Аҟәа. Нанҳәамза 21, 2024 шықәса. Аԥсныпресс. Аԥсны «Ҭабуп ҳәа зҳәо абиԥара аҟынтәи наунагӡа зыԥсы ҭоу агәалашәара» ҳәа хьӡыс изауа абаҟа аргыларазы  асоветтә ԥараҿырпқәа реизгара иадҳәалоу акциа амҩаԥгара иазку апресс-конференциа мҩаԥысит ахаша, нанҳәамза  21 азы Аԥсны Аҳәынҭқарра Ахада Иусбарҭа иатәу Аинформациатә Центр аҿы.

Уи рхы аладырхәит ауаажларратә усзуҩ, Ареспублика Белорус Амилаҭтә паралимпиатә еизгоу акоманда алахәыла Алексеи Талаи Аԥсны Аҳәынҭқарра Ахада Иусбарҭа анапхгаҩы Абесалом Кәарҷиеи.

Ажәларзегьтәи Акциа «Ҭабуп ҳәа зҳәо абиԥара аҟынтәи наунагӡа зыԥсы ҭоу агәалашәара» нанагӡоит Алексеи Талаи ихьӡ зху Афонд.

Раԥхьатәи агәаларшәагатә баҟа ргылан 2022 шықәсазы Минск ақалақь, Аиааира Апарк аҿы, аҩбатәи ргылахеит ҳазҭоу ашықәс, ԥхынгәымза азы Бресттәи абаа аҿы. 2025 шықәсазы иазԥхьагәаҭоуп Минск ақалақь аҿы абаҟа аргылара.  

Аԥараҿыпқәа реизгаразы аколба Аҟәа ақалақь, амузеиқәа руак аҿы иқәыргылахоит.

Алексеи Талаи иажәақәа рыла, иара изы насыԥны иҟоуп иахьа Аԥсны агәырӷьаратә ҟазшьа аҵаны абаҟа «Ҭабуп ҳәа зҳәо абиԥара аҟынтәи наунагӡа зыԥсы ҭоу агәалашәара» аргылара азы асоветтә ԥараҿырпқәа реизгара алагара.

«Адунеи зегьы аҟынтәи ауаа раԥхьа Белоруссиа иахьаҵанакуа ишьақәыргылаз аколбақәа аԥараҿырпқәа рҭаԥсаразы алшара ԥшааны иаауан. Уамеигәырӷьар залшомызт зықәрахь инеихьоу ауаа  рмаҭацәа рыцны аԥараҿырпқәа рыманы ишаауаз абара. Апроект иԥшьоу ахықәкы нагӡахеит. Иарбоу акциақәа рыла абиԥарақәа реимадара еиҳа иӷәӷәахоит», - ҳәа иазгәеиҭеит Алексеи Талаи.  

Алексеи Талаи иажәақәа рыла, акциа аԥшьгаҩцәа иақәгәыӷӡомызт, зынӡагьы иазыԥшӡамызт уи ауаа  асҵәҟьа азхьаԥшра арҭап ҳәа. Минск ишьақәыргылаз абаҟа азы  130 нызықь инарзынаԥшуа аԥараҿырпы еизган.

Апроект анагӡара аҩбатәи етапны иҟалеит Бресттәи абаа аҿы жәлар рбаҟа ашьақәыргылара. Абаҟа азы арҭәарахьы инаган миллионбжак инарзынаԥшуа аԥараҿырпы. Абаҟа ԥхынгәымза 28, 2024 шықәсазы Белоруссиа анемец-мпыҵахалыҩцәа рҟынтәи ахақәиҭтәра 80-шықәса ахыҵра азгәаҭара инамаданы идыргылеит.

Аҟәа. Нанҳәамза 21 ,2024 шықәса. Аԥсныпресс. Sputnik-Аԥсны апресс-центр аҿы имҩаԥысит Аԥсны иҟоу Урыстәыла аус ацура азы Ахаҭарнакра анапхгараҭара злахәыз апресс-конференциа. Апресс конференциа атема: «Аԥснытәи абиутуриентцәа    2024-2025-тәи аҵарашықәс азы Урыстәылатәи аҵараиурҭақәа рҭалара апрограмма аихшьаалақәа».  

«Урыстәылатәи Афедерациа Анапхгара аԥснытәи абитуриентцәа рзы Урыстәылатәи аҵараиурҭақәа рҭаларазы 110 аквотатә ҭыԥқәа азоунажьит.  Аквотатә кампаниа аҳәаақәа ирҭагӡаны 267 зыҳәамҭа алагалан. Иахьатәи амш азы урыстәылатәи аҵараиурҭақәа рахь аҵаразы идәықәҵоуп  93-ҩык  абитуриентцәа, 9 зыҳәамҭак макьана аус адулара мҩаԥысуеит», – ҳәа ирҳәеит Аԥсны иҟоу Урыстәыла аус ацура Ахаҭанакра ахаҭарнакцәа.

Цәыббрамза 1, 2023 шықәса инаркны  ихацыркхеит 2024-2025-тәи аҵарашықәс азы аквотатә программа. Сынтәа адкылара, абжьааԥны еиԥш еиуеиԥшым аҵарадырра аҩаӡарақәа: абакалавриат, аспециалитет, амагистратура, аспирантура, аординатура, иназыҵӡоу азанааҭтә ҵара, абжьаратә занааҭтә ҵара рыла имҩаԥысуан.

Аԥсны иҟоу Урыстәыла аус ацура азы Ахаҭарнакра анапхгаҩы Дмитри Федотов аԥснытәи абитуриентцәа разыҟаҵара аҩаӡара шыҳараку азгәеиҭеит.

Аҟәа. Нанҳәамза 21, 2024 шықәса. Аԥсныпресс. Абызшәатә политика азы Аҳәынҭқарратә Усбарҭеи ахәыҷтәы журнал «Амцабзи» 2025 шықәсазы рбиуџьетқәа  тема хаданы иҟалеит атәыла аԥыза-министр Алеқсандр Анқәаби Аҳәынҭусбарҭа аиҳабы Гәында Кәыҵниеи аусбарҭа аспециалист хада, ажурнал «Амцабз» аредактор хада Гәында Сақаниеи реиԥылара аҿы, ҳәа адырра ҟанаҵоит Аԥсны аминистрцәа Реилазаара апресс-маҵзура.

Аҟәа. Нанҳәамза 21, 2024 шықәса. Аԥсныпресс.  Аԥсни Шьамтәылеи рыбжьара анаукатәи академиатәи аусеицура аҳәаақәа рырҭбаара аперспективақәа ирылацәажәеит Шьамтәыла иҟоу Аԥсны ацҳаражәҳәаҩ Муҳаммад Алии Дамассктәи Ауниверситет аректор, апрофессор Маҳаммад Усама Аль-Џьаббани реиԥылараа аҿы, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.  

Мухаммад Али Аԥсны Анапхгара Аԥснытәи аҳәынҭқарратә Университетеи Дамассктәи Ауниверситети рыбжьара аусеицуратә еизыҟазаашьақәа рыҿиара иазҿлымҳауп ҳәа аҳәамҭа ҟаиҵеит.  Астудентцәа наҟ-ааҟ ремадара иазку апрограмма, иара игәаанагарала, аҩ-тәылак рыбжьара анаукатәи акультуратәии аимадарақәа рыҿиара хра злоу анырра анаҭоит. Аганқәа ҳазҭоу ашықәс азы Аԥсны зымҩаԥгара азԥхьагәаҭоу, аекономикатә, акультуратә, анаукатә усеицура азы Аԥсны-Шьамтәылатәи Анапхгарабжьаратәи акомиссиа аҩбатәи аилатәара аҳәаақәа ирҭагӡаны ауниверситетқәа рыбжьара аусеицура азы Аиқәшаҳаҭра анапаҵыҩра ишазхиоу азгәарҭеит.

Аҟәа. Нанҳәамза 21, 2024 шықәса. Аԥсныпресс.  Аԥснытәи аҳәынҭқарратә аҿар ртеатр 10 шықәса ахыҵит. Нанҳәамза 21, 2014 шықәса рзы аҿар рырҿиаратә потенциал арҿиара хықәкыс иҟаҵаны, аминистрцәа Реилазаара аҿартә театр аԥҵара азы Ақәҵара рыдыркылеит.

Ари аҩыза аӡбамҭа Аԥсны жәлар рартистка Софа Агәмаа лнапхгарала арҿиаратә гәыԥ шықәсырацәа инеиԥыныланы  имҩаԥнагоз аусура иалҵшәахеит. 

«Актиор ҿарацәа  - ААУ аушьҭымҭацәеи Софа Агәмаа лтеатралтә студиа аушьҭымҭацәеи – ирымазароуп иахьықәгылаша рхатәы плошьадка», –  ҳәа 10 шықәса раԥхьа Жәлар рартистцәа Софа Агәмааи Шьалуа Гыцбеи, актиорцәа Ирина Коӷониеи Алик Дауҭиеи, иара убас гәыԥҩык актиор ҿарацәа – Аԥснытәи аҳәынҭқарратә Университет аушьҭымҭацәа дырԥыло иҳәеит, усҟан акультура аминистрс иҟаз Бадра Гәынба.

Аҟәа. Нанҳәамза 20, 2024 шықәса. Аԥсныпресс.  Аԥсны Амилаҭтә Банк аԥарақәа Рмузеи аҟны еицырдыруа афотограф, ажурналист, адокументалтә фильиқәа «Лара лоуп», «Мусор» равтор Инесса Лакоиа лфотоцәыргақәаҵа аатит. «Иарбан кадрзаалакгьы – ари амацәысеимҟьара иаҩызоу цәырҵроуп» ҳәа ахьӡ змоу  ацәыргақәҵа цәыббрамза  5-нӡа аус аулоит.  

Инесса Лакоиа, Москва афотосахьақәа Ракадемиа доушьҭымҭоуп, иара убас уи дрылгеит Игорь Новиков иавтортә школи Алексеи Корзов ишколи, Vogue (Italy), Untold (Greece), Artells magazine (New York), Fashion France (New York), L'attirance (France), Quadro (Milan, Italy), Figgi (Milan, Italy), Exanima (Corcoran), Marika (New York), Inco (Stockholm, Sweden), Isabella (Toronto, Canada) реиԥш иҟоу аҭыжьымҭақәа рҿы ианылахьоу лусумҭақәа рыла деицырдыруеит

Аҟәа. Нанҳәамза 20, 2024 шықәса. Аԥсныпресс. Аԥсны аспорт азҟаза Аинар Кәыҵниа игәалашәара иазку абокс азы IV Жәларбжьаратәи атурнир мҩаԥысит Аҟәа ақалақь аҿы. Сынтәа уи аԥснытәи аспортсменцәа рнаҩс рхы аладырхәит Москва, Санкт-Петербург, Шәача ақалақьқәа, иара убас Чукотка рҟынтәи аспортсменцәа.

Абокс азы азыҟаҵаҩ  Иракли Цурцумиа, 23 шықәса зхыҵуаны зыԥсҭазаара ҿахҵәаз Аинар Кәыҵниа ауаа дырдыруаеит, дыргәалашәоит ҳәа иазгәеиҭеит.  

«Уи игәалашәара аҳаҭыр азы ари атурнир мҩаԥысуеит. Ҳаԥхьаҟа еиҳа аспортсменцәа радыԥхьаларазы  атурнир ҩымштәины аҟаҵаразы азԥхьагәаҭарақәа ыҟоуп», – ҳәа иҳәеит Иракли Цурцумиа.      

Аҟәа. Нанҳәамза 20, 2024 шықәса. Аԥсныпресс. Агәыҳалалратә фрнд «Иаҳгәалашәоит» хатәгәаԥхарала Аԥсны жәлар Рџьынџьтәылатәи еибашьра аҿы еибашьуаз, Аԥсны ахақәиҭреи ахьыԥшымреи рзы иҭахаз Альберт Агиров иан лзы Черқьеск ақалақь аҿы ауаҭах аахәара азы аԥаратә хархәагақәа реизгара азы алаҳәара ҟанаҵоит.  Аԥсны иара убас деибашьуан Нина Агирова егьи лыҷкәынгьы. Иара аибашьра зегьы аснаиперс дыҟан.  Иԥсҭазаара далҵит 2005 шықәсазы.

Зықәрахь инеихьоу аԥҳәыс Ҟарачы-Черқьесстәи Ареспублика аул Аԥсуа аҿы дынхоит. Лара иахьа ацхыраара лҭахуп. Нина Агирова 100-шықәса лхыҵратәи аиубилеи аламҭалазы Афонд «Иаҳгәалашәоит» ахаҭарнакцәа ирыӡбеит аԥарақәа реизгаразы алаҳәара ҟарҵарц. Аԥаратә хархәагақәа рыиагаразы ареквизитқәа:

Аҟәа. Нанҳәамза 20, 2024 шықәса. Аԥсныпресс.  Аҳәынҭқарратә шәарҭадара Амаҵзура аусзуҩцәа аҳәаанырцәтәи атәылауаа закәаншьаҭада, официалла ишьақәыргылоу аушьҭра-гәаҭаратә ҭыԥқәа  рхыкәшарала Қырҭтәылантәи атәыла излалалоз амҩа аадырԥшит.

Нанҳәамза 17, 2024 шықәса рзы, Гал араион  Бгоура (уаанӡа- Аҩбатәи Отобаиа) ақыҭан иаанкылан Аԥсны анхаразы азиншәҟәы змаз, Қарҭ атәылауаа ҩыџьа —1964 шықәса рзы ииз Ремикои 1967шықәса рзы ииз Мурҭази Ҷыҭанаа.

Ҷыҭанаа рыҩны аԥсуа-ақырҭуа ҳәаа иаԥнуп. Дара закәаншьаҭада аҳәаа иахысыр зҭахыз ирыцхраауан ҳәа азгәарҭоит Аҳәынҭқарратә шәарҭадара Амаҵзура аҿы.

Иаанкылаз Мурҭази Ремикои Ҷыҭанаа рынхарҭаҿы имҩаԥгаз аԥшаарақәа раан ирбеит арҭҟәацгақәа - аграната F1, анапытә граната РГД 5, 1,600 грамм (1,6 кьыла) арԥжәагеи, еиуеиԥшым ахҭаларшә змоу ахқәеи, аԥареи.

Аҳәынҭқарратә шәарҭадара Амаҵзура аусзуҩцәа иара убас иааныркылеит изакәанымкәа Аԥсни Қырҭтәылеи ирыбжьоу аҳәынҭқарратә  ҳәаа ахыҵра зҽазызшәаз ҩыџьа Урыстәыла атәылауаа. Иаанкылаз Дмитри Денисови Александр Лузенини аҳәаа рахыҵраҿы дрыцхраауан  1979 шықәса рзы ииз Арчил Сақаниа. Уи аԥхьа Урыстәыла атәылауаа Аԥсныҟа иааит иԥаршеиу атәылауаҩшәҟәқәа рыла.

Иаанкылаз рганахьала ихымԥадатәиу аусеилыргаратә усмҩаԥгатәқәа мҩаԥыргоит.

Аҟәа. Нанҳәамза 16, 2024 шықәса. Аԥсныпресс. «Қырҭтәыла аҵакыратә акзаара» ҳәа аамҭа-аамҭала еиҭарҳәало ажәа шаблонқәа иаадырԥшуеит жәларбжьаратәи аилазаара ахаҭарнакцәақәак Кавказ анҭыҵ иҟоу аҭагылазаашьа иашаҵәҟьа обиективла ишрызрыдымкыло, шаҳаҭрагьы ауеит ари арегион аҿы ицо апроцессқәа рҭышәныртәалара азҵаарақәа ишырцәыхаро». Убас Аԥсны адәныҟатәи аусқәа Рминистрра Еиду амилиҭқәа реиҿкаара Ашәарҭадаратә Хеилак алахәылацәа – Франциа, Иапониа, Мальта, Словениа, Британиа Ду, Еиду аштатқәа, иара убасгьы ԥхьаҟа уи иалахәылахараны иҟоу – Даниа, Бырзентәыла рыхьӡала Мальта еснагьтәи ахаҭарнак ихаҭыԥуаҩ Франчески Гатт лҳәамҭа ахҳәаа ҟанаҵеит. Мальтиатәи адипломат иҟалҵаз аҳәамҭаҿы иазгәаҭоуп Аԥсны Аҳәынҭқарреи Аахыҵ Уаԥстәылатәи Ареспубликеи «Қырҭтәыла иузаҟәымыҭхо хәҭоуп» ҳәа, иара убасгьы ааԥхьара ҟаҵоуп Урыстәылахь арҭ аҳәынҭқаррақәа рхьыԥшымра мап ацәнакырц.