Аҟәа. Нанҳәамза 7, 2024 шықәса. Аԥсныпресс. Имҩаԥысит Аԥсны Ахада хантәаҩра ззиуаз Ашәарҭадара Ахеилак аилатәара
Аилатәараҟны Аҳәынҭқарра Ахада Сергеи Шамба иҭабуп ҳәа еиҳәеит имҩаԥигаз аусуразы, аихьӡарақәа изеиӷьеишьеит амаҵзура ҿыц аҟны.
Анаҩс Аслан Бжьаниа Ашәарҭадара Ахеилак аколлектив Рауль Лолуа дыдирдырит. Аҳәынҭқарра Ахада уи гәацԥыҳәарала аусура дазкны изеиӷьеишьеит ақәҿиарақәа. «Шәара ҩыџьа ахаҭыԥуаҩцәа шәымоуп: аӡәы зиндырҩуп – профессионалуп; егьи- оперативтә усуҩуп – ԥышәауаҩуп. Ихадароуп ари аус аҟны иахьатәи аҭагылазаашьаан амилаҭтә шәарҭадараҟны иҟалар зуа ашәарҭарақәа анализ рзуразы аусура амҩаԥгара, урҭ рганахьала агәҽанҵара иазку ауснагӡатәқәа разырхиара», - ҳәа иҳәеит Аҳәынҭқарра Ахада.
Рауль Лолуа Аҳәынҭқарра Ахада иҭабуп ҳәа еиҳәеит аҭакԥхықәра зцу амаҵзураҟны ииҭо агәарагаразы.
«Иҭабуп ҳәа шәасҳәоит ас еиԥш акрызҵазкуа ахырхарҭаҟны исышәҭаз агәрагаразы. Аԥсны ахаангьы имариоу аамҭақәа ыҟаӡамызт. Иахьа Аԥсни уи акәша-мыкәшеи имҩаԥысуа апроцессқәа ҳасаб рзуны зегьы ҳамчқәа еибаҳҭароуп. Ҳара амчратә усбарҭақәа аус рыцура ҳазхиоуп, иҳалшо зегьы ҟаҳҵоит ҳусура алҵшәа аманы имҩаԥысларц, ҳҳәынҭқарра ашәарҭадара аиқәырхара иазкызарц», - иҳәеит Рауль Лолуа.
Ашәарҭадара Ахеилак алахәцәа иара убас иалацәажәеит атәыла аҩныҵҟатәии адәныҟатәии аполитика иазку актуалра злоу азҵаарақәа.
