Аҟәа. Рашәарамза 3, 2024 шықәса. Аԥсныпресс. Аҳәынҭқарра Ахада Аслан Бжьаниа урыстәылатәи аҵарауаҩ, аокеанолог Артур Чилингаров иуацәеи иҭынхацәеи дрыдышшылеит.
Аҳәынҭқарра Ахада иҟаиҵаз адышшыларатә шәҟәы аҿы, ахәҭакахьала иазгәаҭоуп:
«Сшәыдышшылоит Асовет Еидгыла Афырхаҵа, Урыстәылатәи Афедерациа Афырхаҵа Артур Чилингаров иԥсҭазаара дахьалҵыз инамаданы. Ҳара зегьы дҳаԥхеит зыхьӡ-зыԥша дууз урыстәылатәи аҵарауаа реилазаара ахаҭарнак. Артур Николаи-иԥа Арктикеи Антарктикеи рыҭҵаара аус аҿы акыр злага ду алаз иналукааша ҵарауаҩын, ҭҵааҩын.
Аҳәынҭқарратә Дума адепутатс даныҟаз, иара зуси-зажәеи иемадоу анапхгаҩи Зыԥсадгьыл аинтерессқәа рыхьчара есымша иазхиоу апатриот иашеи раҳасабала ихы ааирԥушан. Ус дагьаанхоит уи дыздыруази иҩызцәеи ргәалашәараҿы. Ари алахьеиқәҵаратә мшы азы Аԥсынгьы гәалсра дула ирыдыркылеит ари ажәабжь хьанҭа. Артур Чилингаров иуацәеи иҭынхацәеи ргәырҩа рыцеиҩыршоит. Артур Николаи-иԥа Чилингаров игәалашәара хашҭра ақәым наунагӡа».
