Аҭыжьымҭа ҿыц Sputnik-Аԥсны имҩаԥысыз апресс-конференциа аҿы дахцәажәеит Аԥсны атуризм Аминистрра акурорт-туристтә индустриа азԥхьагәаҭареи анализи рыҟәша аспециалист хада Ҭарашь  Хәытаба.

Ажурнал «Аԥснытәи аԥсшьарамшқәа» («Абхазские каникулы») аԥҵаҩы, аредактор хада – алингвист, апроект аидеиа автор Риҵа Анқәаб.

«Атуризм Аминистрра аусура ахырхарҭа хадақәа иреиуоуп аимиџьтә политика. Уи иамҽханакуеит акыр иҭбаау ауснагӡатәқәа реизак, амаркетинг уахь иналаҵаны. Аинформациатә ҵакыра, авеб-саитқәа, ажурналқәа, агазеҭқәа, асоциалтә ҳақәа уахь иналаҵаны, амаркетинг аинструментқәа иреиуоуп», – ҳәа иҳәеит иара.

Ҭарашь Хәытаба  инаҵшьны азгәеиҭеит «Аԥснытәи аԥсшьарамшқәа» («Абхазские каникулы») — ари иуникалу ажурнал ауп, уаҟа атуризм азҵаарақәа рылацәажәара анаҩс, урыстәылатәи атуристтә аалыҵқәа Аԥсны рӡыргарагьы мҩаԥнагоит.

Ажурнал «Аԥснытәи аԥсшьарамшқәа» («Абхазские каникулы») аредактор хада Риҵа Анқәаб ажурнал «Аԥснытәи аԥсшьарамшқәа» («Абхазские каникулы») уаанӡа иҟаз аҭыжьымҭақәа излареиԥшым азгәалҭеит.

«Сара акыр аамҭа аҳәаанырцә сынхон, анҭыҵынтәи избон Аԥсны аӡыргаратә ҭыԥыркра шымҩаԥысуа. Рыцҳарас иҟалаз, ҳара ҳаҵахоит аинформациатә структурақәа жәпакы рҿы, ҳара аинформациатә еиҿагылараҿы ҳаҵахоит. Ажурнал «Аԥснытәи аԥсшьарамшқәа» («Абхазские Каникулы») ииашоу аресурс иахыҵхырҭаны иҟоуп. Амҩақәҵагақәа рҿы ахатә ҭоурыхқәа арбаӡам, иҟаӡам ҳара ҳҭыжьымҭа иадаҳҵо ҳгәаҵантәи иаауа аԥхарра.

Иаишоуп, ҳара Аԥсны аимиџь ҳнапы алакуп, атуристтә обиектқәа ҳрыхцәажәоит, аха уи мацара акәӡам  аԥхьаҩцәа ҳжурнал ахь иадзыԥхьало. Ҳара ҳжурнал аҿы иҟоуп ҳауаажәлар иреиӷьу рҟазшьақәа аазырԥшуа арубрикақәа.  Убас, актәи аҭыжьымҭа аҿы иҟоуп арубрика «Анцәа иуасиаҭқәа рнаунагӡара зыхьчо аԥааимбарцәа» («Хранители Бога в Вечности»). Араҟа ҳара абыргцәа ҳрыҿцәажәоит. Шәара асоциалтә ҳақәа рҿы џьаргьы ҳжурнал аҿы еиԥш иҟоу, ари аҟара иҵаулоу, аинтерес, аԥхарра зҵоу аинформациа шәзымԥшаар ҟалап», – ҳәа илҳәеит лара.  

Ажурнал «Аԥснытәи аԥсшьарамшқәа» («Абхазские Каникулы»)  актәи аномер 1000 екземплиар атираж аманы иҭыҵит.

Иазԥхьагәаҭоуп иара убас ажурнал англыз бызшәалагьы аҭыжьра.

Ажурналист, аредакциа  «Аԥснытәи аԥсшьарамшқәа» («Абхазские каникулы») аусзуҩ Милана Жьиба ажурнал ианылало атәы далацәажәеит:

«Ари ажурнал аҿы аԥхьаҩцәа доусы иргәаԥхо, ирзааигәо рыԥшаауеит хымԥада. Ҳара даара аинтерес зҵоу афырхацәа ҳамоуп. Ҳара Аԥсны ҳахцәажәоит аполитика апризма, мамзаргьы астереотипқәа рыла акәымкәа, иҵабыргу ауаа рҭоурыхқәа рыла. Ҳаԥхьаҟа иазԥхьагәаҭаны иҳамоуп ажурнал «Аԥснытәи аԥсшьарамшқәа («Абхазские каникулы») Аԥсны ажәлари ибеиоу акультуреи иахцәажәо жәларбжьаратә ҭыжьымҭаны аҟаҵара», - ҳәа илҳәеит лара.