭоу амшынтә ԥсаатә хыԥхьаӡара рацәала рҭахара акәша-мыкәша ӷәӷәала ацәажәарақәа цоит.  Аӡы иху арҭ аԥсаатәқәа рҭахара зыхҟьаз атәы Аԥсныпресс акоррепондент диҿцәажәо иҳәеит аекологиа Аинститут адиректор Роман Дбар.

Иҷыдоу аклиматтә ҭагылазаашьақәа

Аеколог иажәақәа рыла, абаҟәа ҳәа изышьҭоу аӡы иху, ӡааҟәрыла ҟаҵо аԥсыӡ зфо  аԥсаатә ауп.  Аԥсныҟа уи аӡынра ахгаразы иаауеит.

«Ҳара ҳамшын аԥшаҳәа иахьаҵанакуа иубар алшоит шә-нызықь инарзынаԥшуа аԥсаатә. Урҭ араҟа иҟоу иҷыдоу аклиматтәи аекологиатәи аҭагылазаашьақәа инарымаданы араҟа аӡынра рхыргоит.  Аӡынразы ҳара ҳӡымҽхак  ахь аҳауа аԥхарра ахьыҳараку иахҟьаны емиграциа ҳасабла иаауеит ирацәаны аԥсыӡ, раԥхьа иргыланы акамшьиа. Уи аԥсаатә аднаԥхьалоит, Аԥсны ихадоу арнитологиатә ҵакыраны иҟанаҵоит», - ҳәа еиҭеиҳәеит иара. Уи иара убас иациҵеит ареспублика иалсны евразиатә аконтитент аҿы иреиҳау аемиграциатә мҩа шцо.  

Аҟәа. Жәабранмза 20, 2024 шықәса. Аԥсныпресс. Аҩныҵҟатәи аусқәа рминистр Роберт Киут хаҭала ихылаԥшрала ареидтә профилактикатә усмҩаԥгатәқәа жәабанмза 19 рзы Аҟәа ақалақь аҿы имҩаԥысит, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.

Автоҳәынҭинспекциеи аҩныҵҟатәи аусқәа Рминистрра аоперативтә ҟәшеиҵақәеи русзуҩцәа ареспублиа зегьы иахьаҵанакуа аред мҩаԥыргеит, аиҳаак ахшыҩзышьҭара аҭан аҳҭнықалақь Аҟәа.

Автоҳәынҭинспекциа ахылаԥшра азҭо аминистр ихаҭыԥуаҩ Беслан Ҷкадуа ахатәы еилазаара аиҳарак  ижәны амашьына аԥсҟы зку амашьынарныҟәцаҩцәа раанкылара  алдыршаларц азы адҵа риҭеит. Аҩныҵҟатәи аусқәа Рминистрра анапхгараҭара ижәны, мамзагьы арҩшьыгатә маҭәашьар зыдкыланы амашьына аԥсҟы зку раарԥшреи раанкылареи ҷыдала ахшыҩзышьра аҭара азы адҵа ықәнаргылеит.  Ареид амҩаԥгараан жабранмза 19 рзы иаарԥшхеит 20 инарзынаԥшуа  зсаркьақәа рыԥшшәыхәыркра анормақәа еилагаз автотранспорттә хархәагақәа, урҭ зтәыз автомашьынарныҟәцаҩцәа зегьы ахараԥса дыршәахоит, аилагара аҭыԥаны иаԥыхуп.

Аҟәа. Жабранмза 20, 2024 шықәса. Аԥсныпресс.  Хәажәкырамза 17 рзы Аԥсны имҩаԥгахоит Урыстәылатәи Афедерациа Ахада иалхрақәа.  Алхрақәа рхы аладырхәырц рылшоит Ареспублика Аԥсны иааиԥмырҟьаӡакәа, мамзаргьы аамҭала инхо Урыстәыла атәылауаҩра змоу зегьы. Абри азы адырра ҟанаҵоит Аԥсны иҟоу Урыстәыла Ацҳаражәҳәарҭа апресс-маҵзура.

Алхратә биуллетень аиура азы Урыстәыла атылауаҩ итәылауаҩшәҟәы (аҩныҵҟатәи, мамзаргьы аҳәаанырцәтәи) имазар ахәҭоуп.

Алхырҭатә ҭыԥқәа аартхоит асааҭ 8:00  инаркны 20:00 рҟынӡа абарҭ аҭыӡҭыԥқәа рыла:

Аҟәа

Картозиа имҩа, аҩны № 7, абжьаратәи ашкол №5 (алхырҭатә ҭыԥхада № 8002);

Ешба имҩа, аҩны №164, Аԥсны аҳәынҭқарратә миграциатә Маҵзура ахыбра (алхырҭатә ҭыԥхада № 8422);

Ӡиӡариа имҩа №56, Амедицинатә коллеџь ахыбра (алхырҭатә ҭыԥхада № 8424);

Аршба имҩа, аҩны № 56, Аҟәатәи аҳәынҭқаратә коллеџь ахыбра (алхырҭатә ҭыԥхада № 8430);

Лакоба имҩа, аҩны № 111, Амилаҭтә библиотека ахыбра (алхырҭатә ҭыԥхада № 8001);

Аиааира апроспект, аҩны № 33, абжьаратәи ашкол № 10 ахыбра (алхырҭатә ҭыԥхада №8000);

Акьыртаа имҩа, аҩны №32, абжьаратәи ашкол №14 (алхырҭатә ҭыԥхада № 8003).

 Гагра араион

Ақалақь Гагра, Арӡынба имҩа, аҩны №84, акультура Аҩны ахыбра (алхырҭатә ҭыԥхада №8005);

Ақалақь Гагра, Абазгаа рымҩа, аҩны №55/3, Агуманитар-ааглыхратә техникум ахыбра (алхырҭатә ҭыԥхада № 8431);

Цандрыԥшь аҳабла, Ленин имҩа, аҩны № 8, абжьаратәи ашкол №1 ахыбра (алхырҭатә ҭыԥхада № 8004);

Ақалақь Пицунда, ақалақь Ахадара ахыбра  (алхырҭатә ҭыԥхада № 8006);

Бзыԥҭа аҳабла, Ешба имҩа, аҩны № 47а, ақыҭа Ахадара ахыбра (алхратә ҭыԥхада № 8007).

Аҟәа. Жәабранмза 20, 2024 шықәса. Аԥсныпресс.  Зыԥшра ҟамҵакәа Бедиатәи аиашахаҵаратә уахәама аҿы имҩаԥысуа аиҭашьақәыргыларатә усурақәеи, иара убас иргылахараны иҟоу Амилаҭтә сахьатә галереиа ахыбра аескизтә проект ашьақәырӷәӷәара иадҳәалоу азҵаарақәеи ирылацәажәеит аҩаша, жәабранмза 20 рзы атәыла аԥыза-министр Алеқандр Анқәаб имҩаԥигаз аусуатә еилатәара.

Аилатәара рхы аладырхәит акультура аминистр инапынҵақәа назыгӡо Динара Смыр, аҭоурых-культуратә ҭынха ахьчаразы аҳәынҭқарратә Усбарҭа аиҳабы Гари Сангәлиа, Амилаҭтә сахьатә галереиа адиректор Сурам Сақаниа, Ареспубликатә Унитартә Наплакы «Аԥсныргылара» адиректор Хада Руслан Тәанба, Аҟәа ақалақь архитектор хада Давид Ешба, аргылара-нардкыларатә еиҿкаара анапхгаҩы Русҭам Цәеиба.

Аминистрцәа Реилазаара апресс-маҵзура иҟанаҵо адыррақәа рыла, аилатәара иалахәыз Бедиатәи аныхабаа аҟәырӷ аиҭашьақәыргылара иадҳәалоу азҵаарақәа ирылацәажәеит. Аҳәынҭқарратә Усбарҭа анапхгаҩы Гарри Сангәылиа иҟаиҵаз адыррақәа рыла, урыстәылатәи аспециалистцәа аныхабаа ахыб зку аиужьратә конструкциа аиҭакразы аԥсуа ган зыдгалара мҩаԥнагаз авариантқәа рганахьала  ргәаанагарақәа рҳәеит. Урҭ иҿыцу, технологиала иуадаҩу, идуу ахаҳәтә ҟәырӷ ашьақәыргылара, иара акульттә обиект ахаҭа иахьатәи аҭагылазаашьа ҳасаб азуны уахәаԥшуазар, инегативтәу ахҟьаԥҟьақәа азцәырнагар алшоит ҳәа иазгәарҭоит.

Аҟәа. Жәабранмза 20, 2024 шықәса. Аԥсныпресс. Гәдоуҭа араион ажәытә ӡымҩангага аҿы аиҭашьақәыргыларатә усурақәа хыркәшахеит.  Ари аӡымҩангага иҟалаз адгьылҳәазара иахҟьаны ҭыԥқәак рҿы ихжәеит.

Иҟалаз аиԥҟьара иахҟьаны жәамш инареиҳаны ӡрыжәтәда иаанхеит Лыхны ақыҭа, аихамҩатә вокзал, Гаграа рымҩала инхо 300-ҩык инарзынаԥшуа аҭаацәа.