Аҟәа. Мшаԥымза 10, 2024 шықәса. Аԥсныпресс. Аԥсны аҩныҵҟатәи аусқәа рминистр Роберт Киут Гагра араион аҩныҵҟатәи аусқәа Русбарҭа аҿы иааиуа 2024-тәи аԥхынтәи акурорттә сезон аҽазыҟаҵара иазку аусуратә еилатәара мҩаԥигеит. Аиԥылара рхы аладырхәит аҩныҵҟатәи аусқәа рминистр актәи ихаҭыԥуаҩ Руслан Ажьиба, ашьаусԥшааратә Усбарҭа анапхгаҩы Алхас Габлиа.

Араион аҿы иҟоу изаамҭанытәиу аҭагылазаашьа азы адырра ҟаиҵеит Гагра араион аҩныҵҟатәи аусқәа Русбарҭа аиҳабы Денис Аиба.

Ҳазҭоу 2024 шықәса актәи аԥшьбара азы араион аҿы азеиԥшшьоуратә хырхарҭақәа змоу 27 цәгьоура ҟалеит. (2023 шықәсазы аиԥш-зеиԥшу аамҭахәҭа азы  –  35), урҭ рахьынтә иааартын 20.  Ацәгьоурақәа раатра 74% рҟынӡа инаӡоит.

Ашәҟәы иҭагалаз 27 цәгьоура рҟынтәи  11 ицәгьоу ркатегориа иаҵанакуеит, урҭ рахьынтә хәба аартуп.

Аминистр араион аҩныҵҟатәи аусқәа Русбарҭа аусура хар амам ҳәа ахәшьара аиҭеит, убри аан аԥхынтәи аамҭахәҭа азы араионтә Усбарҭа ахь адҵақәа шырӷәӷәахо, насгьы иара хаҭала уи ахылаԥшра шаиҭало азгәеиҭеит.

Аҟәа. Мшаԥымза 10, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Шьамтәылатәи Арабтә Республика Ахада Башар Асад Ураза-баирам аныҳәа идиныҳәалеит.  

«Ари аныҳәамш азы  гәык-ԥсыкала  сшәыдныҳәалар сҭахуп. Шьамтәыла иқәынхо аԥсылманцәа зегьы рзы ари аныҳәа ирзаанагааит аҭынчра, аизҳазыӷьара, аиашареи ахирреи.  

Аҟәа. Мшаԥымза 10, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны иқәынхо аԥсылманцәа Ураза-баирам аныҳәа рыдиныҳәалеит.

«Ҳаҭыр зқәу ҳџьынџьуаа!

Ишәыдысныҳәалоит иԥшьоу амза Рамадан ахыркәшара иазҳәоу Ураза-баирам аныҳәа!

Аҟәа. Мшаԥымза 10, 2024 шықәса. Аԥсныпресс. Ахәыҷтәы хореографиатә ансамбль «Аураашьа» ( анапхгаҩы –  Валери  Ҭаниа)  Казань ақалақь аҿы имҩаԥысуаз афестиваль аҿы Гран-при агеит.

Ахәыҷтәы-қәыԥштә хореографиатә рҿиара азы III Урыстәылазегьтәи афестиваль-конкурс «Агәахәтәы аҟынӡа шьаҿак» («Шаг к мечте») мшаԥымза   5-7 рзы  Ҭаҭарсҭан аҳҭнықалақь аҿы имҩаԥысуан.

Аҟәа. Мшаԥымза 10, 2024 шықәса. Аԥсныпресс. Акоммуналтә усзуҩцәа иахьа Алаҳаӡы ақыҭан,  700 инаркны 800 ԥшьыркцатә метр рҟынӡа амца зкыз агәамсамеизакырҭа аҿы абылра аанкылара иалагеит.   Гагратәи «Иҷыдоу автонхамҩа» ахада Ҭемыр Бигәаа Аԥсныпресс акорреспондент диҿцәажәо иахьатәи амш азы имҩаԥысуа аусурақәа ртәы еиҭеиҳәеит.

«Ҳара уажәы агәамсам еизакырҭа аҵакыраҿы ҳаҟоуп, амца ахьхуҵҟьо аҭыԥқәа рҿы амца арцәара ҳаҿуп. Аҭагылазаашьа иацы аасҭа акыр еиӷьуп иахьа. Атехника ашьыжь, асааҭ 8 инаркны аусура иаҿуп. Амашьынақәа рыла адгьыл ааганы агәмсам ахыхь иақәрыԥсоит. Убри ала уахь аҵәыҵәри анеира ацәыуадаҩхоит, иара убри ала амца аибакра еиҳа имаҷхоит», - ҳәа иазгәеиҭеит иара.

Аҟәа. Мшаԥымза 10, 2024 шықәса. Аԥсныпресс. Ироуз аоперативтә информациа ала Аҳәынҭқарратә ҳазалхратә Еилаки Аҳәынҭқарратә шәарҭадара Амаҵзуреи русзуҩцәа инарыгӡаз аусмҩаԥгатәқәа раан Аԥсны атәылауаҩ  Габуниа В.Иу. ихатәы ҩны алыӷәра аҿы ирыԥшааит  75 аппарат рыла ишьақәгылаз аус зуаз амаининг-ферма.

Аҟәа. Мшаԥымза 10, 2024 шықәса. Аԥсныпресс. Аҳәынҭқарра Ахада Ҟрым Аиҳабыра аԥыза-министр ихаҭыԥуаҩ Георги Мурадов дидкылеит, ҳәа адырра ҟанаҵоит Аҳәынҭқарра Ахада ипресс-маҵзура.

Асас аԥсшәа иаҳәо, аҳәынҭқарра Ахада иазгәеиҭеит Крыми Аԥсни ирыбжьоу ҩ-ганктәи аизыҟазаашьақәа рырҿиареи рырӷәӷәареи ирымоу аҵакы. «Сара еснагь издыруан Москва ақалақь Ахадара аҟны аус аныжәуаз инаркны, иара уажәгьы Шәара шәхаҿала Аԥсны аҩыза ду дшамаз. Ҳара ҳзы гәаҿхәароуп Шәара Крым аус ахьыжәуа»,- ҳәа иҳәеит Аслан Бжьаниа.

Иазгәаҭан Урыстәыла Украина имҩаԥнаго иҷыдоу арратә аоперацаҟны аусеицура.

«Иазԥхьагәаҭоу апланқәеи, изҵаҩу аиқәшаҳаҭрақәеи ҳажәлари ҳинтересқәа ирықәшәоит», - иҳәеит Аслан Бжьаниа, агәаанагара ааирԥшит, Иҷыдоу Арратә Аоперациа анаҩс акоммуникациақәа рзыаимадаразы еиҳа аҭагылазаашьақәа  шыҟало, ҷыдала, акруизтә лаинер аушьҭразы.

Георги Мурадов Аслан Бжьаниа иҭабуп ҳәа еиҳәеит аиԥыларазы, иара убас Крымтәи Ареспублика Ахада Сергеи Аксионов ихьӡала гәыблыла салам ииҭеит. Иара иазгәеиҭеит, аԥсуа-крымтәи аизыҟазаашьақәа ҩ-нызқь шықәса инареиҳаны ишырхыҵуа, хымԥада урҭ аԥхьаҟагьы ишрыцҵахо.

Аганқәа актуалра зҵаз егьырҭ азҵаарақәагьы ирылацәажәеит.

Аҟәа. Мшаԥымза 9, 202 шықәса. Аԥсныпресс. Мшаԥымза 15, асааҭ 14:00 рзы Урыстәылатәи Амилаҭтә Библиотека ахыбра ҿыц аҿы (Москватәи апроспект, аҩны №165, акорпус 2) аԥснытәи ашәҟәыҩҩы, ажурналист Екатерина Бебиа лԥылара мҩаԥысраны иҟоуп, ҳәа адырра ҟанаҵоит абиблиотека асаит.

Аиԥылара аҳәаақәа ирҭагӡаны, апублицист, ашәҟәыҩҩы, афилологиатә наукақәа рдоктор, Аԥснытәи аҳәынҭқарратә Университет апрофессор Екатерина Гьаргь-иԥҳа Бебиа  аҵыхәтәантәи жәашықәса рыҩныҵҟа иҭлыжьыз ашәҟәқәа рӡыргара мҩаԥылгоит, уи ашьҭахь лара арҭ ашәҟәқәа Урыстәылатәи Амилаҭтә Бибилиотека ҳамҭас иалҭоит. Еизаз иара убас лара иҭылхыз адокументалтә фильмқәа рцыԥҵәахақәагьы дырбахоит.

Аҟәа. Мшаԥымза 9, 2024 шықәса. Аԥсныпресс. Аҳәынҭқарра Ахада Аслан Бжьаниа ақалақь Ҭҟәарчал 82-шықәса ахыҵра иазкыз аныҳәатә усмҩаԥгатәқәа ихы рылаирхәит, ҳәа адырра ҟанаҵоит Аҳәынҭқарра Ахада ипресс-маҵзура.

Аныҳәатә усмҩаԥгатәқәа Ахьӡ-Аԥша Аллеиа аҿы Аԥсадгьыл Ахьчаҩцәа Рмемориал амҵан ашәҭшьыҵәрақәа рышьҭаҵарала иалагеит.  Анаҩс урҭ ирыцҵахеит акультура Ахан аҿы. 

Ҭҟәарчалаа дрыдныҳәалеит Аҳәынҭқарра Ахада Иусбарҭа анапхгаҩы Абесалом Кәарҷиа. Уи Аҳәынҭқарра Ахада иҟынтәи адныҳәаларатә цҳамҭа даԥхьеит.  Уи атекст аҿы, ахәҭакахьала иазгәаҭоуп:

«Ҳаҭыр зқәу Ҭҟәарчалаа! Иахьа ҳара иазгәаҳҭоит акыр зҵазкуа ахҭыс – Ақалақь-Фырхаҵа Ҭҟәарчал 82- шықәса ахыҵра! Иҳаҩсыз ашәышықәса 40-тәи ашықәсқәа рзы зышьаҭа аркыз ари ақалақь, аамҭа кьаҿ иалагӡаны убла хызхуа ашьхара иаԥну анхарҭаҭыԥ аҟынтәи идуу ааглыхратә центрны иҟалеит.

Аԥсны жәлар Рџьынџьтәылатәи еибашьра ашықәсқәа раан  Ҭҟәарчал ҳажәлар ракзаареи реидгылареи рхачҳареи иасимволны иҟалеит.  

Ақалақь ауааԥсыра, агәеицамкреи афырхаҵареи аарԥшны аӷа иҿагылеит, араҟа ахыҵакырҭа рыԥшааит хыԥхьаӡара рацәала мрагыларатәи Аԥсны ақыҭақәа рҟынтәи ахҵәацәа. Ари афырхаҵара наунагӡа ҳҳәынҭқарра ҳаамҭазтәи аҭоурых адаҟьақәа ирнылеит.

Аҟәа. Мшаԥымза 3, 2024 шықәса. Аԥсныпресс. Атәыла аԥыза-министр Алеқсандр Анқәаб М. В. Ломоносов ихьӡ зху Москватәи аҳәынҭқарратә Университет аректор, афизика-математикатә наукақәа рдоктор, Урыстәыла Анаукақәа Ракадемиа академик Виктор Садовничи ииубилеи идиныҳәалеит.

Адныҳәаларатә цҳамҭа атекст аҿы, ахәҭакахьала иазгәаҭоуп: 

«Ҳаҭыр зқәу Виктор Антон-иԥа. Ареспублика Аԥсны Анапхгара ахьӡалеи, хаҭала сара сыхьӡалеи гәык-ԥсыкала ишәыдысныҳәалоит 85-шықәса шәхыҵра Амш.

Гәык-ԥсыкала анаука азааԥсара, иреиҳаӡоу ашкол, иааизакны аҵарадырра аҿиара аҿы шәлагалеи шәеихьӡара дуқәеи шәыуаҩышьеи шәаамсҭашәареи рзы Шәара Урыстәыла адагьы уи хара анҭыҵгьы аҳаҭыри апатуи шәырҳаит.    

Акыр ахә ҳаракны иаҳшьоит хаҭала Шәара Ареспублика Аԥсны азы ззанааҭдырра ҳараку аспециалистцәа  разыҟаҵара аганахьала ишәылшәыршаз аус. Адунеи аҿы иԥхьагылоу иреиҳаӡоу аҵарадырра ацентрқәа иреиуоу Москватәи аҳәынҭқарратә Университет иреиӷьу аушьҭымҭацәа рабиԥарақәа ироуз хәызмаӡам адыррақәа рхы иархәаны аԥснытәи аекономикеи асоциалтә усхкқәеи аҵарадырра асистемеи аҳәынҭқарратә маҵзурақәеи рҿы қәҿиарала аус руеит.  Иахьагьы, Шәара иҟашәҵо адгыларала, Москватәи ауниверситет аҿы аҵара рҵоит аҟыбаҩ злоу  ҳара ҳџьынџьуаа – ҳаԥхьаҟа аҿиарамҩа иану Аԥсны  азы акырӡа зҵазкраны иҟоу амилаҭтә кадрқәа.