Аҟәа. Жәабранмза 20, 2024 шықәса. Аԥсныпресс.  Аҟәа ақалақь аҿы иҟоу Москватәи Акультура-усуратә Центр «Москва Аҩны» аҿы Аԥсадгьыл ахьчаҩ Имш иазку акомандаттә шахматтә турнир мҩаԥысуеит.

Атурнир зынӡа рхы аладырхәуеит 16 командак:  Аԥсны атәылахьчара Аминистрра, Аԥсны аҵара Аминистрра, Аԥсны агәабзиарахьчара Аминистрра, Аԥсны акультура Аминистрра, Аԥсны аҩныҵҟатәи аусқәа Рминистрра, Аԥсны Иҷыдоу аҭагылазаашьақәа рзы Аминистрра, Аԥсны иҟоу Урыстәылатәи Афедерациа Афедералтә шәарҭадара Амаҵзура Аҳәаахьчаратә  Усбарҭа, Аԥсны аҳәынҭқарратә ҳазалхратә Еилакы, Аԥсны аҳәынҭқарратә шәарҭадара Амаҵзура, Аԥсны апрокуратура Хада, Аԥснытәи аҳәынҭқарратә Университет, Аԥсны иҟоу урыстәыла аидгьылуаа реиҿкаарақәа Акоординациатә Еидгыла (КСОРС), Аҟәа ақалақь Ахадара, Аҟәатәи афизика-техниатә Институт, Аҟәа иҟоу Москватәи Акультуура-усуратә Центр  «Москва Аҩны», 1992-1993шш. Аԥсны жәлар Рџьынџьтәылатәи еибашьра аветеранцәа.

Раԥхьаӡа акәны ари аҩыза атурнир «Москва Аҩны» аҿы имҩаԥган 2023 шықәсазы.

Аҟәа. Жәабранмза 19, 2024 шықәса. Аԥсныпресс.  Аҳәынҭқарра Ахада Аслан Бжьаниа атәыла аҩныҵҟатәии адәныҟатәии аполитика иадҳәалоу актуалра злоу азҵаарақәа рылацәажәара иазкны аусуратә еилатәара мҩаԥигеит.

Аиԥылара иалахәын Аҳәынҭқарра Ахада Иусбарҭа анапхгаҩы Абесалом Кәарҷиа, Аҳәынҭқарра Ахада Иусбарҭа анапхгаҩы ихаҭыԥуаҩцәа, иара убас атәыла Анапхгара алахәылацәа.  

Аилатәара амшхәаԥштә зҵаара хадақәа В.Г. Арӡынба ихьӡ зху жәларбжьаратәи аҳаирбаӷәаза «Аҟәа» аиҭашьақәыргылара апрограмма анагӡара, абылтәы џьармыкьа аҿы иҟоу аҭагылазаашьа анализ аҭара, иара убас атәыла аҩныҵҟа абаҩарҵәыреи аспорти рыҿиара  иадҳәалан. 

Атәыла аенергетикеи атранспорти рминистр Џьансыхә Нанба Аҳәынҭқарра Ахада аинвестор ила аҳаирбаӷәаза иахьаҵанакуа игылоу ажәытә хыбрақәа рықәгара шымҩаԥысуа атәы изеиҭеиҳәеит. Хара имгакәа арахь иаагахоит иҷыдоу атехникеи аусзуҩцәеи.

Аҳәынҭқарра Ахада аминистр аргыларатә усурақәа рымҩаԥгара аамҭеихшара еиқәыршәаны изнеигарц азы анапынҵа ииҭеит.

Абылтәы џьармыкьа аҿы ишьақәгылаз аҭагылазаашьагьы инарҭбааны иалацәажәеит.  Аҳәынҭқарра Ахада абылтәы џьармыкьа аҿы аҭагылазаашьа аҭышәынтәалареи ауааԥсыреи атәыла абылтәы џьармыкьа алахәылацәеи абылтәы ала реиқәыршәара азҵаара аӡбареи рзы адҵақәа ҟаиҵеит.

Аилатәара аҿы атәыла абаҩарҵәыреи аспорти рыҿиара азы Аҳәынҭқарра Ахада ипрограмма алацәажәара ахшыҩзышьҭа ду аҭан.

Аҟәа. Жәабранмза 19, 2024 шықәса. Аԥсныпресс.  Аԥснытәи ачысҟаҵаҩы, асасааирҭа-аресторан «Леон» европатәи ачысқәа рзы су-шеф Анӡор Кочиев  ателеканал «Пятница» ала ицо ачысҟаҵаратә шоу «Битва шефов» ахԥатәи асезон афиналбжа аҟынӡа днаӡеит. Иара апопулиартә проект ахь инеира шыҟалаз, насгьы уадаҩрақәас дзықәшәази урҭ риааира илзыршази ртәы Аԥсныпресс аматериал аҿы шәаԥхьар шәылшоит. 

Ари ахҭыс аҭоурых алагеит ҭагалан 2023  шықәса рзы. Аресторан «Леон» ачысҟаҵаҩ-еиҳабы (шеф-повар) идгаларала ашоу аиҿкааҩцәа Анӡон иҽимардеит, анаҩс иара ихырдырга-видео (видео-визитка) Москваҟа ишьҭит. Мчыбжьык ашьҭахь, аҭыхрақәа анымҩамгахо арыцхә шьықәдыргылеит. Урҭ мҩаԥысит цәыббрамза 15 рзы. Иара аҭыхрақәа ирыдҳәалоу апроцесс ахаҭа акыр аамҭа зҵазкуаз, узырааԥсоз акакәны иҟалеит.  Аҭыхрақәа ирылагеит ашьыжь, асааҭ 6 рзы, ихыркәшахеит  уаха асааҭ 12 рзы.

Анӡор игәаанагарала, зегьы реиҳа иуадаҩны иҟаз иара ахаангьы зыӡбахә имаҳацыз ачысхкқәа рыҟаҵара азы адҵа анагӡара.

Аҟәа. Жәабранмза 19, 2024 шықәса. Аԥсныпресс.  Аԥсны апоет, арккаҩы дуӡӡа, аԥсуа литература ашьаҭаркҩы Дырмит Иасыф-иԥа Гәлиа диижьҭеи 150-шықәса аҵра азгәаҭара иазкны жәабранмза  21, 2024 шықәсазы иазԥхьагәаҭоу аусмҩаԥгатәқәа рыплан шьақәырӷәӷәоуп.

Асааҭ 11.00 рзы – Дырмит Гәлиа ибаҟа амҵан ашәҭ шьыҵәрақәа рышьҭаҵара (Р.Гәымба ихьӡ зху Аԥснытәи аҳәынҭқарратә филармониа аҿаԥхьа асквер аҿы).

Асааҭ 11.20 рзы  – Дырмит Гәлиа игәалашәара иазкны аныҳәатә митинг.

Асааҭ 13.00 рзы – Аԥсны арҿиаратә интеллигенциа ахаҭарнакцәеи аҵараиурҭақәа рҟынтәи аҿари алархәны агәалашәаратә хәылԥазы  (Аҳәынҭқарратә Усбарҭа «Д. Гәлиа Илитература-мемориалтә музеи)

Аҟәа. Жәабранмза 19, 2024 шықәса. Аԥсныпресс. Адунеи ачемпионат ConIFA-2024 агәыԥ «D» аҿы ашьапылампыл азы  Аԥсны еизгоу акоманда Секеитәи атәылаҿацәи  Мексика ашьапылампыл азы Амилаҭтә Ассоциациеи (ANBM) ркомандақәа   ирыцлаблоит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы апресс-маҵзура.

Адунеи ачемпионат мҩаԥысуеит рашәарамза 25 инаркны ԥхынгәымза  6, 2024 шықәса аҟынӡа Ирактәи Курдисҭан аҿы.

Зынӡа атурнир иалахәхоит 14 командак.

Аҟәа. Жәабранмза 19, 2024 шықәса. Аԥсныпресс. Тамшь ақыҭан ихыркәшахеит III ашахматтә фестиваль «Аԥсны. Тамшь-Village 2024».

Атурнир аҿы актәи аҭыԥ ааникылеит Краснодар ақалақь аҟынтәи агроссмеистер Никита Афанасиеев, аҩбатәи аҭыԥ - Симферополь ақалақь аҟынтәи иааз Алеқсандр Триапишко. Ахԥатәи аҭыԥ аҿы дҟалеит  Кисловодскынтәи иааз, уаанӡа ҩынтә Тамшь ақыҭан имҩаԥысуа афестиваль аҿы аиааира згахьаз Павел Смирнов.

Актәи атур аҿы Павел Смирнов дицыхәмарит Аҟәатәи аспортсменка Полина Марченко. Уи раԥхьаӡа акәны агроссмеистер дицыхәмаруан, лара лажәақәа рыла ари абжьааԥнытәи ахәмаррақәа иреиԥшыз хәмарран.

«Сара иара сара уаанӡа исымбахьаз џьара дебиутқәак рыла дыхәмарлоит ҳәа џьысшьон, аха иара е4 - е5 дыхәмарит.  Сгәа иаанагон еиҳа иуадаҩхоит ахәмарра ҳәа. Иааизакны ахәмара аинтерес аҵаны имҩаԥысит. Адебиут еиҳа лассы-лассы еиҭамҩаԥгалатәуп, еиҳа аҽадцалара аарԥшны ахәмарра ахыркәшаратә партиақәа мҩаԥгалатәуп», - ҳәа илҳәеит ашахматистка қәыԥш.  

Амилаҭтә реитинг змоу ашахматистцәа рыбжьара актәии аҩбатәи аҭыԥ ааныркылеит Артиом Табариани Трисҭан Кәарацхьелиеи (ақ. Аҟәа), ахԥатәи аҭыԥ  - Ҭемыр Шанаа (ақ.Очамчыра).

Аветеранцәа рыбжьара актәи аҭыԥ ааникылеит Сергеи Миносиан (ақ.Очамчыра), аҳәса рыбжьара актәи аҭыԥ аанылкылеит Маиа Порожниак (ақ.Краснодар).

16 шықәса зхымҵӡац аспортсменцәа рыбжьара актәи аҭыԥқәа ааныркылеит Сарида Лакәатаа (ақ. Аҟәа), Богдан Турков (ақ. Аҟәа).

Аиааирагаҩцәеи аԥхьахәгаҩцәеи зегьы ахраҿақәа, амедалқәа, аҳаҭыртә шәҟәқәеи аԥаратә ҳамҭақәеи ранашьахеит.

Аҟәа. Жәабранмза 19, 2024 шықәса. Аԥсныпресс. Аԥсны-урыстәылатәи аҳәынҭқарратә ҳәаа аҿы иаанкылан автомашьына. Уи ала изакәанымкәа амаининг азы амаруга аиагара рҽазыршәон, ҳәа адырра ҟанаҵоит Аладатәи аҳазалхратә Усбарҭа апресс-маҵзура.  

Ганрацәалатәи Автомашьынатә Аушьҭра-гәаҭаратә Ҭыԥ «Адлер» аԥыԥшырҭа аҿы аҳазалхратә гәаҭара амҩаԥгараан иаанкылан Аԥсныҟа иаауаз амашына лас VOLKSWAGEN POLO.

Игәҩарахаз автомашьына аҳазалхра аусзуҩцәа амобилтә аинспекциа-гәаҭаратә комплекс ахысразы идәықәырҵеит.

Аҟәа. Жәабранмза 19, 2024 шықәса. Аԥсныпресс. Шәача ақалақь аҿы аруаа ирырҭеит автотранспорттә хархәагақәа ԥшьба, аҭаҭын аалыҵқәа, уҳәа уаанӡа Урыстәылеи Аԥсни ирыбжьоу аҳәынҭқарратә ҳәаа аҿы Краснодартәи аҳазалхыҩцәа рыла зконфискациа мҩаԥгаз егьырҭ атауарқәа, ҳәа адырра ҟанаҵоит Аладатәи аҳазалхратә Усбарҭа апресс-маҵзура.  

Автомашьынақәа «Nissan Skyline», «Nissan Elgrand», «Toyota Alphard»», «ВАЗ-2107» аҳазалхратә закәанԥҵара аилагарала Урыстәылаҟа Аԥснынтәи иалагалан. Автомашьынақәа Ганрацәалатәи Автомашьынатә Аушьҭра-гәаҭаратә Ҭыԥ «Адлер» аҟны иаарԥшын, аконфискациагьы мҩаԥган. Зымхра мҩаԥгаз автомашьынақәа анаҩс административтә усеиҿкаара аҳәаақәа ирҭагӡаны аҳәынҭқарра амазараны ишьақәыргылан.

Аҟәа. Жәабранмза 19, 2024 шықәса. Аԥсныпресс.  Аҟәа ақалақь аҿы иҟоу Москва Аҩны аҿы Аԥсадгьыл ахьчаҩ Имш иазку акомандатә шахматтә турнир мҩаԥысуеит, ҳәа адырра ҟанаҵоит «Москва Аҩны» апресс-маҵзура.  

Аусмҩаԥгатә еиҿкаахеит Москва Анапхгара, Москва ақалақь жәларбжьаратәи адәныҟаекономикатәи аимадарақәа Рдепартаменти Москватәи аидгьылуаа Рыҩни иҟарҵаз адгылара иабзоураны.

Атурнир зынӡа рхы аладырхәуеит 16 командак:

Аҟәа. Жәабранмза 19, 2024 шықәса. Аԥсныпресс. Аҳәынҭқарра Ахада Ихаҭыԥуаҩ Бадра Гәынба ихантәаҩрала Аԥсны Аҩбатәи Ахада, «Ахьӡ-Аԥша» аорден I аҩаӡара акавалер Сергеи Уасил-иԥа Багаԥшь диижьҭеи  75-шықәса аҵра  иазкны агәалашәаратә усмҩаԥгатәқәа реиҿкаареи рымҩаԥгареи ирызку аҳәынҭқарратә Комиссиа  аилатәара мҩаԥысит ашәахьа, жәабранмза 19 рзы.  

Аилатәара рхы аладырхәит Аҳәынҭқарра Ахада Иусбарҭа анапхгаҩы Абесалом Кәарҷиа, акультура аминистр инапынҵақәа назыгӡо Динара Смыр, Очамчыра араион ахада Беслан Бигәаа, Очамчыра араион Џьгьиарда ақыҭа ахада А.Амҷба, Сергеи Уасил-иԥа Багаԥшь иԥа Зураб Багаԥшь, Аҳәынҭқарра Ахада иԥкаанҵа Аусбарҭа аиҳабы И.Аџьынџьал, уҳәа убас Акомиссиа егьырҭ  алахәылацәагьы.     

Ажәалагалақәа рыхәаԥшраан аӡбамҭақәа рыдыркылеит. Урҭ инарықәыршәаны акультура Аминистрра абарҭ ахыдҵақәа аҭан:

– Сергеи Уасил-иԥа Багаԥшь диижьҭеи  75-шықәса аҵра иазкны хәажәкырамза 4, 2024 шықәса рзы зымҩаԥгара азԥхьагәаҭоу аҳәынҭқарратә усмҩаԥгатәқәа рахь ааԥхьаратә билеҭқәа реиқәыршәара  алыршара;

 – Хәажәкырамза 4, 2024 шықәса, асааҭ  15.00 рзы С.Ҷанба ихьӡ зху Аԥснытәи адраматә театр афоие аҿы Сергеи Уасил-иԥа Багаԥшь игәалашәара иазкны афотоцәыргақәҵа аиҿкааразы ажәалагалақәа реиқәыршәара; 

– Хәажәкырамза 4, 2024 шықәса, асааҭ 16.00 рзы С.Ҷанба ихьӡ зху Аԥснытәи адраматә театр аҿы Сергеи Уасил-иԥа Багаԥшь  диижьҭеи 75-шықәса аҵра иазкны аныҳәатә еилатәара асценари аиқәыршәара;

Аҳәынҭқарратә Комиссиа ала иара убас 2024 шықәсазы Аԥсны ахьыԥшымра жәларбжьаратәи азхаҵара Амш азгәаҭара инамаданы Сергеи Уасил-иԥа Багаԥшь аԥсуа жәлар рмилаҭ-хақәиҭтәратә қәԥара, аҳәынҭқарра аргылара, Аԥсны ахьыԥшымра азхаҵара аҿы инаигӡаз ароль иазкны анаука-практикатә конференциа амҩаԥгарагьы азԥхьагәаҭоуп.