Аҟәа. Ԥхынҷкәынмза 12, 2023 шықәса. Аԥсныпресс.  Ԥхынҷкәынмза 10, 2023 шықәса рзы амассатә инфорациа ахархәагақәа рҿы азинхьчаратә усбарҭақәа русзуҩцәа Тҟәарчал араион Ҵарча ақыҭан инхоз Витали Иван-иԥа Қарбаиа даанкыланы дахьырыԥҟаз иахҟьаны иԥсҭазаара далҵит ҳәа аинформациа цәырҵит.

Иҟоу адыррақәа рыла, Аԥсны ауаҩы изинқәа рыхьчара знапы иану Анас Кьышьмариа апрокурор Хада, аҩныҵҟатәи аусқәа рминистр, Гал араион апрокурор, Гал араион аҩныҵҟатәи аусқәа Русбарҭа аиҳабы рахь аамҭа кьаҿ иалагӡаны абри аинформациа ала агәаҭарақәа рымҩаԥгареи, насгьы урҭ рылҵшәақәа рзы адырра ауаҩы изинқәа рыхьчара знапы иану Иаппарат ахь анашьҭреи ралыршаразы ашәҟәы налышьҭит.

Аҟәа. Ԥхынҷкәынмза 12, 2023 шықәса. Аԥсныпресс. Иахьа Ареспублика Аԥсны аекономика Аминистрра аԥҵеижьҭеи 30 шықәса ҵит.

Ԥхынҷкәынмза 12, 1993 шықәса рзы Ареспублика Аԥсны Иреиҳаӡоу Асовет ахантәаҩы  Владислав Арӡынба «Ареспублика Аԥсны аҳәынҭқарратә напхгараҭара аусбарҭақәа рыструктура азы» азакәан инапы аҵаиҩит.  Ари азакәан инақәыршәаны иаԥыхыз Аҳәынҭқарратә плантә комитет ахаҭыԥан иаԥҵахеит атәыла аекономика Аминистрра.

Еиуеиԥшым ашықәсқәа рзы ари Аминистрра ахадараҿы иҟан Даур Барганџьиа, Константин Ҭыжәба, Константин Озган, Беслан Кәыбраа, Адгәыр Лышәба, Руслан Арӡынба, Давид Ирадиан, Николаи Ачба, Адгәыр Арӡынба. Дара зегьы ҳҳәынҭқарра аекономика аҿиареи уи аҭышәынтәалара алыршареи рлагала аларҵеит. Уажәы аекономика Аминистрра дахагылоуп Кристина Озган.

Аҟәа. Ԥхынҷкәынмза 12, 2023 шықәса. Аԥсныпресс.  Аԥсны Аҳәынҭқарра Ахада  Аслан Бжьаниа Владимир Путин Урыстәылатәи Афедерациа Аконституциа амш идиныҳәалеит. Абри атәы аанацҳауеит Аҳәынҭқарра Ахада ипресс-маҵзура.

Адныҳәаларатә цҳамҭа атекст аҿы, ахәҭакахьала иҳәоуп:

«Ҳаҭыр зқәу Владимир Владимир-иԥа!

Азин сыщәҭозар, ҳаҭырқәҵарыла сшышәзыҟоу азгәаҭо,  ишәыдысныҳәалрц сҭахуп аҳәынҭқарратә ныҳәа ду - Урыстәылатәи Афедерациа Аконституциа Амш.

1993 шықәса ԥхынҷкәынмза 12 Урыстәыла аҭоурых ҿыц аҟны аҳәынҭқарра аԥсҭазаараҿы аамҭа ҿыц ашьақәгылара иазҳәоу иҷыдоу аҭыԥ ааннакылоит.

Урыстәылатәи Афедерациа Аконституциа атәыла қәҿиарала аҿиара уасхырс иазышьҭоуп, ацәаҩашәатә хырхарҭа хадақәаны изгәылоу, ауаҩы изинқәеи ихақәиҭреи акырӡа зҵазкуа ак акәны иазгәазҭаз.

2020 шықәса рзы Адокумент Хада аԥсахрақәа ралагалара

Аҟәа. Ԥхынҷкәынмза 12, 2023 шықәса. Аԥсныпресс. Ашықәс Ҿыц аламҭалазы С.Ҷанба ихьӡ зху Аԥснытәи аҳәынҭқарратә драматә театр, Аԥсны аҳәынҭқарра ақәыԥшцәа ртеатр, Ф.Искандер ихьӡ зху Аурыс драматә театр аԥсышәалеи урыс бызшәалеи ахәыҷтәы спектакльқәа дырхиеит.    

Аԥсуа адраматә театр аҿы ԥхынҷкәынмза  25 рзы А.Н. Островски ипиеса ала иқәыргылоу аспектакль «Асҭыԥҳа»  аԥхьарбара мҩаԥысуеит.   Апиеса аԥсуа бызшәахьы еиҭалгеит апоетесса Нелли Ҭарԥҳа. Ашықәсҿыцтәи ақәгылара арежиссиор-ақәыргылаҩ –  Аԥсны Зҽаԥсазтәыз артистка Мадина Аргәын.

Ԥхынҷкәынмза 25 инаркны ԥхынҷкәынмза 30-нӡа аспектакль Аҟәа ақалақь аҿы имҩаԥыслоит, ажьырныҳәамза  2 - 3 рзы – Гагра ақалақь акультура Аҩны аҿы.

Аҳәынҭқарратә ақәыԥшцәа ртеатр ахәыҷқәа ирызнархьиеит аԥсуа бызшәала иқәыргылоу аспектакль  «Ашықәсҿыцтәи ахҭыс». Арежиссиор-ақәаргылаҩ – Ахра Кәарҷиа. Аспектакль аԥхьарбара мҩаԥгахоит ԥхынӷкәынмза 20 рзы С.Ҷанба ихьӡ зху Аԥсуа драматә театр асцена аҿы.

Аҟәа. Ԥхынҷкәынмза 12, 2023 шықәса. Аԥсныпресс. Ашәахьа, ԥхынҷкәынмза  11 рзы Аҳәынҭқарра Ахада Аслан Бжьаниеи Жәлар Реизара-Апарламент Аиҳабы Лаша Ашәбеи алархәны  аекономикатә политикеи ареформақәеи аинформациатә техногиақәеи рзы апарламенттә Еилакы аилатәара мҩаԥысит.

Аилатәара иалахәыз азакәан апроектқәа ирыхәаԥшит. Урҭ рхыԥхьаӡараҿы иҟоуп:

«Еидкыланы аҳәынҭқарратә  аахәарақәа рзы»;

«Ареспублика Аԥсны Анхаратә Закәанеидкыла»;

«Ареспублика Аԥсны Анхаратә Закәанеидкыла азинмчы аҭара азы»;

«Ареспублика Аԥсны Аҳаиртә Закәанеидкыла аиҭакрақәа ралагалара азы»;

«Аинвестициатә еилахәылара аҭышәынтәалара аганахьала Ареспублика Аԥсны азакәанԥҵарақәак  аиҭакрақәа  ралагалара  азы»;

«Аинвестициатә еилахәылара азы».

Апрофильтә Еилакы алахәылацәа иарбоу азакәан апроектқәа иааиуа аилатәара аҿы Апарламент ишьақәнарӷәӷәарц азы абжьгара аҟаҵара азы аӡбамҭа рыдыркылеит. 

Анаҩс апарламенттә Еилакы ахантәаҩы Резо Занҭариа «Ареспублика Аԥсны афымцаенергетика аҿы ареформақәа рымҩагара» атема ала аӡыргара мҩаԥигеит.  Аилатәара иалахәыз ирыдгалаз апроект иахәаԥшны доусы ргәаанагарақәа рҳәеит. 

Аҟәа. Ԥхынҷкәынмза 12, 2023 шықәса. Аԥсныпресс. Жәлар Реизара-Апарламент Аиҳабы Лаша Ашәба Урыстәылатәи Афедерациа Афедералтә Еизара апалатақәа рхантәаҩцәеи Аԥсны Аҳәынҭқарраҟны иҟоу Ацҳаражәҳәаҩи Урыстәыла Аконституциа Амш рыдиныҳәалеит.

Афедерациа Ахеилак Ахантәаҩы Валентина Матвиенко лыхьӡала ишьҭу адныҳәалараҟны иҳәоуп:

«Афедерациа Ахеилак ҳаамҭазтәи Урыстәылатәи аҳәынҭқарра ашьаҭа зырӷәӷәаз, уи атәылауаа рзы итрадициатәу адоуҳатә-леишәатә ҵасқәа реиқәырхара алзыршо Урыстәылатәи Афедерациа Аконституциа инақәыршәаны иаԥҵоуп. Урыстәылатәи Афедерациа Аконституциа Урыстәылатәи аҳәынҭқарра аҿиара ахырхарҭа хадақәа ҳәаақәнаҵоит, аамҭа ицәырнаго ашәарҭара дуқәа инарықәыршәаны зыда ԥсыхәа ыҟам азыӡбақәа рыдкылара иацхраауеит. 2020 шықәсазы урыстәылазегьтәи жәлар рыбжьыҭирала ишьақәырӷәӷәаны Урыстәылатәи Афедерациа Аконституциа иалагалаз аиҭакрақәа, аҳәынҭқарра аҿиара апроцесс аҿы имҩаԥысуа аҭоурыхтә еиҭакрақәеи атәыла иҭышәынтәалоу аекономикатә ҿиареи рзы хра злоу аҭагылазаашьақәа раԥҵара иазырхоуп.  

Ҳара агәра ҳгоит аԥсны-урыстәылатәи апарламентбжьаратә усеицура аԥхьаҟгьы арӷәӷәара Аԥсны Урыстәылеи рыжәларқәа ринтересқәа инарықәыршәаны ҳҳәынҭқаррақәа реизыҟазаашьақәа реизырҳара ишацхраало».

Аҟәа. Ԥхынҷкәынмза 12, 2023 шықәса. Аԥсныпресс. Аԥсны адәныҟатәи аусқәа рминистр Инал Арӡынба аҩганктәи, аԥсны-шьамтәылатәи амшхәаԥштә иаҵанакуа жәларбжьаратәи азҵаарақәа рылацәажәаразы   Шьамтәылатәи Арабтәи Ареспублика ахь дцеит, ҳәа адырра ҟанаҵоит Аԥсны адәныҟатәи аусқәа Рминистрра Амедиацентр.

Аҩаша, ԥхынҷкәынмза 12 рзы,  Инал Арӡынба  Дамаск ақалақь аҿы иҟоу Идырым Асолдаҭ ибаҟа даҭааит, уаҟа уи атәыла ахақәаиҭреи ахьыԥшымреи зхы ақәызҵаз Шьамтәыла Афырхацәа ҳаҭырла игәалаиршәеит.

Аҟәа. Ԥхынҷкәынмза 12, 2023 шықәса. Аԥсныпресс.   30 шықәса раԥхьа, ԥхынҷкәынмза  12, 1993 шықәсазы иаԥҵан Аԥсны афинансқәа Рминистрра.  

Атәыла аԥыза-министр ихаҭыԥуаҩ, афинансқәа рминистр Владимир Делба ареспублика афинанстә усбарқәа русзуҩцәа аиубилеитә рыцхә рыдиныҳәалеит.

Адныҳәалараҿы ахәҭакахьала иазгәаҭоуп:

«Ԥхынҷкәынмза 12, 1993 шықәсазы ҳтәыла аибашьрашьҭахьтәи аҭоурых аҿы акыр зҵазкуа ахҭыс ҟалеит.  Усҟан, 30 шықәса раԥхьа, Аԥсны Актәи Ахада Владислав Григори-иԥа Арӡынба Ареспублика Аԥсны афинансқәа Рминистрра аԥҵаразы Аусԥҟа инапы аҵаиҩит.  

Арҭ ашықәсқәа рыҩныҵҟа атәыла афинанстә усбарҭақәа атәыла хадара злоу аекономикатә зҵаарақәа рыӡбараҿы узықәгәыӷуа усбарҭаны иҟалеит.  Атәыла афинанстә усхкы аҿы аус зуа рзанааҭтә дырра аҩаӡара ҳараки ҭакԥхықәрала русура азнеиреи ирыбзоураны абиуџьеттә система ҭышәынтәаланы аус ауеит, атәылауаа рсоциалтә хьчареи атәыла аҿиареи алыршахоит.

Аҟәа. Ԥхынҷкәынмза 12, 2023 шықәса. Аԥсныпрсс. Аԥснытәи аҳәынҭқарратә Университет аҿы абиологиатә наукақәа ркандидат, ААУ актәи апроректор Виктор Маланӡиа (10.12.1958 – 18.10.2022 шш.)   ихьӡ зху астипендиа аԥҵахоит.

Виктор Маланӡиа ихьӡ ахҵахоит иара убас ААУ абиологиа-географиатә университет аԥсабара амузеи.

Иара убас, аҵарауаҩ ихьӡ анаӡаӡатәра хықәкыс иҟаҵаны аԥстәқәа рморфологиеи аекологиеи ркафедраҿы иазԥхьагәаҭоуп Виктор Маланӡиа иусумҭақәа еидкыланы рҭыжьра.

Ԥхынҷкәын 26 рзы абиологиа-географиатә факультет аҿы имҩаԥгахоит итрадициатәхо астудентцәеи арҵаҩы-профессортә еилазаареи рыҭҵаарадырра-практикатә конференциа – Маланӡиатәи аԥхьарақәа, ҳәа иаанацҳауеит ААУ аинформациеи амедиакоммуникациақәеи рыҟәша.

Виктор Маланӡиа иԥсы ҭазҭгьы, ԥхынҷкәынмза  10 рзы ихыҵуан  65 шықәса. Уи акыраамҭа ихьуаз ачымазаара бааԥсы иахҟьаны ҵыԥх жьҭаарамзазы  иԥсҭазаара далҵит.

Аҟәа. Ԥхынҷкәынмза 12, 2023 шықәса. Аԥсныпресс.  Актәи аҭыԥқәа ҩбеи аҩбатәи аҭыԥқәа хԥеи ааныркылеит аԥснытәи аспортсменцәа тхеквондо МФТ азы Урыстәылазегьтәи атурнир «Московский вызов» аҿы, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы аофициалтә саит.  

Аркади Саркисиани Давид Кочкониани актәи аҭыԥқәа ааныркылеит.  Даниил Минасиан,  Давид Кочкониан, Аркади Саркисиан араӡны медалқәа роуит.  

Аспортсменцәа азыҟарҵоит Ныгәзар  Торчинааи Аԥсны тхеквондо Афедерациа апрезидент Оҭар Гогәуеи.

Атурнир мҩаԥысуан ԥхынҷкәынмза 10 рзы Москва ақалақь аҿы. Уи рхы аладырхәит  Урыстәыла, Аԥсны, Ермантәыла, Белоруссиа, Ҟазахсҭан рҟынтәи аспортсменцәа.